JEREMIA 3
3
Thiyuro-mülakhi Israel
1Athrürü khülangnü aniube bahbah api kinü tsosho tüsho püpürü thrürü niuberü kamsho, apinü alibe kilim yüloba de? Hadürü lo ju tode mümüneanba de? Nünü müyamrü ahihdo kheak müzammüramdo; tüsho nü I kilim arüloba de? Atungpuhnü thachoh. 2Awung mujukbo kheak abina kheahang! Küching nü müyapkhi la? Loshelo ching Arabrünü ajimkhi nangde limro mungyean nünü muzhoachihrü aleangkheah. Nü müzammüram tüsho mihbukmuyuknü lomi müneanjih. 3Jumonü müngühmühi tsüngbo tholoabah, tüsho mükhean tsüngbo marü; nü a müzammüramrü miro ah, nünü machih.
4Nünü kheakü, “Abuh, nü a I athunu müyambuh de I ki müji de, 5lünnü nü bukakhiukba de, akheam khiungde nü mulong zhipzhipba de?” Hanangde nünü asuk, tüshe akukkhi thülün nünü amütsü alala rhimodo.
Israel tüsho Juda Mulong Müthripü
6Kiulongthsüpuh Josia nimungbo ching Atungpuhnü I ki tha: Anihbenü arhimokhi nünü ngünah, akin mülakhi khülang, Israel, künangde anihbenü awung aban yükihkhea tüsho sangdung phüyak aban khüp müzammüram rhimokhea? 7Tüsho inü lüm, “Ha alala rhimoshu alibenü I kilim alodarübah”; tüshe alibenü malodarü, tüsho dükde mülakhi anihbe achi Judanü ju ngü. 8Akin mülakhi, Israel, müzammüramkhi hode abahkhi yukhüm jihbah alibe inü atsoshihkhi anihbenü ngü; tütüshe dükde mülakhi anihbe achi Judanü mütre, tüshe anihbe she yü tüsho müzammüram rhimo. 9Tümütüsho alibenü anihbe müzammüram machihde rhimo, alibenü alo müneanjih, lung tüsho sangdung kheak müzammüram thsü. 10Tütüshe dükde mülakhi anihbe achi Judanü mulong athrünkhinü I kilim malodarü, tüshe rüklimnü lang ah, Atungpuhnü thachoh.
11Judüki Atungpuhnü I ki tha: Akin mülakhi Israelnü dükde mülakhi anihbe achi Juda kheaknü mülimkhi nükde huhdo. 12Yüang, tüsho ha yubo dukulim peang zhiyukjang, tüsho thaang: Rholoang, akin mülakhi Israel, Atungpuhnü thachoh; inü nü kheak bukakhiukde mükheah, tümüde I mihmüthsüm lah, Atungpuhnü thachoh; inü lünnü bukakhiukdü lang müla. 13Nünü Atungpuh nü Thrünpuh azhihkhi mütsande mükheahshang, tüsho nü muzho jaksorü bolung sangdung phüyak aban khüp hiumüzütkhi, tüsho I yu manikhi alokhiang, Atungpuhnü thachoh.
14Rholoang, O akin mülakhi tsührü, Atungpuhnü thachoh, tümüde I nü putungrü lah; inü nüsa, khülang kiuto chingnü tüsho mahne yamkhün chingnü bea lubah, tüsho inü nüsa Zion lim bedarübah. 15Inü I yu anirü nü kilim namfimihnu neakrü jihbah, tüsho arünü mükheahmudu tüsho anikhitkhi hode yakzan shuhbah. 16Tüsho küyimki nüsa lomi ching wüh bubanü, Atungpuhnü thachoh, arünü kheaküa mütha, “Atungpuh tangzüng sangdan.” Ju lüm ching marü, yungsho mülümkhit, yungsho müthsülo. 17Ju kim ching Jirusalem ju Atungpuh kiulongthsü-binkiu de ajibah, tüsho trükshih alala Jirusalem ching Atungpuh miki mukhungbah, tüsho kheaküa arünü mulong müküpde nihbuh amütsü lümkhi ching müyan. 18Judüki Juda yamkhünnü Israel yamkhün lung arihbah, tüsho arü rukhühnü inü nüsa jipürü kilim yamrüplurüp jihkhi lo lim dukulim lomi chingnü arübah.
Sangthsü Kingaünkhi
19I tsührü bolung küde thsah nü zojihpü;
tüsho alo atsü, trükshih alala yo akheahakham yamrüplurüp küde ajihpü de inü tha.
Tüsho nünü I ki, abuh de ajibah tüsho I kilimnü rholode mutso de inü tha.
20Tüshe akin mülakhi niuberünü ayamkhünbuh bahbah atsokhi nangde,
nünü I ki akin mülade lado, O Israel yamkhün,
Atungpuhnü thachoh.
21Awung mujukbo kheak düsheak sochoh,
ha Israel tsührübonü mushude atripkhi lah,
tümütüsho arünü arü limro tsahphülapdo,
arünü Atungpuh arü Thrünpuh mihabahdo:
22Rholoang, O akin mülakhi tsührübo,
inü nüsa akin mülakhi chingnü thsüngujihbah.
“He, isa nü kilim arüchoh; tümüde nü a Atungpuh isa Thrünpuh. 23Tsükjide awung mujuk tüsho awungbo kheak sangthsü kingaünde asühkhi ju akeangkeang lah. Tsükjide Atungpuh isa Thrünpuh lung Israel akhümkhit lah. 24Tüshe isa athunuchokinü isa jipürübonü achihbe rhimokhi hode arü mihnubo, moshibo, arü tsührübo tüsho tsührübebo muyuabahdo. 25Isanü achih ngükhi ching lunga yapanü, tüsho isanü wüntre mülakhinü isa lüpdoshang; isa le isa jipürübo, isa athunuchokinü khihni khiungde isanü Atungpuh isa Thrünpuh azhihde neak yihbeakdo; tüsho isanü Atungpuh isa Thrünpuh yu manidebahdo.”
Currently Selected:
JEREMIA 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
