WÜHKHE 5
5
Amümüsüh Mihtsürübo
1 Atungpuhnü Mosa ki tha, 2Israelrü tsührübo apham kihrü, thiyih müyeanrü, tüsho ashemi qiubah müneankhibo binkheampung chingnü yankhita bahpü thiyukhüm jihang. 3Nünü athrürü tüsho aliberü chido binkheampung aleanglim yankhita bahang, jude thsüsho nüsa bolung I lakhi, binkheampung mümünean. 4Israelrü tsührübonü Atungpuhnü Mosa ki thakhi anide arübo binkheampung aleanglim yankhitabah.
Amülim Rhimokhi Dün Shaklokhi
5Tüsho Atungpuhnü Mosa ki tha, 6Israelrü mihtsürübo ki thaang, Küyimki athrürü yungsho aliberünü Atungpuh azhihde neak yihbeakbanü, tüsho mihtsürü ju amülim kambanü, 7anihbuhnü ayihbeakkhi neak dünkheak apinü neak alokhibah; tüsho apinü amülim rhimokhi dün shihcham phüngü ching khülang yukbah ashaklobah, tüsho apinü amülim thsübuh kilim jihbah. 8Tüsho mihtsürü ju sheabahsho tüsho amülim dün shaklokhi jihpü thsüde api buhtsührü mülasho, api dünthsükhipü lakhi mihnupung kheak ajakbah amükeambuh thsungkheaknü Atungpuh kilim jihbah. 9Israelrü tsührübonü amüsüh kingaün amükeambuh kilim handarükhi ju api yo thsübah. 10Tüsho mihtsürü abannü amükeambuh kilim amüsüh kingaün jihkhi ju api yo thsübah.
Thiyuro-mülakhi Niuberübo Dünkheak
11 Atungpuhnü Mosa ki tha, 12Israelrü mihtsürübo ki thaang, mihtsürü khürü niuberünü chamkhide tsosho tüsho api azhihde thiyuro mülakhi rhimosho, 13tüsho mihtsürü khülangnü anihbe kheak müzammüramsho, tüsho ju aniubuh kheaknü ramkhia lasho tüsho anihbe müneana lalashe müngükhitsho, tüsho alibe azhihde thiyumütsan mülasho, yungsho anihbe mutholoa lasho; 14mükthsükhi me api kheak akihbah nihbe zangrü müneanbe aniube kheak mükthsüde kamsho; yungsho mükthsükhi me api kheak akihbah anihbe mümüneanean she aniube kheak mükthsüde kamsho; 15apinü aniube ju amükeambuh kilim bedarübah. Apinü alibe dünkheak kingaün barli hi khahngak 1 kingaün handarübeah; apinü ju ching oliv müdangke tüsho arhümthüneabe muyuk, tümütüsho ha mükthsükhi dünkheak hi kingaün, amülim rhimokhi lümkhitloshihkhi kingaün ah.
16Tüsho amükeambuhnü alibe phünide bedarübah, tüsho Atungpuh miki zhipshihbah. 17Amükeambuhnü ke amüsüh alo phüh ching yukbah, tüsho kingaünpung sadam kheaknü asungthulung lubah ke ching yukbah. 18Tüsho amükeambuhnü alibe ku lokhijihbah Atungpuh miki zhipshihbah, tüsho alümkhitbe kingaün anihbe khah ching yukjihbah, ju mükthsükhi dünkheak hi kingaün. Tüsho amükeambuhnü akhah ching muthrumünean handarübe ke akhüh shuhbah. 19Tüsho amükeambuhnü thiyuchihchimde athakhi ha alibenü alokhishihbah, “ Mihtsürü khürünü nü kheak munungsho, tüsho nü yamkhünbuh bukkhüp lachoki mümüsühkhi ching mütsokheasho, ha muthrumünean handarübe ke akhüh chingnü zuzu labah. 20Tüshe nü yamkhünbuh bukkhüp lachoki tsokhia lasho, tüsho nü niubuh kheak hobah püpürü thrürü kheak nungkhinü nü zangrü müneana lasho,” 21amükeambuhnü alibe muthrumüneankhi thiyuchihchim jihde athabah, “Atungpuhnü nü pho dütsüpshihchoki tüsho nü buk bümshihchoki, Atungpuhnü nü muthrumüneanshang tüsho nü mihtsürü bolung thiyuchihchim khülang thsüshang; 22tüsho ha muthrumüneanbe ke nü buk ching yüzahbah bümshang tüsho nü pho dütsüpshang.” Tüsho alibenü athabah. “ Amen, jude thsüshang.”
23Tüsho amükeambuhnü muthrumüneankhi ju hüm ching thrütyukbah, tüsho ke akhüh ching nütde amüsühbah; 24tüsho apinü muthrumünean handarübe ke akhüh ju alibe yungshihbah, ke akhüh ju apang ching yüzahbah tüsho khühde athsünüshihbah. 25Tüsho amükeambuhnü mükthsükhi hi kingaün alibe khah chingnü alubah, tüsho hi kingaün ju kingaün sadam kheak handarübahle Atungpuh miki müleamde kingaünbah; 26tüsho amükeambuhnü lümkhitde alapü shihcham thsüde hi kingaün ju müyikhüh lubah, tüsho kingaün sadam kheak takbah tüsho anükhüh labah alibenü ke ju ayungshihbah. 27Tüsho küyimki apinü alibe ke yungshihbanü, mürangkhüh anihbe zangrü müneana lasho tüsho niubuhrü kheak azhihde thiyuro mülaa lasho, muthrumünean handarübe ke ju apang ching yüzahbah tüsho khühde thsünüshihbah, anihbe pho dütsüpbah, tüsho buk bümbah, tüsho alibe ju anihbe mihtsürü bolung muthrumüneankhi labah. 28Tüshe alibe ju azangrü mümüneana lasho tüsho müsüh-a lasho anihbe zuzu kambah tüsho tsührü labah.
29Ha mükthsükhi dünkheak yakzan, küyimki aniubenü aniubuh bukkhüp lachoki tsophülapbanü tüsho anihbe zangrü müneanbanü, 30yungsho küyimki athrüpü kheak mükthsükhi me arübahle aniube kheak mükthsübanü alibe ju Atungpuh miki zhipshihbah, tüsho amükeambuhnü anihbe kheak ha yakzan yande arhimobah. 31Athrüpü amülim chingnü zuzu kambah, tüshe alibe a anihbe münean hanbah.
Currently Selected:
WÜHKHE 5: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
