JEREMIA 10
10
Sangthsü tüsho Thiyuro Kingaün
1 Atungpuhnü nü ki asukkhi yu aniang, O Israel yamkhün. 2Atungpuhnü ha thachoh:
Trükshihbo limro dümükheah,
yungsho thüning ching amütsanbonü dümüyinsah;
tümüde trükshihbo arü kheahbah müyinsah-a lah.
3Tümütüsho mihtsürü jipü-yakli amülimkhi lah:
murung ching sangdung khülang kiushakdo,
tüsho sangrhimosorü khahnü awü shuhbah rhimodo;
4mihtsürübonü ju kheak shotoyinchi
tüsho sunanü züt thsüchoh;
arünü yümlung tüsho yümru-yinchinü yümkihchoh,
junangde ju maphap.
5Arü sangthsübo ju liuheak lu ching wuhnu-dütrütbe nangde lah,
tüsho arünü masukachihkhuk;
arübo ahanbeah,
tümüde arünü mütsahkhuk.
Arü ki dütre,
tümüde amütsü müthsükhuk,
yungsho arü kheak atsü thsüpü müla.
6Nü nangde she müla, O Atungpuh ;
nü ato ah, tüsho wu-sühmüh ching nü mung tolah.
7Shenü nü mütrepü, O trükshihbo kiulongthsüpuh?
Tümüde hoju nü khuh lah;
trükshihbo lümlung larü alala bolung tüsho arü kiulongthsübo alala ching sheshe nü nangde müla.
8Arü chido keakeashahshah-a tüsho makhaa lah;
mümokhi sangthsübo kheaknü arünü tümü anikhitpü?
9Akingkhi shotoyinchi Tarshish chingnü handarü,
tüsho Uphaz chingnü suna handarü.
Arübo ju sangrhimosorünü rhimokhi
tüsho sunakingrü khahnü arhimokhi;
arü khimmih ju biyi tüsho mürümmuchu;
arü alala ayeanzo rhimorünü arhimokhitkhi lah.
10Tüshe Atungpuh ju thiyuro Thrünpuh;
api arhang Thrünpuh akheam mülakhi kiulongthsüpuh.
Api bukakhiukkhinü alomi ajanchoh,
tüsho trükshihbonü api bukakhiukkhi marümkhuk.
11Nünü arü ki ha thaang: Thüningbo tüsho alomi müthrünkhi thrünpuhbo alomi chingnü tüsho thüningbo khüpnü adükheakbah.
Atungpuh Mungshi Khün
12Api wu-sühmüh hode alomi thrünkhi ju api ah,
shepünü api lümlung hode alomi thrünkhit,
tüsho api anikhitkhi hode thüningbo thoshang.
13Küyimki api düsheak alankhea,
thüningbo ching ke arung tüsho apinü alomi akheam chingnü amo yükihshihchoh.
Apinü tsüng thsungkheak chinchobe phürapshihchoh,
tüsho apinü zowupung chingnü apung bekhitchoh.
14Mihbüm aban keakeashahshahlah tüsho mükheahmudu müla;
sunakingrübo alala arü sangthsübonü achih ngüshih;
tümüde arü sangthsübo akeangyu tüsho arü kheak sheak müla.
15Arübo müthülün, alakmihkhi rhimo lah;
arü thsümüchichoki arübo dükheakbah.
16Jakob Thrünpuh a harü ruk yung,
tümüde nü kukruk alala thrünkhi ju api lah,
tüsho Israel ju api yamrüplurüp trük ah;
Wuto Atungpuh ju api mung lah.
Ramtso Yüpü
17Alo chingnü nüsa kukruk lumukhungang, O nüsa ayandokhi khüp larübo! 18Tümüde Atungpuhnü ha thachoh: Ha kim ching inü lomi mihtsürübo lahkhita bahpü thsülah, tüsho inü arü kheak thsümütsü handarübah; junangde arünü angübah.
19I yurikhi dünkheaknü I ayokhe!
I mü mütsüdak.
Tüshe inü tha, “Tsükjide ha I thsümüchi lah,
tüsho inü arümbeah.”
20I khimyam thsümünimdo tüsho I liubo alala zhakdo;
I tsührübo I kheaknü tsodo tüsho arü kheaküa müla;
I khimyam thsülopü she müla tüsho khimbo zhindorü müla;
21Tümüde namfimihnu neakrübo makhalah tüsho Atungpuh müyim;
jumonü arü mümüngüh tüsho arü mihnu alala hiumüzüta lah.
22Kheahang, düsheak khülang,
alankhi ato khülang dukulim lomi chingnü,
Juda kiutobo zhikrangkhündo shirung lapung kamshihpü arüa lah.
23Inü mükheahlah, O Atungpuh ,
mihtsürübo limro arü danyukkhi ching müla,
mihtsürübonü atsahkhi ching arünü jing düküpü khuhlanga muhuhkhuk.
24I thsülangang, O Atungpuh , tüshe thiyuro akekhi chingnü;
nü bukakhiukkhi ching yung,
jude yungsho nünü I akeangkeang kamshihbah.
25Nü mümükheahkhi trükshihbo tüsho nü mung müjikhi mihtsürübo kheak nü bukakhiukkhi dungkihang;
tümüde arünü Jakob muyuabahdo;
arünü api shahde muyuabah tüsho api lapung thsümünimjih.
Currently Selected:
JEREMIA 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
