MAHKHAPRÜ 14
14
Samson tüsho Timnaberü
1Kheakü Samsonnü Timna ching yüki, tüsho Filistia liberü anünürü khülang ngü. 2Jumonü apinü wutu tüsho abuh le abe ki tha, “ Timna ching Filistia liberü anünürü khülang inü ngüdo; jumonü kheakü alibe ju I niube thsüpü lujang.” 3Judüki abuh le abe bünenü api ki tha, “Nüsa keoniorü yungsho I mihtsürü alala bolung aliberü mülade nünü tsütamübahkhi Filistiarü kilim yübah nü niube thsüpü lupü?” Tüsho Samsonnü abuh ki tha, “ Alibe I thsungkheak lujang, tümüde inü anihbe mürühlah.”
4Tüshe abuh le abe bünenü ha Filistiarü azhihde Atungpuhnü kim akhuchoh de mümükheah. Tümüde ju kim ching Filistiarünü Israel kurungkheak yakzan shuhde alakheah.
5Jumonü Samsonnü abuh le abe büne lung Timna ching yüki tüsho Timna kurungasolu ching arü. Kheakü zukleangnü kekhüzü nunu khülang api kilim arungde arü. 6Atungpuh me api kheak tode arü, tüsho akhah ching tümü mülalashe mihnu nunu chakrüpkhi nangde apinü kekhüzü chakrüp. Tüshe apinü arhimokhi abuh le abe ki mütha. 7Judüki apinü yüki tüsho alibe ki asukachih; tüsho alibenü Samson khide mürüh. 8Kim anükhüh dunglim, alibe lupü api yülochoki, apinü tsahhuh-a kekhüzü ashemi kheah. Tüsho kheahang, mukhubo le mukhuke kekhüzü ashemi kheak lakheah. 9Apinü ju chakkhia akhah ching lu tüsho tsühde yü. Küyimki api abuh le abe kilim arükheanü apinü ane kilim anükhüh jih, tüsho ane she tsüh. Tüshe apinü kekhüzü ashemi kheaknü mukhuke lukhi ane ki mütha.
10Jumonü abuhnü alibe kilim yüki. Tüsho Samsonnü ju ching thünio kip, tümüde athrününgtsüng mihtsürünü jude thsüde alakheah. 11Küyimki arünü api ngükhea, athrününgtsüng 30 api lung beshih. 12Judüki Samsonnü arü ki tha, “Inü nüsa kilim akeokhikhi khülang jihanü. Nüsanü ju thünio ho dunglim nimung thüne dükeaknü dükde thakhuksho tüsho I ki thanakkhuksho inü nüsa kilim khimzhingzhing samrü tüsho amüthribe khimmih samrü jihbah. 13Tüshe nüsanü I ki ju müthakhuksho, nüsanü I kilim khimzhingzhing samrü tüsho amüthribe khimmih samrü jihbah.” Tüsho arünü api ki tha, “Nünü akeokhikhi jihang, junangde isanü ju anianü.” 14Jumonü apinü arü ki tha:
“ Ari-shiwüh kheaknü tümükhüh atsühbe akhiuk.
Sühmüh labe kheaknü tümükhüh aniung akhiuk.”
Tüsho akeokhikhi ju tümüanü arünü nimung mahsam chingnü müthakhuk.
15Jumonü arünü nimung phüyi nipü Samson niube ki tha, “Nü niubuh ki rük thsang, junangde apinü isa ki akeokhikhi thanaka huhbah, jude yungsho isanü nü le nü buh yamkhün monü atakbah. Isa yo lujihpü nünü isa jiyukkhea de? Jude yung shi?” 16Judüki aniubenü api ki tripde tha, “Nünü I thraneanchoh! Nünü I mümuzho! Nünü I mihtsürübo ki akeokhikhi jihdo tüshe I ki thaa muhuh.” Tüsho apinü alibe ki tha, “ Kheahang, inü ha I buh le I be ki she thaa muhuh; jumonü inü nü ki thaa huhpü?” 17Kheakü alibenü arü thünio kheambah nimung thüne bankhitde api ki trip. Tüsho thüne nipü apinü alibe ki tha, tümütüsho alibenü api ki khide thsurang. Jushu alibenü anihbe mihtsürübo ki akeokhikhi thaa huh. 18Jumonü kiuto mihtsürübonü thüne nipü ani yüzahpü müngüh api ki tha:
“ Mukhuke kheaknü aniungbe tümü a?
Kekhüzü kheaknü amürangbe tümü a?”
Tüsho apinü arü ki tha,
“Nüsanü I moshi drelü lung muwochakkhülaa,
inü akeokhikhi nüsanü müyimkhit.”
19Judüki Atungpuh me api kheak tode arü, tüsho apinü Ashkelon lim yüki tüsho mihtsürü 30 laksahbah arü khimmih lu tüsho amüthribe khimmih ju akeokhikhi thakhukrü kilim jih. Junangde api khide bukakhiuk, tüsho abuh yam lim alode yü. 20Tüsho Samson niube ju api yamkhün thsükhi thünio ching atrubuh mihtsürü kilim jihabah.
Currently Selected:
MAHKHAPRÜ 14: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
