HOSEA 10
10
1Israel a aso hihkhi kurungaso nangde lah. Api aso hih yande, apinü kingaün sadam alü thsü; api lomi lakhit yande, api dungjingbo alü thsü. 2Arü mulong amülim lah; kheakü arünü mülimkhi hanbeah. Atungpuhnü arü kingaün sadambo lukkheambah, tüsho arü dungjingbo thsümünimbah.
3Tümüde kheakü arünü athabah: “ Isa kiulongthsürü müla, tümütüsho isanü Atungpuh mütre. Tüshe kiulongthsüpuhnü isa thsungkheak tümü thsükhukba?” 4Arünü yancho yubo thachoh; akeangkeang thiyuchihchimnü arünü tangzüngbo thsüchoh; jumonü thiyuro mülakhi ju thulu wochakkhi ching müzümrim nangde mukhuhchoh.
5Samaria ching larü ju Beth-aven moshi nunu dünkheaknü ajanchoh. Mihtsürübonü ha dünkheak tüzhobah, tüsho ha kheaknü müretah tsokhi dünkheak ju kingaünrü amükeamrübonü mitripbah. 6Kukruk ju Asiria lim ato kiulongthsüpuh ki ruk nangde hande ayübah. Ephraim achih ngübah, tüsho Israelnü anihbuh sangthsü dünkheak achihbah. 7Samaria kiulongthsüpuh ju kemi kheak sangjip nangde adükheakbah. 8Israel neak Aven achang dangpungbo thsümünimbah. Ayang tüsho khingphubo arü kingaün sadambo kheak mukhuhbah. Arünü müzüngbo ki, Isa lüpdoang, tüsho awungbo ki, Isa kheak keamkihang, de athabah.
9Gibea nimungbo chingnü nünü neak yihbeakdo, O Israel; ju ching arünü mutuklode la. Gibea ching amütsü-rhimorü thirithsünü akukkhi yung de? 10Inü amulongkhi ching arü thsümüchibah; arü neak alü dün thsümüchichoki trükshihbonü arü azhihde mukhungbah.
11Ephraim a thsangyukhi moshi nunu, anitpü muzhokhi lakheah, tüsho inü anihbe hung atsü kheak sangkap müyihkih; tüshe inü Ephraim alo yihnakshihbah, Judanü wochakbah, tüsho Jakobnü alo phünnakbah. 12Nü thsungkheak thiyuro-lungki yangang, düküngde muzhokhi sangaso rhoang; muwochakkhi lo phünnakang, tümüde ha Atungpuh yimpü kim ah, junangde apinü arübah nü kheak müngühmühi dungkihjihbah. 13Nünü mihbukmuyuk khimdo, nünü amütsü yimludo, nünü akeangyu sangaso tsühdo. Tümütüsho nünü nü wu tüsho thirithsü hihkhi ching kindo, 14jumonü nü mihtsürü azhihde thirithsü düsheak labah, tüsho nü chipi alala thsümünimbah, Shalman nü thirithsü nimung Beth-arbel thsümünimde, berübo lung tsührübo bebah adütre kamde zünakkhi nangde alabah. 15Hanangde nü mihbukmuyuk dünkheak nü ki rhimobah, O Bethel. Yapsu mükikde Israel kiulongthsüpuh ju shahde adükheakbah.
Currently Selected:
HOSEA 10: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
