WÜHKHE 12
12
Miriam Thsümüchikhi
1Mosanü Kushberü lukhi dünkheak Miriam le Aron anenü azhihde tha. 2Anenü tha, “Atungpuhnü Mosa hodü lang asukkhea de? Apinü isa hodü she masukkhea de?” Tüsho Atungpuhnü ju so. 3Mosa ju alomiküp kheak larü alala kheaknü khide azhihayih mihtsürü lakheah.
4Zukleangnü Atungpuhnü Mosa, Aron tüsho Miriam ki tha, “Nüsasam arüngyam ching akhiukang.” Jumonü arüsamnü wukhiuk. 5Tüsho Atungpuhnü amo dungto ching akhiukbahle arüngyam ripit ki zhip tüsho Aron le Miriam büne ji: tüsho ane chido mikhuhlim yü. 6Tüsho Atungpuhnü tha, “Kheakü I yu aniang! Küyimki nüsa bolung wukihrü labanü, inü arü michih ching I akhiuka huhchoh tüsho inü arü kheak milim ching asukachihchoh. 7I yamlarü Mosa ki a ju ruk yung; inü api Israel mihtsürü athrünkhi kurungkheak zojihlah. 8Jumonü inü api kheak mironü miro khipkhitde asukachih, neamneamde yung; tüsho apinü Atungpuh pang she ngüdo. Jumonü tümüde nükenü I yamlarü Mosa azhihde athapü mütrekhea?” 9Tüsho ane kheak Atungpuh bukakhiukkhi alü kam, tüsho api tsoabah; 10tüsho küyimki amo ju khimyam kumungnü atsokheanü, kheahang, Miriam kheak apham phürüm müyekhi nangde akhiuk. Aronnü Miriam kilim abina kheahshe alibe apham kih-a lakheah. 11Tüsho Aronnü Mosa ki tha, “O I tungpuh ike düthsümüchi tümütüsho ikenü mudukmükede neak yihbeakdo. 12Nihbuh berü buk chingnü azübechoki shih thripkhüh tsüabahkhi nangde muzhobah alibe ashekhi dükamshih!”
13Jumonü Mosanü Atungpuh ki zhide tha, “O Thrünpuh, alibe thsüngujang de inü nü ki mushuchoh.”
14Tüshe Atungpuhnü Mosa ki tha, “ Anihbe abuhnü alibe jak kheak mukhiukkih-a lasho, anihbenü nimung thüne mungchih mulubea de? Jumonü anihbe binkheampung aleanglim nimung thüne rihdoa binshang, tüsho jushu alibe belode azahang.” 15Jumonü Miriam ju binkheampung aleanglim nimung thüne rihdoa zo; tüsho Miriam belode mazahyi khiungde mihtsürübonü mütsahmusu. 16Jushu mihtsürübo Hazeroth chingnü tsahmusude yübah Paran sunglo ching binkheam.
Currently Selected:
WÜHKHE 12: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
