LEVI 18
18
Müzammüram Rhimobo Zhipdokhi
1Tüsho Atungpuhnü Mosa ki tha, 2Israelrü mihtsürübo ki thaang, I Atungpuh nüsa Thrünpuh. 3Nüsa lapung Ijip ching arünü arhimokhi düyan, tüsho inü nüsa bede arüpung Kanan ching arünü arhimokhi dürhimo. Nüsanü arü yakzan thsükhibo düyan. 4Nüsanü aniang tüsho I yakzan thsükhibo zoang. I Atungpuh nüsa Thrünpuh. 5Nüsanü I yakzan thsükhi tüsho I yuzüngbo zoang; jude athsükhinü nüsa rhangdung labah, I Atungpuh .
6Nüsa shenü she betsührü kheak müzammüram düthsü: I Atungpuh . 7Nü be kheak müzammüramkhi hode nü buh mungchih düngüshih, anihbe ju nü be ah, nünü anihbe mungchih düngüshih. 8Nü buh niube kheak müzammüram düthsü; junü nü buh mungchih ngüshihbah. 9Thüyam khülang chingnü yungsho püpü chingnü zübemusukhi, nü chi yungsho buh buhbuh buh bebe kheak yo chiniurü kheak müzammüram düthsü. 10Nü tsührü tsührübo kheak müzammüram düthsü; tümüde arü mungchih ju nü mungchih ah. 11Nü buh niubenü azübekhi liberü kheak müzammüram düthsü; anihbe she nü chi ah. 12Nünü nü buh chiniurü kheak müzammüram düthsü; anihbe nü buh keoniorü khung ah. 13Nü be chiniurü kheak müzammüram düthsü; tümüde anihbe nü be keoniorü khung ah. 14Nünü nü buh keoniorü niube kheak müzammüram düthsü, anihbe nü keo ah. 15Nü tsühmeakbe kheak müzammüram düthsü. Anihbe nü tsührü niube ah; anihbe lung dünung. 16Nü khiung niube kheak müzammüram düthsü, junü nü khiung mungchih ngübah. 17Berü tüsho tsührü chido kheak müzammüram düthsü, yungsho anihbe tsührü tsührübo kheak müzammüram düthsü; ju anihbe keoniorü khung ah, hoju mütsüdak. 18Nü niube rhangdung la khiungde anihbe azhihde alibe mungchihshihde nünü nü niube niurü düyihlu.
19Aliberü thiyih yüde mümüsühkhi kim ching dünung, tümüde alibe mümüsüh. 20Püpürü niuberü lung düyap; junü nü müneanshihbah. 21Nüsa tsührü sheshe Molek thrünpuh ki monü dükingaün, tümütüsho, junü nüsa Thrünpuh mung ching mungchihbah: I Atungpuh . 22Aliberü kheak nangde nünü athrürü lung düyap; ha athraneanbe ah. 23Athrürü yungsho aliberü shenü she shiwüh kheak müzammüram düthsü: ha adungmihkhi lah.
24Harü rhimokhinü nüsa dümünean, tümüde harü rhimo hode inü nüsa müngüh yankhita bahkhi trükshihbonü arü zangrü müneana lah. 25Hanangde alo müneanabah; tüsho ju neak dünkheak inü thsümüchichoh, tüsho ju ching lakhi mihtsürübo alonü mülüma bah. 26Tüshe Israelrü yungsho nüsa lung larü khiungkerü thsüthsü, nüsanü I yakzan thsükhibo tüsho thiyuzüngbo zoang 27(tümüde lomi ching nüsa müngüh larübonü harü athraneanbe rhimokhi hode alo müneanabah); 28jude yungsho nüsanü ju müneankhi hode nüsa müngüh larü trük mülümkhita bahkhi nangde, alonü nüsa she mülümkhita bahbah. 29Tümüde harü athraneanbe rhimo arü mihtsürü bolungnü khekhita bahbah. 30I yukhümbo aniang tüsho nüsa müngüh larü mihtsürü rhimobo düyan, tüsho harü athraneanbebo rhimokhinü nüsa dümünean. I Atungpuh nüsa Thrünpuh.
Currently Selected:
LEVI 18: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
