EZEKIEL 3
3
1Tüsho apinü I ki tha, “Mihtsürü tsührü, nü miki tümü lanü tsühang, küpqiu ha tsühang; jushu yüang tüsho Israel yamkhün ki asukang.” 2Jumonü inü I mün ka tüsho apinü küpqiu ju atsühshihpü I jih. 3Judüki apinü I ki tha, “Mihtsürü tsührü, inü nü ki jihkhi küpqiu ha tsühang tüsho nü buk mishang.” Jumonü inü ju tsüh, tüsho ha I mün ching mukhuke nangde niung.
4Judüki apinü I ki tha; “Mihtsürü tsührü, kheakü Israel yamkhün kilim yüang tüsho I yubo arü ki asukang. 5Nü ju mümülükhi yutha tüsho thiyutha achak ching yüshihkhi yung, tüshe Israel yamkhün kilim– 6nünü manikhitkhukpü lakhi amümülü tüsho thiyutha achak mihtsürü ahihdo kilim yung. Tsükjide inü arü kilim nü yüshihkhülaa, arünü nü ki ania labah. 7Tüshe Israel yamkhünnü nü ki anipü mümulong tümütüsho arünü I ki anipü mümulong, tümüde Israel yamkhün athrünkhi müküplah tüsho rhükrhüklah. 8Tüshe inü arü nangde nü nihnihshihbah tüsho rhükrhükshihbah. 9Inü nü kingkang ju lung amüküp nangde, lungji kheaknü amüküpbe kamshihbah. Arü azhih yamkhün thsüa lalashe arü ki dütre yungsho arü hode dümüyinsah.”
10Tüsho apinü I ki tha, “Mihtsürü tsührü, kümkangde aniang tüsho inü nü ki asukkhi yubo alala mulong ching zoang. 11Kheakü ramtso ching nü lomi mihtsürü kilim yüang tüsho arü ki asukang. Arünü anini she manini she thaang, ‘ Wuto Atungpuhnü ha thachoh.’ ”
12Judüki menü I shuhkih, tüsho I dunglim arhunganim düsheak ato inü so: “Atungpuh müretahkhi api lapung ching shishang!” 13Inü arhang shiwühbo ghidükeang khamachihkhi düsheak tüsho arü rheang ki lolungbe-jingbo, arhunganim düsheak ato so. 14Judüki menü I shuhkih tüsho bebah tso, tüsho I kheak Atungpuh khah amüküp lade, khühde tüsho I me bukakhiukkhi chingnü yü. 15Tüsho I Kebar Ayung phünide Tel Abib ching lakhi ramtsorü lung arü. Tüsho arü lapung ching arü bolung shangmanga I nimung thüne bin.
Israel ju Aheangrü
(Ezk 33.1-9)
16Nimung thüne akheam nipü Atungpuh yu I kilim arü. 17“Mihtsürü tsührü, inü nü Israel yamkhün thsungkheak aheangrü khülang kamshihdo; jumonü inü asukkhi yu aniang tüsho I kilimnü arü ki dühdükhi yu jihang. 18Küyimki inü mihbukmuyuk mihtsürü ki, Nü tsükjide ashebah de athaba, tüsho nünü api ki düh de müthasho yungsho anihbuh rhangdung khümkhitpü thsüde amütsü limrobo chingnü rholoshihpü masuksho, ju mihbukmuyuk mihtsürü ju anihbuh neak dün shebah, tüsho inü api thiyih nü khah chingnü akheangbah. 19Tüshe nünü mihbukmuyuk mihtsürü ki düh de thasho, tüsho apinü anihbuh mihbukmuyuk tüsho amütsü limrobo chingnü murholosho, nihbuh neak dün api shebah; tüshe nü a akhümkhitbah. 20Kheaküshe, küyimki thiyuro mihtsürü nihbuh thiyuro-lungki chingnü rholoba tüsho amütsü rhimoba, tüsho inü api müngüh jing mükhe zojihbanü api ashebah. Tümütüsho nünü api ki düh de mütha, nihbuh neak dün api shebah. Api thiyuro-lungki rhimokhi rhimo mülümkhit tüsho api thiyih inü nü khah chingnü akheangbah. 21Tüshe nünü thiyuro-lungki mihtsürü ki neak müyihbeakshihpü düh de thabah apinü neak müyihbeaksho, tsükjide api arhang labah tümütüsho apinü dühdükhi ludo, tüsho nü khümkhita labah.”
22Ju ching Atungpuh khah I kheak lakheah, tüsho apinü I ki tha, “Asürang tüsho adükhün ching wukhiukang, tüsho ju ching inü nü ki asukbah.” 23Jumonü inü asürü tüsho adükhün ching wukhiuk. Tüsho ju ching Atungpuh müretahkhi, Kebar Ayung ki inü angükhi müretahkhi nangde alakheah, tüsho inü I miro mükhüm. 24Judüki I kheak me arü tüsho I jing shuhkihjih. Apinü I ki asuk tüsho tha: “ Yüang, nü yam ching nü rihdoang. 25Tüsho mihtsürü tsührü, arünü liubonü nü rhükbah; nü arhükbah, junangde mihtsürü bolung nü mükheyuk. 26Inü nü mulo nü khühlüh kheak dakkihshihbah, junangde nü aduhabahbah tüsho arü azhih yamkhün thsüthsü she nünü arü müthürühkhuk. 27Tüshe küyimki nü ki inü asukba, inü nü mün khimshuhjihbah tüsho nünü arü ki thabah, Wuto Atungpuhnü ha thachoh,” shepünü anibanü apinü anishang, tüsho shepünü thsunglobanü apinü thsungloshang; tümüde arü ju azhih yamkhün khülang ah.
Currently Selected:
EZEKIEL 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
