NAHUM 3
3
1Ayokhe! thiyih bukkhi kiuto,
akeangyunü amikhi,
ayankhikhinü amikhi,
ayankhikhinü akheam müla!
2Shitso düsheak tüsho lolungbe jingkhün,
khora jukkihchoh tüsho khora-lolungbe dükhiungchoh!
3Khoraberünü müneahchoh,
nukshang phürapchoh tüsho thsüh rakrakchoh,
ashekhi keamkihchoh, ashemibo mujunglah,
ashemi pangbo mükhebin–
arübo ju mibo kheaknü mürhelochoh!
4Tümütüsho mükhebinkhi müzammüram amülim thsükhinü,
münitphülapkhi, anihbe wurük,
shepünü lomi tüsho mihtsürü anihbenü bemüchihkhi tüsho wurük hode azhorü kamshih,
5inü nü azhihde lah, Wuto Atungpuhnü thachoh,
tüsho nü rungthsün nü miro kheak lahkihjihbah;
tüsho inü trükshihbonü nü bünkeang kheak tüsho kiulongthsübonü nü achih ngükhi kheahshihbah.
6Inü müneanmuru nü kheak bahbah tüsho bahyukde nü jungbah,
tüsho mükkheahdung kamshihbah.
7Judüki nü ngürü alalanü nü kheaknü arholobah tüsho athabah,
“ Nineve thsümünima lah;
shepünü anihbe lümrhihba?”
Nü shukheamrü inü küchingnü ayimba?
8Nü a Nile kheak lakhi Thebes, kenü mükamdoa lakhi a shi? Ayung ju anihbe tsunglobe, kebo anihbe chipi lakheah. 9Kush tüsho Ijip ju anihbe sühmüh arün mülakhi lakheah; Put tüsho Libya anihbe müshiprü bolung lakheah. 10Tütüshe anihbe rama lubah ramtso ching yü; anihbe khungarübo she kiudunglimro yean aban ching adütre kamde kingthünak; anihbe mükheahmudurü dünkheaknü azanbo thsü, tüsho anihbe torü alala wuhrünliubo yuk.
11Nü she amüshangbah, nü jikde ayübah; nü thiriri kheaknü tsoyukpung yimbah. 12Nü chipibo alala akhuh asokihkhi kurungasodung nangde–aniungsho atsührü mün ching keamchoh. 13Nü rithsürübo kheahang: arübo azoberü nangde lah, nü lomi chipiripitbo nü riribo kilim khimshuhmülih-a lah; nü chipiripit rihbebo monü aniuabahdo. 14Ayanchoki thsungkheak ke khipang, nü chipibo thsakhamang; lotaklung thsüpü alo müleang, tüsho lotaklung tsanglungang!
15Ju ching monü aniubah, nukshangnü nü lipkhibah. Hanü nü tangkhonü nangde tsühabahbah. Tangkhobo nangde nü hihde kamdo! 16Nünü shothsümolorübo thüning ching chiningbo kheaknü hihde kamshihdo. Tangkhobo nangde arü ghi chutreakbah phinde tsochoh. 17Nü aheangrübo sangyü-tangkhobo nangde, nü yo atorübo tangkho boto athsak nimung shahwün kheak binkhi nangde lah–küyimki ani akhiukbanü, arübo phinde tsoabahchoh; arü küching yüdünü shenü mümükheah.
18Nü yo namfimihnu neakrübo yapshea lah, O Asiria kiulongthsüpuh; nü yo mükheahmudurübo anechoh. Nü mihtsürübo abemukhungrü mülade müzüngbo kheak hiumüzüta lah. 19Tümünü nü mü müthsüngukhuk; nü yurikhi ashebe lah. Nü yusheak sorü aban nü keamkhi dünkheak khah damchoh, Khürünü akheam mülakhi nü bukmükekhi chingnü tsokhidü de?
Currently Selected:
NAHUM 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
