EZEKIEL 25
25
Amon azhihde Müchitkhi
1 Atungpuh yu I ki arü: 2Mihtsürü tsührü, nü miro Amonrü kilim abinang tüsho arü azhihde müchitang. 3Amonrü ki thaang, Atungpuh T H RÜ NPU H yu aniang: Atungpuh Thrünpuhnü ha thachoh, Tümütüsho I arüngyam müneana lachoki, tüsho Israel lomi thsümünima lachoki, tüsho Juda yamkhün ramtso ching yüchoki nüsanü “Aha!” de tha; 4jumonü inü nüsa aniakhiuklim mihtsürü kilim yamalo thsüpü jihchoh. Arünü nüsa bolung binkheampung thsübah tüsho nüsa phulung ching arü khimyambo thsübah; arünü nüsa sangaso tsühbah, tüsho arünü nüsa niuhke yungbah. 5Inü Rabba ju kemelbo yimtsühpung tüsho Amon ju mihnu boto zopung kamshihbah. Judüki nüsanü I Atungpuh de mükheahbah. 6Tümüde Atungpuh Thrünpuhnü ha thachoh: Tümütüsho nüsanü nüsa khahbo dam tüsho nüsa jingbo adan tüsho Israel lomi azhihde nüsa mulong ching lungchihpü asühachih, 7jumonü nüsa azhihde I khah chungkhit, tüsho trükshihbo kilim yankhia lukhi nangde ajihbah. Inü nüsa mihtsürü bolungnü lipkhia bahbah tüsho lomibo chingnü nüsa dükheakshihbah; inü nüsa thsümünimbah. Judüki I Atungpuh de nüsanü mükheahbah.
Moab azhihde Müchitkhi
8Atungpuh Thrünpuhnü ha thachoh: Tümütüsho Moabnü tha, Juda yamkhün ju püpürü trükshihbo alala nangde lah, 9jumonü inü Moab aredung kiuto atsüdakbo–Beth Jeshimoth, Baal Meon tüsho Kiriathaim yanshihbah. 10Inü ha Amon lungnü aniakhiuklim mihtsürü kilim yamalo thsüpü jihbah. Hanangde trükshih bolung Amon kheaküa mülümkhit, 11tüsho inü Moab kheak mahkhapbah. Judüki I Atungpuh de arünü mükheahbah.
Edom azhihde Müchitkhi
12Atungpuh Thrünpuhnü ha thachoh: Tümütüsho Edomnü Juda yamkhün azhihde royimde rhimodo tüsho arü kheak müshakde royimkhi rhimodo, 13jumonü Atungpuh Thrünpuhnü ha thachoh, Inü Edom azhihde I khah chungkihbah, tüsho mihtsürü le shiwüh kheaknü lipkhia bahbah, tüsho inü ha thsümünimbah; Teman kiuto chingnü Dedan kiuto khiungde arübo nukshangnü akeambah. 14I mihtsürü Israel khah hode inü Edom kheak royimkhi labah; tüsho I bukakhiukkhi tüsho I mulong zhipzhip yande arünü Edom ching rhimobah; tüsho arünü I royimkhi ngübah, Atungpuh Thrünpuhnü thachoh.
Filistia azhihde Müchitkhi
15Atungpuh Thrünpuhnü ha thachoh: Tümütüsho mükheamkhi mükthsünü Filistiarünü royimkhi ching rhimodo tüsho mulong amütsünü athsümünim ching royimdo, 16jumonü Atungpuh Thrünpuhnü ha thachoh, Inü Filistiarü azhihde I khah chungkihbah, Kerethrü lipkhia bahbah tüsho aningkhi keyean thsümünimbah. 17Inü mulong zhipzhip thsümüchinü arü kheak tode royimbah. Judüki inü arü kheak I royimkhi lachoki I Atungpuh de arünü mükheahbah.
Currently Selected:
EZEKIEL 25: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
