JEREMIA 4
4
Mulong Rholopü Jikhi
1Nüsanü rholosho, O Israel Atungpuhnü thachoh, nüsanü I kilim rholosho, nüsanü athraneanbe I mikinü yihkhita bahsho, tüsho tsahphülapde müyüsho, 2tüsho nüsanü, “Atungpuh lale!” de thiyuro ching, jakmükheahkhi ching, alungki chingnü thiyuchihchimsho, apinü trükshihbo müngühjihbah, tüsho api lung arü müretahbah.
3Tümüde Atungpuhnü Juda mihtsürü tüsho Jirusalem ching larü ki ha thachoh: Müphünkhi nüsa lo kiuang, tüsho ayangrung ching dühiu. 4Atungpuh kilim nüsa küdah thsüde tsütabahang, nüsa mulong küp muhiukhita bahang, O Juda mihtsürü tüsho Jirusalem ching larübo, yungsho I bukakhiukkhi mo nangde ayübah, tüsho shenü she nüsanü amütsü rhimokhi dünkheaknü müzünmütkhukde atakbah.
Juda Müzünkhi
5Juda ching thakhiang, tüsho Jirusalem ching zhiyukang tüsho thaang.
Lomi alala ching hulipungpung mütang;
achangnü ahoang tüsho thaang,
“ Rukhüh mukhungang, tüsho isanü chipi ayünkhi kiutobo ching yüzahanü!”
6Zion limpeang riphin shuhkihang,
tsoyukpung yimang, dashu,
tümüde inü dukulimnü amütsü tüsho athsümünim ato handarado.
7Kekhüzü khülang ajikpung achak chingnü wukhiukdo,
trükshih thsümünimrü tsahmusudo;
api nihbuh lapung chingnü nü lo thsümünimpü wukhiukdo;
nüsa kiutobo sheshe mülade athsümünimbah.
8Ha dünkheaknü shungliukhim phuyuang,
tüzhoang tüsho tripang:
“Atungpuh bukakhiukkhi isa kheaknü rholode mutso.”
9 Atungpuhnü thachoh, ju nimung kiulongthsürü tüsho atorübo mulong ninide akambah; amükeamrübo müyinnimbah tüsho wukihrübo müyinsahbah. 10Judüki inü tha, “Ah, Atungpuh T H RÜ NPU H , küde nünü shahde ha mihtsürü tüsho Jirusalem mulomülapde athakhea, ‘ Nukshang nü hung kheak lalashe nü mungtsü labah!’ ”
11Ju kim ching ha mihtsürü tüsho Jirusalem ki thabah: Loshelo ching awung mujukbo chingnü apung atak I mihtsürü kilim arüchoh, ayünpü yungsho amüsühpü lang yung– 12khide amüküp pung I kilimnü arükhi khülang lah. Kheakü arü azhihde inü mahkhapbah.
13Kheahang! Api amobo nangde akihchoh, api khora-lolungbe chitmühean nangde; api khorabo müleang kheaknü athribe–isa are, tümüde isa thsümünima lah!
14O Jirusalem, mihbukmuyuk chingnü mulong müsühang, junangde nü khümkhitbah. Nü lümkhi amütsü külokhüh nü kheak laba?
15Tümüde Dan chingnü düsheak khülang thachoh tüsho Ephraim wung chingnü thsümütsü zhiyukchoh. 16Trükshihbo ki thaang, “Ha ching arü lah!” Jirusalem azhihde zhiyukang, “ Limshu lomi chingnü thiriri arüchoh; arünü Juda kiutobo azhihde ahochoh. 17Arübo thulu aheangrü nangde zündolah, tümütüsho anihbenü I azhihdo, Atungpuhnü thachoh.
18“ Nü limrobo tüsho nü rhimobonü ha nü kheak handarüdo. Ha nü neak hode thsümütsü lah; ha küdükhüh akhüh! Hanü nü mulong khiungdo.”
19I thsünükhi, I thsünükhi! I thsünü ching kolahchoh!
O, I mulong thsünükhi!
I mulong thüpthüpchoh; inü zhikde mülakhuk;
tümüde inü hulipungpung düsheak thirithsüpü arhunganimkhi sochoh.
20Thsümütsünü thsümütsü yankihchoh,
lomi abümnü thsümünima yaplah.
Zukleangnü I khimyambo,
khülang kinü zhindokhimbo thsümünima lah.
21Külokhüh inü keochihkhi ngüba tüsho hulipungpung düsheak soba?
22“Tümüde I mihtsürübo makhaa lah,
arünü I mümükheah;
arü azhazha tsührübo ah,
arü anikhitkhi müla.
Amütsü rhimopü ching arü yuklah, tüshe atsü rhimopü mümükheah.”
Athsümünim Arüpü Lakhi Jeremia Michih
23Inü alomi kheak kheah, tüsho kheahang,
ha thsümünima tüsho akeangkeang lah;
tüsho yinmi lim kheah, tüsho ayin müla.
24Inü awungbo kheak kheah tüsho kheahang, arübo ajande alakheah,
tüsho wungduduhbo alala yüla-arüla de niuk.
25Inü kheah, tüsho kheahang, ju ching shahjungde she mülakheah,
tüsho thüning wuhnubo alala phinde tso.
26Inü kheah, tüsho kheahang, Atungpuh bukakhiukkhinü amüdang lo ju loshelo kamabah tüsho kiuto alala thsümünimabah.
27Tümüde Atungpuhnü ha thachoh: Lomi abümnü zhikrangkhündo alabah; tütüshe inü akheam tsütsü mükamshih.
28Ha dünkheaknü alominü mitripbah tüsho dukulim thüningbo mitingdo akambah;
tümüde inü asukdo, inü lümkhi thsüdo;
inü mulong mümüthri yungsho inü murholo.
29Khoraberü tüsho sanglüh-kiprü düsheaknü kiuto alala tsochoh;
arü rimchak ching yüzahchoh; arübo lunghü kheak künchoh;
kiuto alala bahyukdo tüsho jurü ching she müla.
30Tüsho nü, O zhikrangkhündo alakhi,
nü neakrümde ayihkhi amütsan tümü a,
ju ruk nünü suna lakbonü züt thsücho,
nü mükbo mujua toshihcho?
Akeangkeang ching nü züt thsüchoh,
nü muzhorübonü nü mükhemürangchoh;
arünü nü rhangdung yimchoh.
31Tümüde azoberü thsünüchoki nangde azhikhi khülang inü sodo,
anihbe tsührü atuzuk zübechoki nangde,
Zion azhikhinü sheak dükipchoh,
anihbe khah chungkihchoh,
“ I ayokhe! I mihkhukrü miki sheshihchoh!”
Currently Selected:
JEREMIA 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
