HABAKKUK 1
1
1Ha Atungpuhnü wukihrü Habakkuk ki akhiuka huhkhi yusheak ah.
Habakkuknü Atsangkhi
2O Atungpuh , külokhüh inü arung thsungkheak zhiba tüsho nünü maniba? Yungsho nü ki zhiba, “Thsünimthsüshi!” tüsho nünü mükhümkhitba? 3Tümüde nünü I amülim rhimo ngüshihcho tüsho küpkhuk kheak kheahshihcho? Athsümünim tüsho thsünimthsüshi I miki lah; shochihkhi tüsho rukachihkhi wusuchoh. 4Jumonü yakzan niukniukabahdo tüsho thiyuro mürhimo. Mihbukmuyuknü thiyurolungkirü mükamdolah–jumonü thiyuro mahkhapkhi bephülapdo.
Atungpuhnü Alojihkhi
5Trükshihbo kheak mürüngang, tüsho kheahang! Tode müyinnimang! Tümüde nü ki thatha she nünü akin mülapü thsüde nü nimungbo ching rhimo rhimodo. 6Tümüde inü mihmukhiuh tüsho mükeamramkhi trükshih, nihbuh yo yungkhi lapungbo lupü alomi mülih hode atsahkhi Kaldearü wusushihchoh. 7Atrebe tüsho atrearangbe arü ah; arü ju lang yakzan ah tüsho arü nihbuh küdahnü wüntrepü shuhkihchoh.
8Arü khorabo ju sangtsung kheaknü athribe, are tsahbe rimre kheaknü alü amüshakbe; arü khorabonü khuchoh. Arü khoraberübo limshu chingnü arüchoh; arünü müleang phinkhi nangde shih tsühpü yungde akichoh.
9Arü alalanü athsümünimpü miro khuhlangbah arüchoh; arünü aramrübo loyi nangde bemukhungchoh. 10Arünü kiulongthsürübo ki münejihchoh tüsho yakzanshuhrübo ki keangrümünechoh. Arünü chipi aban kheak kheah-a münejihchoh, tüsho ju lupü alo wumujungchoh. 11Junangde arünü apung nangde phütchoh; arünü lakmihchoh tüsho amülim kamchoh; arü nihbuh sühmüh ju lang arü thrünpuh ah!
Habakkuknü Atungpuh ki Atsanglokhi
12Nü adüsonü lah yung de, O Atungpuh I Thrünpuh, I yo Amüsüh Khülang? Nü müshe. O Atungpuh , mahkhapshihpü nünü arü mokhit; tüsho O Lung, nünü thsünüshihpü arü lashih. 13Nü mükbo ju amütsü ngüpü khide tsangkhitlah, tüsho nünü amülim-rhimo kheak mükheahkhuk; tümüde nünü mülapmüji kheak kheahcho le, tüsho mihbukmuyuknü arü kheaknü thiyurolungkirü lakhi muyuchoki zhikde lacho le?
14Nünü mihtsürübo keto ngüh nangde, yakzanshuhrü mülakhi lorilokobo nangde kamshih. 15Arü alala thiririnü khoyangnü wuhkhitchoh; apinü arübo keangnü lakkhitchoh, apinü keang-qiuqiu ching arübo hanmukhungchoh; junangde apinü tode asühachihchoh. 16Jumonü apinü anihbuh yo keang ki laksah-a kingaünchoh tüsho keang-qiuqiu ki api kingaünbo jihchoh; tümüde jurü hode api müthangmüsün ching lachoh, tüsho api tsühyungpü lakhit lah. 17Dale tüsho api keang yeahkeangde mihmüthsüm mülade trükshihbo laksahde alaba shi?
Currently Selected:
HABAKKUK 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
