JEREMIA 6
6
Thiriribonü Jirusalem Zündo
1O Benjamin tsührübo, atsokhitpü Jirusalem chingnü tsoang! Tekoa ching hulipungpung khungang, tüsho Beth-hakkerem ching amütsan mo khühang; tümüde dukulimnü thsümütsü tüsho athsümünim ato arado. 2Zion kiuto akheahakhamlah, tüshe athsümünimbah. 3Namfimihnu neakrübo lung arü mihnu boto bebah anihbe azhihde arübah. Arünü anihbe mükamde arü khimyambo thsübah; arü abannü nihbuh dangpungbo ching motsühmoyungbah. 4“Anihbe bede thirithsüpü thsakhamang, asürang, tüsho isanü animuro yananü!” “ Isa are, tümüde nimung hochoh, kerimkih hungshangchoh!” 5“Thsakhamang, tüsho isanü azhing ching yananü, tüsho anihbe lapungbo thsümünimanü!”
6Tümüde Wuto Atungpuhnü ha thachoh: Anihbe sangdungbo kiushakang; Jirusalem azhihde ayanpü tankihang. Ha athsümüchipü lakhi kiuto lah; ju ching tümü müla tüshe anihbe kheak junokhi lah. 7Kekhipnü ke bukkhitkhi nangde, anihbenü mihbukmuyuk bukkhitchoh; thiyih bukkhi tüsho athsümünim anihbe kheaknü sochoh; tukthsü tüsho mübo I miki judü lang lah. 8Kurhangang, O Jirusalem, jude yungsho I nü kheaknü atsobah, tüsho nü ju azhikkhi, mihtsürü mülapung lomi kamshihbah.
Azhihrü Israel
9Wuto Atungpuhnü thachoh: Kurungaso mokhi nangde aningkhi Israel momütsanang; kurungaso rhorü nangde, adüchibo kheak nü khah phüthoang.
10She kheak inü asukba tüsho düh de athaba, junangde arünü asoba? Kheahang, arü nükhünbo müyeahshung, arünü manikhuk. Atungpuh yu ju arü ki münedung lah; arünü ju ching asühako müla. 11Tüshe I a Atungpuh bukakhiukkhinü milah; inü ju marümkhuk. Ju kiudunglimro azürübo kheak dungkihang, tüsho athunurü mukhungkhi kheak she; niube niubuh tüsho shinbe shinbuh chido lude atsobah. 12Arü yambo, arü lubo tüsho niuberü rukhühnü püpürü kilim jihbah; tümüde lomi ching larü kheak azhihde I khah chungbah, Atungpuhnü thachoh. 13Tümüde anikhühnü atobe khiungde, thiyuro mülakhi alü thsüpü bukmükhütlah; tüsho wukihrünü amükeamrü khiungde, alalanü mülimde rhimochoh. 14Arünü I mihtsürü mü anükhüh lang ngushihdo, ju ching mungtsü mülalaa, “Mungtsü, mungtsü,” de tha. 15Arünü machihde rhimodo, arünü athraneanbe yihbeakdo; tütüshe arünü machih, arünü achihpüyak mümükheah. Jumonü sherübo angakchonü ju lung arü angakbah. Inü arü thsümüchichoki, arü akeamkhamshihbah, Atungpuhnü thachoh.
Israelnü Thrünpuh Limro Bahyuk
16 Atungpuhnü ha thachoh: Limbeakbo kheak zhipang tüsho kheahang, tüsho jipü limrobo keoang, küching limro atsü la; tüsho ju ching tsahang, tüsho nüsa mebo thsungkheak sühakhim ngüang. Tüshe arünü tha, “ Isanü ju ching mütsah.” 17Kheaküshe inü nüsa thsungkheak aheangrübo zojihlah: “Hulipungpung düsheak aniang!” Tüshe arünü tha, “ Isanü mani.”
18Jumonü aniang, O trükshihbo, tüsho O amukhungrübo, arü kheak tümü dünjipü lanü mükheahang. 19Aniang, O alomi; inü arü lümkhi aso asokhi ha mihtsürübo kheak thsümütsü handarüpü lah, tümütüsho arünü I yu mani; tüsho arünü I yakzan bahyukdo. 20Sheba chingnü jinjinlak arükhi yungsho limshu lomi ching niungyidung I ki tümü yihnüpü la? Nüsanü taka kingaünkhibo müleangkhi, yungsho nüsanü shuhmülanga jihkhibonü I asühbe yung. 21Jumonü Atungpuhnü ha thachoh: Kheahang, inü ha mihtsürü miki arü jing mükheshihpü jingmükhelung zojihchoh; berübuhrü tüsho tsührübo rukhühnü, yamhingrü tüsho müyamrü dükheakbah.
Dukulimnü Yandakikhi
22 Atungpuhnü ha thachoh: Kheahang, dukulim lomi chingnü mihtsürü arado, trükshih ato khülang limshu lakhi lomi ching thuruchoh. 23Arünü sanglüh tüsho thsüh thrüa luchoh, arü bukmüke tüsho mihmüthsüm müla, arü düsheak ju keto ahukkhi nangde lah; arübo khorabo kheak binlah, thirithsürü nangde nüsa azhihde züt thsülah, O Zion tsührübe!
24“ Isanü arü yusheak sodo, isa khahbo keahkhia lah; thsünükhinü aliberü zübechoki thsünükhi nangde isa tholoa lah. 25Thulu ching düyü, yungsho limro kheak dütsah; tümüde thiririnü nukshang shuhlah, athrip abande atrebe lah.”
26O amuzhobe I mihtsürü, shungliukhim phuyuang, tüsho awah ching kolahang; tsührü khülang thsungkheak nangde khide khühde tüzhoang: tümüde athsümünimrü zukleangnü isa kheak arübah. 27Inü nü I mihtsürübo thsungkheaknü qiuakheahbe tüsho atsangkhitbe kamshihdo, junangde nünü arü limro mükheahbah tüsho tsahakheahbah. 28Arü alala nihnihrara azhihrü, chikhide atsahrü, arübo müwayinchi tüsho yinchi, arü alalanü thsünimthsüshide rhimochoh. 29Moyünbe müshakde yünchoh, yinchikhihbo monü aniuabahchoh, tümüde mihbukmuyukbo yihkhita mübah. 30Arübo “Abahyukkhi shotoyinchi” de jichoh, tümüde Atungpuhnü arü bahyukdo.
Currently Selected:
JEREMIA 6: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
