JEREMIA 7
7
Jeremianü Arüngyam ching Thsangyuthsangrakhi
1Ha yu Atungpuh kilimnü Jeremia kilim arü: 2Atungpuh yam chipiripit kheak zhipang, tüsho ju ching ha yu zhiyukjang, tüsho thaang, Nüsa Juda mihtsürübo, nüsa Atungpuh kingaünpü ha chipiripitbo ching yüzahrübo Atungpuh yu aniang. 3Wuto Atungpuh Israel Thrünpuhnü ha thachoh: Nüsa limrobo tüsho nüsa rhimobo thsülangang, tüsho ha dangpung ching I nüsa lung laanü. 4Harü mülapyukbe yubo ching dükin: “Ha Atungpuh arüngyam, Atungpuh arüngyam, Atungpuh arüngyam.”
5Tümüde nüsanü atsütsünü nüsa limro tüsho rhimobo thsülangsho, nüsanü khülangnü khülang ki thiyuronü rhimosho, 6nüsanü khiungkerü, mürerü, tüsho khimoberü mujunosho, yungsho ha dangpung ching amülim mülarü thiyih mubukshihsho, tüsho nüsa nihbuh yuride püpürü thrünpuhbo kilim müyüsho, 7jude thsüsho ha dangpung inü nüsa jipürü kilim lünnü lün jihkhi lomi ching I nüsa lung labah.
8Kheahang nüsanü alü mülakhi akeangyubo ching kinchoh. 9Nüsanü ahühba de, alaksahba de, müzammüramba de, akeangyu thade thiyuchihchimba de, Baal kilim kingaünba de, tüsho nüsanü mümükheahkhi thrünpuhbo kilim yüba de, 10tüsho arübah ha yam ching I miki zhipba de, küpü I mungnü ji, tüsho harü athraneanbe lang arhimopü isa ki jihdo de athabea de? 11Ha yam, I mungnü tamde ajikhi nüsa mük ki jangkhijangrarü jikpung kamdü de? Nüsanü mükheahlah, inü she kheahde lah, Atungpuhnü thachoh. 12Kheakü Shilo ching lakhi I lapung ching yüang, küpü ching akhuhde I mung lakhea, ju ching I mihtsürü Israel mihbukmuyuk thsungkheak tümü rhimoa lanü kheahang. 13Tüsho kheakü, nüsanü harü alala rhimokhinü, Atungpuhnü thachoh, tüsho küyimki inü nüsa ki alochode asukkhea, nüsanü mani, tüsho küyimki inü nüsa jikhea, nüsanü malo, 14jumonü I mung tamde ajikhi yam, küpü ching nüsanü kincho, tüsho inü nüsa le nüsa jipürü kilim jihkhi dangpung kheak, inü Shilo ching rhimokhi nangde arhimobah. 15Tüsho inü nüsa keoniorü yankhitkhi nangde Ephraim münü alala, nüsa I mikinü yankhita bahbah.
Mihtsürünü Mihyumanikhi
16Nünü harü mihtsürü thsungkheak dütamkhüntamnüjih, arü thsung thsüde düzhi yungsho dütamkhüntamnü, tüsho I ki dümushu, tümüde inü nü ki mani. 17Arünü Juda kiutobo tüsho Jirusalem kiudunglimrobo ching tümü rhimochonü nünü müngü de? 18Azürübonü sang momukhungchoh, buhrübonü mo takkihchoh, tüsho yinmi kiulongthsübe thsungkheak yikhap thsüpü azoberübonü ayikangkang neamchoh; tüsho arünü I bukakhiukshihde, püpürü thrünpuhbo kilim ayungbe kingaün dunga bahchoh. 19Atungpuhnü thachoh, Arünü I bukakhiukshihcho de? Arü küdah thsüde arü achih handarüchoh yung de? 20Jumonü Atungpuh Thrünpuhnü ha thachoh: I bukakhiukkhi tüsho I mulong zhipzhip ha dangpung kheak mihtsürü tüsho shiwühbo kheak, thulu sangdungbo tüsho alo sangasobo kheak dungkihbah, ha atakbah tüsho müzünmüt.
21Wuto Atungpuh , Israel Thrünpuhnü ha thachoh: Nüsanü shuhmülanga jihkhi ching taka kingaünkhibo yukajakang, tüsho ashihtsü tsühang. 22Tümüde inü nüsa jipürü Ijip lomi chingnü bekhit nimung taka kingaünkhi tüsho shuhmülanga kingaünkhi dünkheak inü arü ki masuk. 23Tüshe ha yukhüm inü arü ki jihkheah, “ I düsheak aniang, tüsho I nüsa Thrünpuh thsübah, tüsho nüsa I mihtsürü thsübah; tüsho inü nüsa ki thiyukhüm jihkhi limro ching lang tsahang, junangde nüsa tsüde alabah.” 24Tütüshe arünü mihyu mani yungsho arü nükhün mumupho, tüshe arü amütsü lümkhi ching nihnihde, arü nihbuh lümrükbo ching tsah, tüsho mikhuhlim yungde dunglim peang tsah. 25Nüsa jipürü Ijip lomi chingnü bekhit nimungnü khihni khiungde, inü I yamlarübo wukihrü alala, nimung abande, alochode arü kilim yüshih; 26tütüshe arünü I ki mani yungsho manguh, tüshe arü hungbo chungthülangde la. Arünü arü jipürü kheaknü amütsübe rhimodo.
27Junangde nünü ha yubo alala arü ki asukbah, tüshe arünü nü ki manijih. Nünü arü ki jibah, tüshe arünü nü ki malojih. 28Nünü arü ki thabah: Ha Atungpuh arü Thrünpuh yu manikhi trükshih tüsho yakli danyukkhi müleangkhi; thiyuro dükheakdo; ha arünü müthadebah.
Hinnom Jindükhün ching Neak Rhimokhi
29Nüsa ku hüta bahang;
awungbo kheak tüzhoang,
tümüde api bukakhiukshihkhi lün Atungpuhnü bahyukdo tüsho mihabahdo.
30Tümüde Juda mihtsürübonü I miki amütsü rhimodo, Atungpuhnü thachoh; I mung tamkhi yam müneanjihde, arünü athraneanbe zodo. 31Tüsho arünü Hinnom Tsührü Jindükhün ching Topheth de alakhi achang dangpungbo arü tsührübo mo ching takpü thsüchoh–küpü inü arü ki thiyukhüm müjihkhea, yungsho I lüm ching marükhi la. 32Jumonü, Atungpuhnü thachoh, Topheth de müjipü, yungsho Hinnom Tsührü Jindükhün de müjipü nimung tsükjide arado, tüshe Mihkhuk Jindükhün labah: tümüde khiungshak mülayi khiungde ju ching arü kiuyuka bahbah. 33Ha mihtsürü mibo ju thüning wuhnubo tüsho alomi shiwüh jim thsübah; tüsho shenü arü müzüna mutsoshih. 34Tüsho inü asühachih tüsho asühara düsheak, yamkhün kamkhi thünio düsheak, Juda kiutobo tüsho Jirusalem kiudunglimrobo ching akheam thsüshihbah; tümüde alo thsümünimbah.
Currently Selected:
JEREMIA 7: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
