HOSEA 9
9
Israel thsungkheak Thsümüchi
1Dasühachih, O Israel! Püpürü trükshihbo nangde dasühako; tümüde nünü nü Thrünpuh kheaknü chamkhide yüliyürado. Nünü hinitpung alala kheak müzammüram mulomüthsüpü muzhodo. 2Hinitpung tüsho yukhu nitpungnü arü mükipduh, tüsho yukhu aso mülade akambah. 3Arübo Atungpuh lomi ching aninga müla; tüshe Ephraim a Ijip lim alode ayübah, tüsho Asiria ching arünü mümüsühkhi tsühyungpü tsühbah. 4Arünü yukhu kingaün Atungpuh ki mubuk tüsho arünü laksah-a kingaünkhinü api masühshih. Hadürü kingaünbo ju mitriprü jimpung nangde alabah; ha tsührü alala müneanbah; tümüde arü yikhap ju arü khümkhi thsungkheak lang alabah; ha Atungpuh yam ching lude marü. 5Akhukhitkhi thünio nimung, tüsho Atungpuh thünio nimung nünü tümü rhimoba? 6Arünü athsümünim chingnü tsokhikhi she, Ijipnü arü bemukhungbah; Memphisnü arü kiuyuka bahbah. Khingphunü arü shotoyinchi kukrukbo mükühbah; ayangbo arü khimyambo ching labah.
7Thsümüchi nimungbo arüdo, royimpü nimungbo arüdo; Israelnü zhichoh, “ Wukihrü amülim ah, me lakhi mihtsürü makharü ah!” Tümütüsho nü mülimkhi tokhinü, nü mükthsü tode lah. 8Wukihrü ju Ephraim aheangrü I Thrünpuh lung lah, tütüshe wukihrü limrobo alala ching qimürip lah, tüsho api Thrünpuh yam ching mükthsü lah. 9Arünü Gibea nimungbo ching nangde arü zangrü sükde thsümünimdo; apinü arü amülim-rhimobo lümkhitbah, apinü arü neakbo dün thsümüchibah.
10Sunglo ching kurungasobo nangde, inü Israel ngüdo. Akheahmünchi ching khubaso akhuh asokhi nangde, inü nüsa jipürübo ngüdo. Tüshe arünü Baal-peor ching arü, tüsho achihbe kukruk ki arü nihbuh müsühkhit, tüsho arünü muzhokhi kukruk nangde arübo athraneanbe kam. 11Ephraim müretah ju wuhnu nangde phinde atsobah–müzübe, mihmüla, khungarü müla! 12Arünü tsührübo mütrümususu she, sheshe maningyi khiungde inü arü tüzhoshihbah. I arü kheaknü chamachihchoki atsütsü arü are!
13Inü Ephraim ju Tair nangde, dangpung atsü ching khima ngü. Tüshe Ephraimnü arü tsührübo alaksahrü ki hande akhiukbah. 14Arü ki jihang, O Atungpuhnü nü tümü jihba? Arü kilim nuyam mütsüpü tüsho niuhke kungpü jihang. 15Arü amütsü alala Gilgal ching tankih; ju ching inü arü thraneande kam. Tümütüsho arü mihbukmuyuk rhimobo hode inü arübo I yam chingnü ayankhitbah. Inü kheaküa arü mümuzho; arü torübo alala azhihrü ah. 16Ephraim a tsühsah-a lah, ayingbo kunga lah, arünü aso maso. Arünü zübebe she, arü amuzhodakkhi tsührübo inü alaksahbah.
17Tümütüsho arünü api ki mani; I Thrünpuhnü arü bahyukbah; trükshih bolung arübo tsotsahrü kambah.
Currently Selected:
HOSEA 9: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
