WÜHKHE 4
4
Kohath Tsührübonü Arhimobebo
1 Atungpuhnü Mosa tüsho Aron ki tha, 2Kohath tsührü Levirü bolung, buhtsüh tüsho gukbo chingnü wühkheang, 3kam 30nü akumung tüsho kam 50 khiungde, ashorupung khimyam tankihpü ching yüzahkhukpü thsüde kheang.
4Ha Kohath tsührübonü ashorupung khimyam ching rhimobebo ah: khide amüsüh kukrukbo kümbah. 5Küyimki binkheampung akhinbanü Aron le atsührübonü ayüzahbah tüsho azhinkhi khim yihkhibah tangzüng sangdan phudobah. 6Tüsho arünü ju kheak shihküp lüpkihbah, aku kheak biyi khim yihkihbah, tüsho ashuhbe sangkhrihbo yukbah.
7Arünü Atungpuh kilim jihkhi yikhap zopung dükhüm kheak biyi khim phukihbah tüsho ju kheak phüh-thulung, athüneabe yukkhi phurusük, kingaünbe phurusük, tüsho ayungbe kingaün thsungkheaknü keluhbo de azobah. Tüsho ju kheak yikhap judü lang akihshihbeah. 8Arünü ju alala kheak khim amürüm phukihbah, mihnu küp lüpkihbah, tüsho ashuhbe sangkhrihbo yukbah.
9Arünü biyi khimnü tsünpung dubopung, tsünpungbo, mokhih müjipbebo, phurubeakbo, tüsho oliv müdangke yukpungbo phudobah. 10Arünü ju dümdobah, tüsho pungphurubo shihküpnü muhiukhi ching yukbah ashuhbe sangkhrih kheak zobah.
11Jushu arünü suna kingaün sadam kheak biyi khimnü aphudobah, ju kheak shihküp lüpkihbah, tüsho ashuhbe sangkhrih yukbah. 12Arünü arüngyam ching yo pungphuru alala lubah biyi khim ching dümbah amikheak shihküpnü alüpkihbah, tüsho ashuhbe sangkhrih kheak zobah. 13Tüsho arünü kingaün sadam kheak yo awah wua bahbah khim mürümmuchu ju kheak phukihbah; 14tüsho arünü ju kheak kingaün sadam yo pungphuru alala, mophuru, shihkhoyang, alo-thsukbe, müsühmüra-phurubo yukbah; tüsho arünü ju kheak shihküp lüpkihbah ashuhbe sangkhrihbo yukbah. 15Tüshe küyimki Aron le atsührübonü kingaün sadam tüsho zowupungbo ju aphudokhambanü, arü binkheampung akhinchoki, Kohath tsührübonü arübah jurübo hanbah, tüshe arübonü amüsüh kukrukbo muqiu, jude yungsho arübo ashebah. Harü kukrukbo ha ashorupung khimyam ching yo Kohath tsührübonü ahanbebo ah.
16Amükeambuh Aron tsührü Eleazarnü arhimobebo ju arüngyam abümnü tüsho tsünpungbo thsungkheak moke, rhümthüneabe, nimung aban hi kingaünpü, amujube müdangke tüsho arüngyam ching Atungpuh kilim müsühkhitkhi kukrukbo.
17 Atungpuhnü Mosa tüsho Aron ki tha, 18Kohath guk trükbo Levirü lungnü düsheabahshih; 19tüshe arü ki tsüde rhimoang, junangde arü rhangdung labah tüsho khide amüsüh kukrukbo ki phünide arüchoki müshe: Aron tüsho atsührübonü yüzahang tüsho arü aban rhimo jihang, 20tüshe arünü anükhüh kheak lang she amüsüh kukrukbo kheahpü müyüzah, jude yungsho arü ashebah.
Gershon Tsührübonü Arhimobebo
21 Atungpuhnü Mosa ki tha, 22Gershon tsührübo wühkhe arü buhtsüh tüsho arü guk yande luang; 23kam 30nü kam 50 khiungde nünü arübo ashorupung khimyam ching tankihpü yüzahkhukpü thsüde mung kheang. 24Gershon gukbo thsungkheaknü tankihpü tüsho hahmülangbo: 25arüngyam aleanglim tüsho alunglim phudobe, ju ku kheak shihküp kihbah, ayüzah limro phudobe khim, 26arüngyam tüsho kingaün sadam mühide kidokhi phudobe khimbo, ayüzah limro zhindokhi, amukhung ching ahorikhi shungliu tüsho sanglungbo Gershonrünü harü kukrukbonü yihnüpü lakhibo alala rhimobah. 27Aron tüsho atsührübonü Gershonrünü tankihbe rhimo athrünkhi jihbah. Tüsho arünü arhimobebo nünü arü kilim rhimobo jihbeah. 28Ha Gershon gukbo thsungkheaknü ashorupung khimyam ching tankihbe rhimobo ah. Tüsho arü rhimobo ju amükeambuh Aron tsührü Ithamar khah ching labah.
Merari Tsührübonü Arhimobebo
29Merari tsührübo thsungkheaknü, nünü arübo guk tüsho buhtsüh yande kheang. 30Kam 30nü kam 50 khiungde, sherübo ashorupung khimyam tankihpü ching yüzahchonü arübo kheang. 31Tüsho arübo arüngyam ching tankihbe rhimobo ju: akümsang, sangkhrihbo, dungjingbo, müchinmürabebo, 32thüyam dükeak yo dungjingbo tüsho müchinmürabebo, ashungdungbo, liubo, ju lung sanglungbo tüsho arünü arhimobebo kukruk; tüsho nünü mihbüm abande mungjimungji hanshihbeah. 33Ha Merari gukbonü arüngyam ching tankihbe rhimo: arünü amükeambuh Aron tsührü Ithamarnü khuhlangahuhkhi yande arhimobah.
Levirü Wühkhe
34Jumonü Mosa, Aron, tüsho boto limberübonü Kohath guk tüsho buhtsüh yande khe. 35Arübo kam 30nü kam 50 khiungde ashorupung khimyam tankihpü ching yüzah; 36tüsho gukbo yande akhekhi ju 2750. 37Ha Kohathrü yamkhünbo, ashorupung khimyam ching tankihrü tüsho Mosa hode Atungpuhnü ajihkhi yuzüng yande Mosa tüsho Aron anenü akhekhi ah.
38Gershon gukbo tüsho buhtsüh yande akhekhi, 39kam 30nü 50 khiungde, ashorupung khimyam tankihpü ching yüzahrü– 40arü guk tüsho buhtsüh yande akhekhi ju 2630. 41Ha Gershon gukbo, ashorupung khimyam ching tankihrü tüsho Mosa hode Atungpuhnü ajihkhi yuzüng yande Mosa tüsho Aron anenü akhekhi ah.
42Merari gukbo arü buhtsüh yande akhekhi, 43kam 30nü 50 khiungde, ashorupung khimyam tankihpü ching yüzahrü– 44arü guk yande akhekhi ju 3200. 45Ha Merari gukbo, ashorupung khimyam ching tankihrü tüsho Mosa hode Atungpuhnü ajihkhi yuzüng yande Mosa tüsho Aron anenü akhekhi ah.
46Mosa, Aron tüsho Israelrü limberübonü Levirü arü guk tüsho buhtsüh yande akhekhi, 47kam 30nü 50 khiungde, ashorupung khimyam tankihpü rhimo ching yüzahkhukrü tüsho hahmülang hankhukrü, 48arübo wühkhe alalanü 8580. 49Atungpuhnü Mosa kilim thiyukhüm jihkhi yande arübo mihbüm abannü nihbuh tankihpü rhimo yungsho ahanpü jih; ha ruk apinü arübo wühkhe.
Currently Selected:
WÜHKHE 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
