WÜHKHE 21
21
Horma ching Kananrü Kukkhi
1Küyimki Kananrü, Negeb ching larü Arad kiulongthsüpuhnü Israelrü Atharim limro chingnü arüchoh de asokhea, apinü Israelrü bebah keochih, tüsho khürü rama lu. 2Tüsho Israelrünü thiyuchihchimde Atungpuh ki tha, “Nünü harü mihtsürü isa khah ching jihsho, isanü arü kiutobo shahde thsümünimjihbah.” 3Tüsho Atungpuhnü Israelrü yu anide Kananrübo arü khah ching jih tüsho arünü kiutobo shahde thsümünimjih. Jumonü ju dangpung ki ju Horma de ji.
Müwayinchi Phuruto
4Jushu arü Edom lo mühide ayüpü, Hor wung chingnü tsahmusubah Amürüm Keto limro yande yü, tüsho limro ching mihtsürübo marümkheamkhukde kam. 5Tüsho mihtsürübonü Thrünpuh tüsho Mosa azhihde tha, “ Tümüde nünü isa sunglo ching sheshihpü Ijip chingnü bede atukhea? Tümüde ju ching jim tüsho ke müla, tüsho yikhap yancho hanü isa mukhiuka lah.” 6Jumonü Atungpuhnü müzüm phuruto Israelrü bolung arüshihbah mihtsürübo nguh; tüsho Israel mihtsürübo ahihkhüh sheabah. 7Jumonü mihtsürübonü Mosa kilim arübah tha, “ Isanü Atungpuh tüsho nü azhihde athakhi hode neak yihbeakdo; isa kheaknü phuruto tsoabahshihpü Atungpuh ki tamkhüntamnüjang.” Jumonü Mosa nü mihtsürübo thsungkheak tamkhüntamnü. 8Tüsho Atungpuhnü Mosa ki tha, “ Müwayinchi phuruto khülang thsüang, tüsho sangkhrih kheak yihkihang; tüsho sherübo nguhbanü ju kheak kheahsho rhangdung labah.” 9Jumonü Mosanü müwayinchi phuruto thsübah sangkhrih kheak yihkih; junangde phurutonü khürü nguhbah ju kheak kheahsho rhangdung la.
Hor chingnü Moab Khiungkhi
10Kheakü Israel mihtsürü tsahmusude yübahle Oboth ching binkheam. 11Tüsho arü Oboth chingnü tsahmusubah Moab aniakhiuklim sunglo, Iye-abarim ching binkheam. 12Ju chingnü arü tsahmusubah Zered dükhün ching binkheam. 13Ju chingnü tsahmusubah Amorrü lo aredung yean sunglo Arnon thripkhüh limpeang binkheam; tümüde Arnon ju Moab tüsho Amor dükeak aredung ah. 14Jumonü Atungpuh thirithsü hüm ching thaa lah, “Waheb ju Supha ching, Arnon ayungbo, 15tüsho jindükhün düpheaknü Ar kiuto ching Moab aredung khiunglah.”
16Tüsho ju chingnü arü Beer ching yü, küpü kekhip ching Atungpuhnü Mosa ki tha, “ Mihtsürübo bemukhungang, tüsho inü arü kilim ke duhbah.”
17Judüki Israelrünü ha khün thsü:
“O kekhipbo, ke bukkhitang;
Tüsho isanü khün thsübah–
18Limberübonü akiukhi kekhip,lomi ching mükheahmudurübonü akiukhi,
yakzan thsürübonü akiukhi,
kiulongthsü tsonü akiukhi.”
Arübo sunglo chingnü Mattana ching yü, 19tüsho Mattana chingnü Nahaliel, Nahaliel chingnü Bamoth, 20tüsho Bamoth chingnü Moab, Pisga wung kheak sunglo chinzhinpung Moab jindükhün khiung.
Sihon tüsho Og Kukkhi
(Yuzüng 2.26—3.11)
21Judüki Israelrünü Amor kiulongthsüpuh Sihon kilim yunithsürü yüshihde tha, 22“ Isa nü lomi hode yüanü. Isanü thulubo yungsho kurungasolu ching müyü; isanü kekhipbo chingnü ke muyung; tüshe isanü nü lomi hode müyüyikia kiulongthsüpuh limro yande ayübah.” 23Tüshe Sihonnü Israelrü api lomi hode müyüshih, jumonü Sihonnü api mihtsürü alala bemukhungbah Israelrü azhihde sunglo ching wutu, tüsho api Jahaz khiungbah Israelrü bede keochih. 24Israelrünü nukshangnü api laksah, tüsho api lo Arnon kheaknü Jabok khiungde lu; tüshe Amonrü lang khiungde lu; tümüde Amonrü aredung ju chipi düküngde thsüa lakheah. 25Jumonü Israelrünü harü kiutobo lukham, tüsho Israelrünü Amorrü kiutobo, Heshbon tüsho ju mühi alala ching la. 26Tümüde Heshbon ju Amorrü kiulongthsüpuh Sihon kiuto lakheah, api hode akhuhlim Moab kiulongthsüpuh kheak keochih, tüsho api lomi Arnon khiungde lukham.
27Jumonü müchitmuduyu tharünü tha,
“ Heshbon ching arang, ju thsüshang;
Sihon kiuto thsüloshang.
28Tümüde Heshbon chingnü mo,
motru khülang Sihon kiuto chingnü akhiuk;
junü Moab ching lakhi Ar thsümünim tüsho Arnon mujukbo muliuabah.
29Moabrübo nüsa ayokhe!
Nüsa Kemosh kingaünrübo dükheakabahdo!
Nüsa Thrünpuhnü athrürübo tsotsahrümtsahrü kamshih,
tüsho aliberübo Amor kiulongthsüpuh khah ching aramrü kamshih.
30Tüshe kheakü arü tsühsoniusobo dükheakdo,
Heshbon chingnü Dibon khiungde,
Nashim chingnü Nopha khiungde, ju Medeba phünide.”
31Hanangde Israelrü ju Amorrü lo ching la. 32Tüsho Mosanü Jazer züta kheahshihpü thiyi; tüsho arünü ju kiulongbo lukhambahle ju ching larü Amorrü yankhitabah.
33Tüsho arünü rholobahle Bashan limro yande wutu. Jumonü Bashan kiulongthsüpuh Ognü mihtsürü alala bebah arü bede keochihpü Edrei ching wutu. 34Atungpuhnü Mosa ki tha, “Dütre, tümüde inü api lung mihtsürübo tüsho alomi nüsa khah ching jihdo; tüsho Heshbon ching lakhi, Amor kiulongthsüpuh Sihon kheak rhimochoki nangde nüsanü api kheak rhimobah.” 35Jumonü arünü api, atsührübo, api mihtsürübo sheshe maningshihde laksah; tüsho arünü api lomi lu.
Currently Selected:
WÜHKHE 21: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
