ISAIA 51
51
Jirusalem Mulong Shukheam Yubo
1I ki aniang, nüsa thiyuro-lungki müshamrübo,
nüsa Atungpuh yimrübo.
Nü phukkhipung lung kheak tüsho nü kiupung alokhün kheahang.
2Nü buh Abraham tüsho nü zübebe Sara kilim kheahang;
tümüde inü api zangrü jikheah,
tüshe inü api müngühjih tüsho api hihde kamshih.
3Tümüde Atungpuhnü Zion mulong shukheambah;
apinü anihbe yo thsümünimkhi dangpungbo alala shukheambah,
tüsho anihbe sunglo ju Eden nangde kamshihbah,
anihbe loshelo ju Atungpuh shahwün nangde kamshihbah;
asühachih tüsho asühkhi anihbe kheak labah,
makshe jihkhi tüsho khün düsheak labah.
4I ki aniang, I mihtsürü tüsho I ki anguhang, I trükshih;
tümüde I kheaknü thsangyukhi khülang wukhiukbah,
tüsho ayin khülang thsungkheaknü I yakzan ju mihtsürübo kilim labah.
5I yo thiyuro-lungki phünide lah,
I yo akhümkhit wukhiukdo tüsho I khahbonü mihtsürübo yakzan shuhbah;
keyean lomibonü I aleangchoh tüsho I khah kheak arünü mulonglamchoh.
6Nü mükbo thüning lim züngkihang tüsho abolim alomi kheak kheahang;
tümüde mokhüh nangde thüningbo dükheakbah,
khim khülang ruk alomi mürhütbah,
tüsho ju ching larü somünakbo nangde ashebah;
tüshe I akhümkhit lünnü alabah,
tüsho I yo thiyuro-lungki küyimkishe mükheam.
7Nüsa sherü thiyuro-lungki mükheahlanü,
nüsa mihtsürü sherü mulong ching I thsangyukhi lanü I ki aniang;
püpürünü mükhemürangkhi dütre,
tüsho arünü nü mükthsüchoki mulong dünini.
8Tümüde khim khülang ruk arinü arü tsühabahbah,
tüsho shihnamkhim nangde arinü arü tsühbah;
tüshe inü abekhitpü lünnü alabah,
tüsho I akhümkhit lünnü lün labah.
9Asürang, asürang, sühmüh zahang,
O Atungpuh khah!
Asürang, awün nimungbo,
adüso lünbo nangde!
Rahab adütre kamde khapthünakkhi,
ke-rimri chinkhitbuh nü yung de?
10Keto ato asükbo ngahshihkhi nü yung de;
rhokhita larü hopü thsüde shenü keto asük limro thrünkhea?
11Jumonü Atungpuhnü rhokhitrü rholobah tüsho khün thsüde Zion lim arübah;
akheam müla asühachihkhi arü ku kheak labah;
arünü asühachih tüsho asühakokhi labah,
tüsho mulong rozhak le masühkhi tsoabahbah.
12I, shepünü shukheamchonü api ah;
dale tümüde ashepü lakhi mihtsürü trecho,
mihtsürü khülang shepü rim nangde yiuhabahcho?
13Nünü nü Thrünrü,
thüningbo jashihkhi tüsho alomi khimtanbuh Atungpuh mihdo.
Nü mutuklode nimungroro ajunorü bukakhiukkhi hode trechoh,
shepü athsümünimpü mükhüma la.
Tüshe ajunorü bukakhiukkhi kükheak la?
14Junoa larü nahde adükhebah;
arü müshe tüsho alokhün ching müyüzah,
yungsho arü yikhap mümükheak.
15Tümüde I Atungpuh nü Thrünpuh,
shepünü keto chamnakcho, junangde ahukde abükcho–
Wuto Atungpuh ju api mung lah.
16Inü nü mün ching I yubo yukjihdo,
tüsho I khah me khüp nü jikshihdo,
thüningbo jashihde tüsho alomi khimtande,
tüsho Zion ki tha, “ Nü I mihtsürü ah.”
Jirusalem Thsünükhi Akheam
17Nü asürang, nü asürang!
zhipang, O Jirusalem,
nü shepü Atungpuh khah kheaknü api bukakhiukkhi pung yungkhea,
18Anihbenü zübekhi tsührü alala bolung shenü anihbe limmübe;
anihbenü mütrümusukhi tsührü alala bolung shenü anihbe khah kheak mutho.
19Thsümütsü mahne nü kheak yükihdo
–shenü nü lung mulong rozhakba?–
thsümünima yapkhi tüsho athsümünimkhi khümzung tüsho nukshang–
shenü nü shukheamba?
20Nü tsührübo lungdo,
arübo kiudunglimro ku koyubah yaplah,
azheang ching shihmüchi nangde arübo Atungpuh bukakhiukkhinü,
Thrünpuhnü athürühkhinü mide lah.
21Jumonü ha aniang, nüsa sherü yuria la,
sherü müshanga la, tüshe yukhunü yung:
22Wuto Atungpuhnü ha thachoh,
nü Thrünpuh shepünü api mihtsürü dünkheak mushujihcho:
Kheahang, nü khah chingnü amüshangbe pung inü ludo;
nünü kheaküa I bukakhiukkhi lakuk chingnü mütründe muyung.
23Tüsho inü ju nü thsümüchirü khah ching yukjihbah,
shepünü nü ki tha,
“Mükhümang, junangde isanü nü kheak tsahanü;”
tüsho nünü nü düthsün ju atsahpung lo nangde
tüsho arü thsungkheak kiudunglimro nangde kamshih.
Currently Selected:
ISAIA 51: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
