GALATIA 4

1Inü yamrüplurüp lurü dünkheak thakhi ju, api azürü lachoki khiungdüa, api alala yo aputungrü thsüthsü she azhorü kheaknü büthsüde müla, 2tüshe abuhnü akhukhi kim mukhiungyikia akümrü tüsho atoathüprü bukkhüp lah. 3Junangde küyimki isa azürü lakheanü alomi yuzüng bukkhüp lakheah. 4Tüshe küyimki kimkhiukkhi arükhea, Thrünpuhnü api tsührü, aliberünü azübekhi, yakzan bukkhüp zübekhi, 5#Rom 8.15-17isa ju Thrünpuh tsührübo kampü thsüde yakzan bukkhüp larü rhokhitpü arü. 6Tüsho nüsa ju api tsührübo thsükhinü, Thrünpuhnü api tsührü Me nüsa mulongbo ching thiyibah, “Abuh, Abuh!” de zhichoh. 7Jumonü kheakü nüsa ju azhorü yung tüshe tsührü ah, tüsho tsührü a sho, Khrista hode Thrünpuh yamrüplurüp lurü ah.

Paulnü Galatiarü thsungkheak Lümjihkhi

8Akhuhlim nüsanü Thrünpuh mümükheahchoki, nüsa ju thrünpuhbo yungde püpürü bukkhüp azhorü lakheah; 9tüshe kheakü, nüsanü Thrünpuh mükheahdo, yungsho Thrünpuhnü mükheahdo, küde thsah nüsanü jurü bukkhüp azhorü kamlopü reangmüzahkhi tüsho achimudo yuzüngbo lim rholoba? 10Nüsanü nimungbo, khinubo, akheahmünchibo, tüsho kambo arüngchoh! 11Nüsa thsungkheak I akeangkeang ching rhimoa lashi de I mulong sansanlah.

12Keoniorübo, inü nüsa ki mushuchoh, I nangde kamang, tümüde I she nüsa nangde kamdo, nüsanü I ki tümü amülim müthsü; 13pang ching thsünü lakhi hode akhuhlim inü nüsa ki thiyusheakatsü thsangyudo de nüsanü mükheahlah; 14tüsho I lalim ju nüsa ki rükaki khülang nangde lalashe, nüsanü mükheahmüchih yungsho mübahyuk, tüshe Thrünpuh yunirü khülang, Jisu khrista nangde I leangkhi. 15Nüsa asühkhi tümü kama la? Kukkhülaa nüsanü nüsa mükjibo khünkhita I kilim jihbah de inü nüsa ki thiyumütsan thsüchoh. 16Dale tüsho nüsa ki thiyuro thakhinü I nüsa riri kamdü de? 17Mihtsürübonü nüsa kheak khide tsülah, tüshe atsü thsungkheak yung; arünü nüsa bekhibah arü kheak tsüshihnelah. 18Atsü ching a, I nüsa lung lachoki lang yungde kamruhroro tsüpü yihnüpü lah. 19Amuzho I tsührübo, Khrista yakli nüsa kheak mülayi khiungde kheaküshe nüsa lung I zübe-thsünü ching lah! 20Kheakü I nüsa miki labah I düsheak müthrinelah; tümüde nüsa dünkheaknü I yingyingde lah.

Hagar tüsho Sara Amütsan

21Nüsa sherünü yakzan bukkhüp lanechonü I ki thaang, nüsanü yakzan musocho de? 22Abraham tsührü mahne, khülang azhorü kheaknü tüsho püpü khülang zuzu liberü kheaknü alakheah de thrüta lah. 23Azhorü tsührü ju püpüki ruk lang zübe, tüshe zuzu liberü tsührü ju a alokhikhi hode alakheah. 24Ha müchityu ah: aliberübo ju tangzüng mahne ah. Khülang Sinai Müzüng chingnü, azhorü tsührübo zübecho; alibe ju Hagar. 25Kheakü Hagar ju Arabia ching Sinai Müzüng ah; alibenü kheakü lakhi Jirusalem thapü ayelah, tümüde alibe ju atsührübo lungnü azhorü kuhi ching lah. 26Tüshe Jirusalem akube zuzu lah, tüsho alibe ju isa abe ah. 27Tümüde ha thrüta lah,

“Asühang, O tsührü mülabe bünkeangberü;

nü shepü tsührü zübe-thsünü ching mülanü asühde zhiang;

tümüde arhangberü tsührü kheaknü a abahyukkhi liberü tsührü ahihbe lah.”

28Kheakü keoniorübo, Isak nangde nüsa ju alokhikhi tsührübo ah. 29Ju kim ching püpüki ruk lang azübekhi tsührünü Me wu hode azübekhi thsümüchi. Kheakü ju rukhüh ah. 30Tüshe amüsühyunü tümü thacho? “Azhorü liberü tüsho atsührü yankhita bahang, tümüde azhorü liberü tsührünü zuzu liberü tsührü lung küyimkishe yamrüplurüp ching shihcham mulu.” 31Jumonü keoniorübo, isa ju azhorü liberü yungde zuzu liberü tsührü ah.

Currently Selected:

GALATIA 4: YIMCBSI

Highlight

Copy