WÜHKHE 11
11
Atungpuh kilimnü Mo Akikhi
1Tüsho mihtsürübonü arü küpkhukkhi dünkheak Atungpuhnü sode dapdapneangneang; tüsho küyimki Atungpuhnü asokhea, api bukakhiuk tüsho arü bolung Atungpuh mo takshih, tüsho binkheampung mühi mühit khürü takabah. 2Tüsho mihtsürübonü Mosa ki zhi; tüsho küyimki Mosanü Atungpuh ki tamkhüntamnükheanü mo ju mütabah. 3Jumonü ju dangpung ki Tabera de ji, tümüde Atungpuh mo arü bolung ching aniu.
Mosanü Limberü Nerü Mokhitkhi
4Judüki Israelrü bolung khiungkerü khürü hantsah ching bea lakheah. Arübonü shih khide künde kam, tüsho Israelrünü she tripde tha, “Shepünü isa kilim shih jih-a tsühshihba? 5Ijip ching thüngüh adün mülade isa künkhi tsühkhi, liuheak, ke-liuheak rhiptsüh, sangpung, tüsho thono lümkhitchoh; 6tüshe kheaküa isa sühmüh kungabahdo; isa miki manna lakhi kheak hode püpü tümü müla.”
7Manna ju khiungün ji nangde tüsho akheahpü müyemuchude kelülü lakheah. 8Mihtsürübonü yübahle handarünü azübe yungsho thsam chingnü chuthünakbah phüh chingnü khiung, tüsho junü yikhap dam; tüsho akekhi ju oliv müdangke yukbah adamkhi yikhap nangde alakheah. 9Küyimki azhing ching ayinke khimyam kheak keambanü, ju lung manna aki.
10Mosanü mihtsürübo yamkhün abande, nihbuh khimyam ripit ki tripkhi so; tüsho Atungpuhnü khide bukakhiuk, tüsho Mosa masühde kam. 11Mosanü Atungpuh ki tha, “Nünü tümüde nü yamlarü kheak masühde rhimocho? Tümüde I nü mük ki tsüde müngücho, tüsho harü mihtsürü hahmülang I kheak akihshihcho? 12Harü mihtsürü ha inü alashihkhea de? Inü zübekhea de, junangde arübo khungarü buhrünü abuhkhi nangde I khüh kheaknü shuhbah arü jipürü ki thiyuchihchimkhi lo ching hanbah yüang de nünü küde I ki thacho? 13Inü hadükhüh mihtsürü kippü shih küchingnü angüba? Tümüde arübonü I ki tripde thachoh, ‘ Isa kilim shih tsühpü jihang!’ 14I zangrünü mihtsürü hadükhüh hahmülang mühankhuk, tümüde ha I thsungkheaknü khide mülanglah. 15Nünü I kheak ha ruk rhimobasho, muzhobah kheakü ha chingnü I laksahang, jude athsükhi hode I küpkhukkhi inü müngülonü.”
16 Atungpuhnü Mosa ki tha, “ Israel mihtsürü bolung arü kurungkheak azothsürü thsüpü tüsho atorü thsüpü nünü akheahkhitkhi mihtsürü nerü I kilim bemukhungang; arübo arüngyam ki bedarang, tüsho arübo ju ching nü lung zhipshang. 17Tüsho I akibahle ju ching inü nü kheak asukachihbah, tüsho nü kheak lakhi me khürü inü lubah arü kheak yukjihbah; tüsho arünü mihtsürü hahmülang nü lung hanrungbah, junangde nü zangrünü lang mühan. 18Tüsho mihtsürübo ki thaang, ‘Nüsa nihbuh zangrü shido thsungkheak müsühkhitang, tüsho nüsanü shih tsühbah;’ tümüde nüsanü Atungpuhnü sode tripde thado, ‘Shepünü isa kilim shih jihba? Tümüde isa Ijip ching reangkeamde alakheah.’ Jumonü Atungpuhnü nüsa kilim shih jihbah, tüsho nüsanü atsühbah. 19Nüsanü nimung khülang, yungsho nimung mahne, yungsho nimung phüngü yungsho nimung thürü, yungsho nimung muku lang mütsüh, 20tüshe khinu khülang amuyung, nüsa mulongmüngüm arüde tüsho mumukhiukyi khiungde atsühbah, tümütüsho nüsa bolung lakhi Atungpuh nüsanü bahyukdo tüsho api ki tripde tha, ‘ Isa tümü thsüpü Ijip chingnü akhiukkheaki?’ ”
21Tüshe Mosanü tha, “ I ha ching mihtsürü 600,000 bebah tsahchoh, tüsho nünü arü kilim khinu khülang tsühpü shih jihbah de thachoh! 22Arünü reangkeamshihpü thsüde moshibo tüsho mihnubo laksahba shi? Yungsho keto ching lakhi thüngühbo hanmukhungbah arü reangkeamshihba shi?”
23 Atungpuhnü alo, “Atungpuh khah thamalah düpü? Kheakü nü thsungkheaknü I yu dünjinahnü nünü angübah!”
24Jumonü Mosanü wukhiukbahle Atungpuhnü athakhibo mihtsürübo ki tha; tüsho apinü azothsürübo mihtsürü nerü bemukhung tüsho khimyam mühide zhipshih. 25Tüsho Atungpuhnü amo ching akibahle api ki asukachih, tüsho api kheak lakhi me khürü lubah azothsürü nerü kheak yukjih; tüsho küyimki me ju arü kheak keamkhea, arünü müchitmudupü tankih. Tüshe kim ashang thsungkheaknü yung.
26Kheakü azothsürü nerü bolung ane mahne Eldad tüsho Medad khimyam ching müyüde binkheampung ching bin. Ju binkheampung ching me ane kheak arü tüsho ane she müchitmudupü tankih. 27Eldad tüsho Medad anenü müchitmudukhi dünkheak thapü athrününgtsüng khülang Mosa kilim alihde yü.
28Tüsho Nun tsührü Jihusua athunu kim chingnü Mosa rungrü, apinü amokhitkhi mihtsürünü tha, “ I tungpuh Mosa, arübo zhipdoang.”
29Tüshe Mosanü alo, “Nünü I dünkheak mükthsücho shi? Atungpuhnü amihtsürü alala kheak ame yükihshihbah wukihrübo nangde zhishang shi de inü lümlah!” 30Tüsho Mosa le Israelrü azothsürü nerünü binkheampung lim alode yü.
Atungpuhnü Wuhkhi Arüshihkhi
31Judüki Atungpuh kilimnü apung yünde yü tüsho keto chingnü wuhkhibo alo kheaknü khahnap mahsam bande yükihbah phindarü keam. Arübo binkheampungbo kheak tüsho khülim khülim nimung khülang khüh limtsah dükeak ching keam. 32Jumonü mihtsürübonü nimungroro, tsüngreroro tüsho ashidopü khiungde wuhkhibo rammukhung; shenü she khahngak 1000 bukkhüp müram. Arünü jurübo binkheampung mükamde zo. 33Arübonü shih mütsühkhamyide, mihtsürübo azhihde Atungpuh bukakhiuk, tüsho Atungpuhnü arüm tukthsü ato khülangnü mihtsürübo kheak shik. 34Jumonü ju dangpung ki ju Kibroth Hattaava de ji (amütsan shihmürhükrü kiuyukbo), tümütüsho arübonü ju ching shihmürhük mihtsürübo kiuyukabah. 35Mihtsürübonü Kibroth Hattaava chingnü Hazeroth ching akhin; tüsho arübo Hazeroth ching binkheam.
Currently Selected:
WÜHKHE 11: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
