LEVI 17
17
Thiyih Mütsühpü Zhipdokhi
1 Atungpuhnü Mosa ki tha, 2Aron le atsührübo, tüsho Israel mihtsürü alala ki thaang, Ha Atungpuhnü thiyukhüm jihkhi ah. 3Israelrü bolung ching mihtsürü khürünü moshipung yungsho namfimihnunu yungsho mihnu binkheampung ching yungsho aleanglimnü laksahbah, 4ju ashorupung khimyam ripit ki Atungpuh kilim thsambah thsüde handarünü müjihsho thiyih ju buh mihtsürü kheak labah; apinü thiyih bukdo; tüsho mihtsürü ju Thrünpuh mihtsürü bolungnü khekhita bahbah. 5Ha yukhüm amütsan ju Israel mihtsürünü shiwüh thulu ching laksahkhi Atungpuh kilim handarübah. Arünü ashorupung khimyam ripit ki amükeambuh kilim jihbah tüsho mungtsü kingaün jihbah. 6Amükeambuhnü thiyih ju ashorupung khimyam ching kingaünpung yean mühide arhakkihbah tüsho amüdang taka arhümthüneashihde Atungpuh asühshihbah. 7Junangde arünü müzammüramkhi arimri ki laksah-a mükingaün. Ha arü lün lün ching arü thsungkheaknü kamruhroro yakzan thsükhi labah.
8Tüsho nünü arü ki thaang: Israelrü yungsho nüsa lung lakhi khiungkerünü taka kingaünkhi yungsho püpü shuhmülanga jihkhibo, 9ashorupung khimyam ripit ki Atungpuh ki shuhmülanga jihpü hande marüsho, ju mihtsürü Thrünpuh mihtsürü bolungnü khekhita bahbah.
10Israelrü khürü yungsho nüsa bolung larü khiungkerü shepünü thiyih tsühbanü, Atungpuhnü api azhihde bukakhiukbah tüsho api nihbuh mihtsürü bolungnü khekhita bahbah. 11Tümüde shih ju thiyih ching lah; tüsho kingaün sadam kheak nüsa rhangdung dünthsükhipü inü nüsa kilim jihdo; tümüde thiyihnü nüsa rhangdung thsungkheak dünthsükhichoh. 12Jumonü Atungpuhnü Israel yungsho arü bolung lakhi khiungkerübo thsüthsü thiyih zahkhi shiwüh mütsühpü thakheah.
13Israelrü yungsho arü lung lakhi khiungkerü shepünü shih yande shiwüh yungsho wuhnu laksahbanü, apinü athiyih alo ching buka bahbah asungthulungnü yihdoabahbeah. 14Tümüde rhangdung lakhi shiwüh alala thiyih ching lah, jumonü inü Israel mihtsürü ki tha: Nüsanü tümü shih thiyih she dütsüh, tümüde rhangdung lakhi shih alala thiyih ah. Shepünü atsühbanü khekhita bahbah.
15Mihtsürü khürü, Israel yungsho khiungkerü thsüthsü akeangnü ashekhi shiwüh yungsho mütüm shiwühnü anguhsahkhi shih shepünü atsühbanü akhimmih müsühbeah, kemüyihbeah tüsho api arelim khiungde mümüsühkhi labah, tüsho api amüsüh kambah. 16Tüshe apinü khimmih mümüsüh yungsho kemümüyihsho, ju neak apinü ahanbah.
Currently Selected:
LEVI 17: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
