WÜHKHE 22
22
Balaknü Balaam Jikhi
1Tüsho Israel mihtsürü tsahmusubahle Jirikho hobah Jordan thripkhüh lim Moab dükhün ching binkheam.
2Kheakü Zippor tsührü Balaknü Amorrü kheak Israelrünü arhimokhibo ngü. 3Tüsho mihtsürü hihmonü Moabrü khide trede kam, tüsho Israelrü dünkheaknü Moabrübo atrekhinü tukthsüde kam. 4Jumonü Moabrünü Midia azothsürübo ki tha, “Kheakü moshipungnü thulu ching rim müleaka tsühkhi nangde harü botonü isa mühide alakhi alala müleaka tsühpü thsüchoh.” Tüsho Zippor tsührü Balak ju kim ching Moab kiulongthsüpuh lakheah. 5Jumonü apinü Beor tsührü Balaam kilim api mihtsürü tsührübo lomi ching keto phünide Pethor ching api jide thiyusheak yüshih, tüsho tha, “Kheahang, mihtsürübo Ijip chingnü arüa lah. Kheahang arünü alomi michoh, tüsho arübo thüninde lah! 6Jumonü khülang ki arübah harü mihtsürübo athruang, tümüde arübo I thsungkheak khide wu-sühmüh lah. Judüalalashe inü arü kukbah tüsho lomi chingnü yankhita bahbah, tümüde nünü shepü kheak müngühjihbanü müngühjihchoh, tüsho shepü kheak nünü athruchonü muthrumüneanchoh de inü mükheahlah.”
7Jumonü Moab tüsho Midia azothsürübonü arü khah ching mebelopü shuhbah Balaam kilim arü tüsho Balaknü athakhi yubo api ki tha, 8tüsho apinü arü ki tha, “Khihre ha ching binang tüsho Atungpuhnü I ki thakhi nüsa kilim thiyusheak lubah arüanü.” Jumonü Moab kiulongthsürü tsührübonü Balaam lung bin.
9Tüsho Thrünpuhnü Balaam kilim arübahle tha, “Nü lung larü mihtsürübo ha sherü a?”
10Apinü alo, “Zippor tsührü Balak, Moab kiulongthsüpuhnü I kilim ha thashihpü arü arüshih-a lah. 11Kheahang, Ijip chingnü mihtsürü akhiuka lah, tüsho arünü lomi mia lah. Kheakü arübah I thsungkheaknü arü athrujang, jude thsüsho inü arü kheak keochihkhukbah tüsho yankhita bahbah.” 12Tüshe Thrünpuhnü Balaam ki tha, “Nü arü lung müyü, nünü mihtsürübo mathruaji, tümüde arübo inü müngühjihdo.” 13Jumonü Balaamnü yapsu asürübahle Balak yunithsürübo ki tha, “Nüsa lomi lim alode yüang, tümüde I nüsa lung yüpü Atungpuhnü thsunglodo.” 14Jumonü arünü Balak kilim alode yübahle tha, “Balaamnü isa lung arüpü thsunglochoh.”
15Tüsho Balaknü kiulongthsürü tsührübo akhuhlim kheaknü ahihbe tüsho khide adungtobo yüshih. 16Arünü Balaam kilim arübah api ki tha, “Zippor tsührü Balaknü ha thachoh: Muzhobah nü I kilim arüpü tümünü she düzhipdoshih; 17tümüde tsükjide inü nü wüntrebah, tüsho nünü I ki tümüpürü thabanü ju rhimobah. Jumonü muzhobahle arübah harü mihtsürü I thsungkheaknü athrujang.” 18Tüshe Balaamnü alo, “Balaknü I kilim api yam, shotoyinchi tüsho sunanü mide jihjih she, nükde yungsho hihde arhimopü, Atungpuh I Thrünpuh yu ayiuhde müyü. 19Jumonü muzhobah nüsa she khihre ha ching binang, junangde Atungpuhnü I ki tümü thalobanü inü amükheahbah.”
20Tüsho ju tsüngre Thrünpuhnü Balaam kilim arübah api ki tha, “ Mihtsürübo arübah nü jisho asürübah arü lung yüang; tüshe inü nü ki küpü yu thachonü nünü ju lang arhimobah.” 21Jumonü Balaamnü yapsu asürübahle anihbuh donki kheak bin tüsho Moab torü bolung yü.
Balaam tüsho Donki
22Judüki Thrünpuh bukakhiuk tümütüsho Balaam yüde alakheah, tüsho Atungpuh yunirünü api azhihde limro ching zhip. Balaamnü anihbuh donki kheak binbah be tüsho api yamlarü mahne api lung lakheah. 23Kheakü donkinü A TUN GPU H yunirü akhah ching nukshang shuhbah limro ching zhipde ngü, tüsho donkinü limro ching rholobahle thulu limpeang yü. Jumonü Balaamnü donki ju limro lim rholode arüshihpü rhap. 24Judüki A TUN GPU H yunirünü kurungasolu düpheak thripkhüh thripkhüh rhü lakhi amütsüm limro ching zhip. 25Tüsho küyimki donkinü Atungpuh yunirü zhipde angükhea, apinü rhü kheak nimkih tüsho Balaam jing rhü kheak zükih; jumonü apinü donki kheak rhaplo. 26Jushu Atungpuh yunirünü limshude yü tüsho tsülim yungsho huzulim anguhpü limro mülakhi amütsüm dangpung kheak zhip. 27Tüsho küyimki donkinü Atungpuh yunirü ngükhea, api Balaam khüp mühüpa yap; jumonü Balaam buk alü akhiuk, tüsho donki kheak api tsonü rhap. 28Judüki Atungpuhnü donki mün khimshuhjih, tüsho donkinü Balaam ki tha, “ Inü nü ki tümü rhimokhi, nünü I kheak mahsam ki rhapkhea?”
29Tüsho Balaamnü donki ki tha, “ Tümütüsho nünü I ki keangrümünedo. I khah ching nukshang shuhkhülaa inü nü laksah-a labah.”
30Jumonü donkinü alo, “ I ha nü rhangdung amuyung khihni khiungde nü binkhi yungde? Püpüki inü ha ruk rhimodo de?” Apinü tha, “Yung.”
31Judüki Atungpuhnü Balaam mük khimshuhjih, tüsho apinü Atungpuh yunirü akhah ching nukshang limro ching shuhbah zhipde ngü; tüsho apinü amiro koyubah khukninga yap. 32Tüsho Atungpuh yunirünü api ki tha, “ Tümüde nünü nü yo donki kheak mahsam ki rhapkhea? kheahang, nü azhihde azhippü I akhiukdo, tümütüsho I miki nü limro khudolah. 33Donkinü ngübah I kheaknü mahsam ki rholobah tsodo. Apinü I kheaknü rholobah mütsokhülaa tsükjide inü nü laksah-a labah tüsho api arhang lashihbah.”
34Tüsho Balaamnü Atungpuh yunirü ki tha, “ Inü neak yihbeakdo, tümüde I azhihde nü limro ching zhipkhi inü mümükheah. Jumonü nü miki amülim thsüa lasho, I alode ayübah.”
35Tüshe Atungpuh yunirünü Balaam ki tha, “ Mihtsürü bolung yüang, tüshe inü nü ki thakhi yu lang nünü athabah.” Jumonü Balaamnü yunithsürü lung yü.
Balaknü Balaam Leangkhikhi
36Küyimki Balaam arüchoh de Balaknü asokhea, apinü anihbuh shorupü Moab kiuto ching yü, ju api lomi akheam lim Arnon aredung ching lakheah. 37Tüsho Balaknü Balaam ki tha, “ Inü nü jishihpü nü kilim mushude thiyia marüshih de? Tümüde nü I kilim marükhea? Inü nü ki wüntre müjihkhukba de?”
38Tüsho Balaamnü Balak ki tha, “Kheahang, I nü kilim arüdo! Kheakü inü tümükhüh thapü kukla shi? Thrünpuhnü I mün ching yukjihkhi yu lang inü athabeah.” 39Jumonü Balaamnü Balak lung yü, tüsho ane Kiriath-huzoth ching arü. 40Tüsho Balaknü moshipung le namfimihnu laksah-a kingaün, tüsho shih khürü Balaam tüsho api lung arürü kilim jih-a yüshih.
Balaamnü Müchitkhi Akhuhbe
41Jumonü ashidopü, Balaknü Balaam bebah Bamoth Baal ching wutu, tüsho ju chingnü apinü Israel mihtsürü chamkhüh ngü.
Currently Selected:
WÜHKHE 22: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
