MAHKHAPRÜ 15
15
1Ju dunglim, wheat yimlu kim ching Samsonnü mihnu nunu lu tüsho aniube rhua kheahpü yü. Apinü tha, “I niube yappung ching, anihbe kilim yüanü.” Tüshe abuhnü api ayüzahpü mümülü. 2Alibe abuhnü tha, “ Atsütsü nünü alibe thraneanlah de inü lümdo; jumonü inü anihbe nü atrubuh kilim jihdo. Aniurü akheambe anihbe kheaknü atsübe yung de? Muzhobah amüthri anihbe luang.” 3Tüsho Samsonnü arü ki tha, “ Hakhip a inü Filistiarü thsümünimkhi I mungchih müla!” 4Judüki Samsonnü yübah rimre 300 tholo, tüsho mahnene thsübah amo chingarün. Jushu apinü amo chingarünkhi kheak tsünduphung rhükkih. 5Küyimki apinü tsünduphungbo kheak mo thsahkihkhea, apinü rimrebo ju Filistiarü lubo ching dükhea yüshih, tüsho yimlukhi le zhipde alakhi hi tüsho kurungasolu le oliv dungbo takabah. 6Judüki Filistiarünü tha, “ Ha shenü arhimokhea?” Tüsho arünü alo, “ Timnarü tsühmeakbuh Samsonnü ah, tümütüsho apinü aniube lubah api atrubuh kilim jihabah.” Jumonü Filistiarünü atubah alibe le abuh ane chido monü takabah. 7Tüsho Samsonnü arü ki tha, “ Tümütüsho nüsanü hadürü rhimodo, tsükjide inü nüsa kheak royimbah, jushu inü arün thsübah.” 8Jumonü apinü arübo lungchihde yan tüsho hihde laksah; jushu apinü yükibah Etam lungkhün ching la.
Samsonnü Filistiarü Kukkhi
9Kheakü Filistiarünü wutu tüsho Juda ching, Lehi phünide hiukhia bin. 10Juda mihtsürübonü keokhi, “Nüsa tümüde isa bede keochihpü atukhea?” Jumonü arünü alo, “Isa Samson rampü, apinü isa ki rhimokhi nangde anihbuh ki rhimopü atukheah.” 11Judüki Juda mihtsürübo 3000 Etam lungkhün ching yüki, tüsho Samson ki tha, “Isa kurungkheak Filistiarünü yakzan shuhlah de nünü mümükheah de? Nünü isa kheak rhimokhi ha tümü a?” Tüsho apinü arü ki tha, “ Arünü I ki rhimokhi nangde, inü arü ki rhimokheah.” 12Tüsho arünü api ki tha, “Isanü nü rambah Filistiarü khah ching jihpü akikheah.” Judüki Samsonnü arü ki tha, “Nüsanü I mülaksah de thiyuchihchimang.” 13Jumonü arünü api ki asuk, “Yung, tüshe isanü nü rhükbah lang arü khah ching jihbah; tüshe tsükjide isanü nü mülaksah.” Tüsho arünü api ju liu aso mahnenü rhükbah lungto chingnü bede akhiuk.
14Küyimki api Lehi ching arükheanü, Filistiarünü api azhihde ahode arü. Judüki Atungpuh me api kheak tode arü; tüsho abin kheak liubo ju monü atakkhi hing nangde kam, tüsho akhahbo chingnü arhükkhi atreakabah. 15Apinü donki mükhühnuk aso khülang ngükhi akhah chunga yüshihbah ju lu, tüsho junü mihtsürü 1000 laksah. 16Judüki Samsonnü tha,
“Donki mükhühnuknü,amujungbo kheak mujungkihde,
donki mükhühnuknü inü mihtsürü 1000 laksah.”
17Küyimki apinü athakhamkhea, apinü mükhühnuk ju akhah chingnü jipa bah; tüsho ju dangpung ki Ramath Lehi de ji.
18Judüki api khide kethüride kam; jumonü apinü Atungpuh ki zhi tüsho tha, “Nü yamlarü khah hode nünü ha abekhitkhi ato jihdo; tüsho kheakü kethürinü I asheba de tüsho tsütamübahrü khah ching I keamba de?” 19Jumonü Thrünpuhnü Lehi ching alokhün yahshungjih, tüsho ju chingnü ke akhiukbah apinü yung; tüsho api sühmüh arülobah düküngde kam. Jumonü apinü ju ki En Hakkore de ji, ju Lehi ching khihni khiungde lah. 20Tüsho apinü Filistiarü nimungbo ching Israel kam muku mahkhap.
Currently Selected:
MAHKHAPRÜ 15: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
