GALATIA 3

Yakzan yungsho Akin

1O makhakhi Galatiarü! Nüsa mük ki Jisu Khrista yümkihkhi mütsande ngübahle shenü nüsa bephülapkhea? 2Inü nüsa kilimnü ha lang anikhitnelah: Nüsanü yakzan anide arhimokhinü Me leangkhikhea shi, dashi nüsanü asokhi kinkhinü a? 3Nüsa khide makhaa la de? Me kheaknü tankih dunglim mihtsürü khuksahkhinü nüsa mükkheahkih khiungpü mürangcho de? 4Ju atsütsü akeangkeang a sho, nüsanü tümü mülakhi thsungkheak ju dükhüh thsünü khea de? 5Nüsanü yakzan anide arhimokhi hode Thrünpuhnü nüsa kilim api Me jihbah nüsa bolung khinthiyinbe rhimokhea shi, dashi nüsanü asokhi kinmonü a?

6 # Rom 4.3 Abraham lümakheahang: “Apinü Thrünpuh kin, tüsho api ju thiyurolungki khejih.” 7#Rom 4.16Jumonü sherünü kinchonü Abraham tsührübo ah de mükheahang. 8Thrünpuhnü akin hode khiungkerü alim kamshihbah de amüsühyunü müchit, tüsho amüngühnü thiyusheak-atsü Abraham ki mükheahshih: “Trükshih alala nü hode müngühmühibah.” 9Jumonü sherü akin lanü, akin mihtsürü Abraham lungnü müngühmühia lah.

10Yakzan rhimo kheak angükihrü alala muthrumünean khüp lah, tümüde ha thrüta lah: “Yakzan hüm ching thrütkhi yande mülarü tüsho ju mürhimorü aban muthrumünean thsang.” 11Kheakü mihtsürü sheshe yakzan hode Thrünpuh miki alim mükam de mütsanlah; tümüde “Shepü akin hode thiyuro-lungki lanü arhang labah”; 12tüshe yakzan ju akin kheak müla, tümüde “Shepünü jurü rhimochonü jurü hode arhang labah.” 13Isa thsungkheaknü muthrumünean kamde yakzan muthrumünean chingnü Khristanü isa rhokhit, tümüde ha thrüta lah: “Shepü sangdung kheak zhinbanü muthrumünean.” 14Abraham kilim jihkhi müngühmühi Jisu Khrista hode khiungkerü kheak arüpü thsüde apinü isa rhokhit, junangde akin hode isanü Menü alokhikhi leangkhibah.

Thiyuzüng tüsho Alokhikhi

15Keoniorübo, mihtsürü yakli chingnü inü thachoh: Mihtsürünü tangzüngkhi thsüthsü she, adüngakhi thsü dunglima shenü she ju müthsümünim yungsho ju ching muyukajakchoh. 16Kheakü Abraham ki alokhikhibo thsü. Ahihkhüh ki thade, “Tüsho nü müjihbo,” de mütha; tüshe khülang ki, “Tüsho nü müjih,” de Khrista ki thalah. 17Inü alümkhi ju ha: Kam chi phüyikheak samrü dunglim jihkhi yakzannü akhuhlim Thrünpuhnü tangzüngkhi akeangkeang kamshihpü thsüde müthsümünimkhuk. 18#Rom 4.14Tümüde yamrüplurüp ju yakzan hode lasho, ju kheaküa alokhikhi hode müla; tüshe Thrünpuhnü alokhikhi hode ju Abraham kilim jih. 19Dale tüsho yakzan dungtokhi ju tümü a? Alokhia lakhi müjih marüyi khiungde alakmihkhibo dünkheaknü ha yukajakkheah; tüsho yakzan ju limburü hode yunirünü jih. 20Limburü dükhi ju bo khülang thsung thsüde yung; tüshe Thrünpuh ju khülang ah.

Yakzan Dungtokhi

21Dale tüsho yakzan ju Thrünpuhnü alokhikhibo azhihde a shi? Jude yung; tümüde yakzan ju rhangdung ngüpü thsüde jihkhülaa, dükde thiyuro-lungki ju yakzan hode arüa labah. 22Tüshe Jisu Khrista kheak akin hode akinrü kilim alokhikhi jihpü thsüde alomiküp alala neak bukkhüp lah de amüsühyunü khipkhitchoh.

23Kheakü akin marüyichoki, akin amikheak akhiukpü lakhi khiungde yakzan bukkhüp isa rihdoa zo. 24Jumonü akin hode alim kampü thsüde Khrista marüyi khiungde yakzan ju isa thorü lakheah. 25Tüshe kheakü akin arükhinü, isa yakzan bukkhüp müla; 26tümüde nüsa alala Jisu Khrista ching akin hode Thrünpuh tsührübo ah. 27Tümüde nüsa alala sherü Khrista ching baptikheanü nüsanü Khrista khümyukdo. 28Jumonü Jihudarü yungsho Greek, azhorü yungsho zuzu, athrürü yungsho aliberü dükeak tümü büthsüde müla; tümüde nüsa alala Jisu Khrista ching khülang ah. 29#Rom 4.13Tüsho nüsa Khrista yo thsüsho, alokhikhi ayannü nüsa ju Abraham müjih tüsho yamrüplurüp lurü ah.

Currently Selected:

GALATIA 3: YIMCBSI

Highlight

Copy