EZEKIEL 24
24
Dükihthüra Phüh
1Kam tuku, khinu thürü, nimung thürü nipü, Atungpuh yu I ki arü: 2Mihtsürü tsührü, khihni nimung ha thrütang. Ha nimung Babilon kiulongthsüpuhnü Jirusalem yankheah. 3Tüsho azhih yamkhün ki mihmüchit thakhitang tüsho arü ki thaang, Atungpuh Thrünpuhnü ha thachoh:
Phüh dükihang, dükihang,
ju ching ke she yukang;
4ju ching shih khapkhi atsübo apho tüsho adubuh yukang;
ju ching arobo yukang.
5Namfimihnu bolung amokhitkhi luang,
ju khüp sang rhungkihang;
ju amapshang tüsho ju ching arobo khiungang.
6Jumonü Atungpuh Thrünpuhnü ha thachoh: Thiyih bukkhi kiuto are, phüh ching thrung zahlah, ju chingnü thrung muwukhiuk! Shihtsan khülang khülangnü yihkhitchoh tüsho khülang she maning. 7Tümüde ju ching thiyih zahlah; anihbenü ju lung kheak yihkih; alonü alüpdopü thsüde anihbenü alo kheak mubukkhit. 8I mulong zhipzhipshihpü, royimshihpü anihbenü abukkhi thiyih inü lung kheak yihkih, junangde ju müyihdo. 9Jumonü Atungpuh Thrünpuhnü ha thachoh: Thiyih bukkhi kiuto are! Inü sang rhungkihkhi she ato kamshihbah. 10Sangthulungbo rhungkihang, mo takkihang; shih tsüde khiungang, rhümthüneabebo ching düsahang, arobo takshang. 11Mokhih kheak ju akeangkeang phüh duboang, junangde ha takde akambah, shotolung lamlam kamchoh, ju ching aneak niuchoh, thrungbo tsühabahchoh. 12Akeangkeang ching I khido; monü she thrung akheah mutsoshih. 13Tütüshe küyimki inü nü makhamaleak münean chingnü müsühkhea, amünean chingnü nü müsühde mükam; nü kheak I reangkeamde bukmakhiukyi khiungde nü müsühde mükamlo. 14I Atungpuhnü asukdo; kim arüchoh, inü rhimobah. Inü mutsomuwuh, inü maningshih, inü mülümalo. Nü limrobo tüsho nü rhimobo yande inü nü mahkhapbah, Atungpuh Thrünpuhnü thachoh.
Ezekiel Niube Shekhi
15 Atungpuh yu I ki arü: 16Mihtsürü tsührü, khülang ki damkhinü inü nü mük ki asühbe lude atsopü lah; tütüshe nünü mimütrip yungsho mütrip, yungsho nü chikebo mubukkhi. 17Mükhihde düsüknimang; asherü thsungkheak midütrip. Nü kuhingbe hingang, tüsho nü jingbo ching jingkhümpübo yukang; nü münküp achangbe düyihdo yungsho mahmi-jimpung dütsüh. 18Jumonü inü yapsulim mihtsürübo ki asuk, tüsho arelim I niube sheabah. Tüsho ashido yapsu I ki thiyukhüm jihkhi nangde inü rhimo.
19Judüki mihtsürübonü I ki tha, “ Nünü hade arhimokhi ha isa thsungkheak tümü amütsananü nünü isa ki müthaba de?” 20Jushu inü arü ki tha: Atungpuh yu I ki arü: 21Israel yamkhün ki thaang, Atungpuh Thrünpuhnü ha thachoh: Inü nüsanü lülüshishikhi, nüsa mükbo asühkhi, tüsho nüsa mulongnü akünkhi I yo arüngyam müneanbah; tüsho nüsanü aninga lashihkhi nüsa tsührübo le tsührübebo nukshangnü akeambah. 22Tüsho inü rhimokhi nangde nüsanü arhimobah; nüsanü nüsa münküp achangbe düyihdo yungsho mahmi-jimpung dütsüh. 23Kuhingbebo nüsa kubo kheak labah tüsho jingkhümpübo nüsa jing kheak labah; nüsanü mimütrip yungsho mütrip, tüshe nüsa mülimkhibo ching nüsa sühkeakeabah tüsho khülangnü khülang ki ashearabah. 24Hanangde Ezekiel ju nüsa ki amütsan khülang labah; apinü arhimokhi nangde nüsanü arhimobah. Küyimki ha arübanü, I Atungpuh T H RÜ NPU H de nüsanü mükheahbah.
25Tüsho mihtsürü tsührü, küyimki inü arü kheaknü arü chipibo, arü asühachih tüsho müretah, arü mük asühkhi tüsho arü mulong amuzho, tüsho arü tsührübo le tsührübebo she lukhambanü, 26ju nimung atsokhitbuh khülangnü thiyusheakbo jihpü nü ki arübah. 27Ju nimung atsokhitbuh ki nü mün khimshuhbah, tüsho nünü asukbah tüsho zhikde müla. Junangde nü arü ki amütsan khülang labah; tüsho I Atungpuh de arünü mükheahbah.
Currently Selected:
EZEKIEL 24: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
