JEREMIA 9
9
1O I ku ha kenü müthsüde,
tüsho I mükbo ha chike bukpung müthsüde,
junangde inü animung tüsho are amuzhobe I mihtsürü laksahkhi thsungkheak tripbah!
2O loshelo ching I lapung lakhülaa inü I mihtsürübo bahjihbah tüsho arü kheaknü tsoabahbah!
Tümüde arü alala müzammüramrü,
mülapyukrü boto lah.
3Arünü akeangyu thsungkheak arü mulobo sanglüh nangde hünchoh;
arübo lomi ching thiyuro thsungkheak amürangrü yung;
tümüde arünü amütsü chingnü amütsü ching yüdo,
tüsho arünü I mümükheah,
Atungpuhnü thachoh.
4Nü yamhingrübo dünkheak rhüngrhüngang,
tüsho nü keoniorü she kheak she akin düla;
tümüde nü keoniorü alala mülapmüjirü,
tüsho nü yamhingrü abannü achikhirü nangde lah.
5Arü alalanü arü yamhingrü mülapyukchoh,
tüsho shenü she thiyuro masuk;
arünü akeangyu thapü arü mulobo ki thsangyudo;
arünü amülim yihbeakdo tüsho neak yihbeakkhinü keaka lah.
6Junokhi kheak junokhi,
mülapmüji kheak mülapmüji!
Arünü I mükheahpü thsunglochoh, Atungpuhnü thachoh.
7Jumonü Wuto Atungpuhnü ha thachoh:
Inü kheakü arü tsangkhitbah tüsho rükakibah,
tümüde I mihtsürü neak dünkheak inü tümü thsükhukba?
8Arü mulo ju ashebe hühzo lah;
mün hode akeangyu asukchoh.
Arü alalanü arü yamhingrü ki tsüyihkhi yubo asukchoh,
tüshe mulong ching a jimchoh.
9Hadürü thsungkheaknü inü arü müthsümüchiba de?
Atungpuhnü thachoh;
tüsho hadürü dünkheak inü trükshih kheak royimkhi hande marüba de?
10Awungbo thsungkheak trippü tankihang tüsho tüzhoang,
tüsho sunglo rim thsungkheak lungriang,
tümütüsho arübo thsümünima yaplah, junangde shenü mütsahho,
tüsho moshi khungkhi muso;
thüning wuhnubo tüsho shiwühbo chidonü alapde tsoabahdo.
11Inü Jirusalem athsümünimkhi mujung,
shirung lapungbo kamshihbah;
tüsho inü Juda kiutobo she mülade zhikrangkhündo akamshihbah.
12Ha anikhitpü shepü lümlung khiukde la? Apinü akhipkhitshihpü thsüde shepü ki Atungpuh münnü asukkhea? Shenü mütsahhopü thsüde, sunglo nangde tümüde alomi thsümünima yapla? 13Tüsho Atungpuhnü thachoh: Tümütüsho arünü arü miki zojihkhi I yakzan bahyukdo, tüsho I yu mani, yungsho ju yande mütsah, 14tüshe arü jipürünü arü ki thsangyukhi nangde nihnihde arü nihbuh mulong yan tüsho Baalbo dunglim yü. 15Jumonü Wuto Atungpuh , Israel Thrünpuhnü ha thachoh: Inü ha mihtsürü akhüh sangrung kipbah tüsho müzüm ke duhbah. 16Inü arübo arü yungsho arü jipürübonü mümükheahkhi trükshih bolung müzütshihbah; tüsho inü arü muyuamübahyi khiungde, nukshang khülang arü dunglim yüshihbah.
Jirusalemnü Arung thsungkheak Zhikhi
17Wuto Atungpuhnü ha thachoh:
Lümakheahang, tüsho mitriprü liberübo arüpü jiang;
mitripsorü liberübo arüpü thiyiang;
18arünü nahde isa kurungkheak mitrip-khün thsüshang,
junangde isa mükbo ching chike bukbah,
tüsho isa mükküpbo ching ke bukbah.
19Tümüde mitripkhi düsheak Zion ching sochoh:
“ Küde isa thsümünima la!
Isa abümnü achihdo,
tümütüsho isanü lomi bahjihdo,
tümütüsho arünü isa lapung keamshihdo.”
20O aliberübo, Atungpuh yu aniang,
tüsho nüsa nükhünnü api mün yu leangkhishang;
nüsa tsührübebo ki mitrip-khün thsüpü,
tüsho mihbüm abannü nüsa yamhingrü ki atüzhopü thsangyuang.
21Mihshe isa ayinripitbo chingnü azahdo,
ha isa kiulongthsürü-yambo ching azahdo,
kiudunglimrobo chingnü azürübo laksah
tüsho wungdobo chingnü athunurübo laksah.
22Asukang! Atungpuhnü ha thachoh:
Mükeak ching bahyakkhi nangde,
yimlurü dunglim hi bahkhi nangde,
mihtsürü ashemibo keambah tüsho shenü arü mühanmukhung.
23 Atungpuhnü ha thachoh: Lümlung larü arü lümlung ching dükükheangshih, sühmüh larü arü sühmüh ching dükükheangshih, alarü arü lakhit ching dükükheangshih; 24tüshe arünü I Atungpuh de anikhitkhi tüsho mükheahkhi ching kükheangshang; inü muzhodakde, thiyuro tüsho alomi ching thiyurolungkinü rhimochoh, tümüde hadürü ching inü asühlah, Atungpuhnü thachoh.
25 Atungpuhnü thachoh, küp lang tsütabahrü alala inü athsümüchipü nimung tsükjide arado: 26Ijip, Juda, Edom, Amon, Moab, tüsho limshu loshelo ching larü alala. Tümüde ha trükshih alala tsütamübah, tüsho Israel yamkhün alala mulong ching tsütamübah.
Currently Selected:
JEREMIA 9: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
