YUZÜNGTHALO 21
21
Mihtsürü Laksahkhi Dünkheak
1“Atungpuh nüsa Thrünpuhnü nüsa lashihpü jihkhi lo ching khürü laksah-a thulu ching yapde ngüsho, tüsho shepünü api laksahkheanü mümükheahsho, 2nüsa yo azothsürübo tüsho mahkhaprübo yübah tüsho arünü mi thüninde alakhi kiutobo dükeak akea kheahbah. 3Tüsho mi phünide alakhi kiuto ching lakhi azothsürübonü moshi drelü khülang küyimkishe mürhimoshihkhi tüsho sangkap munokhi lubah; 4tüsho ju kiuto azothsürübonü moshi drelü ju ke bukpung jindükhün, thulu müthsüpung yungsho müjih muyukpung hande arübah arünü moshi drelü hung ju ayihshakbah. 5Judüki Levi tsührü amükeamrübo ju phünide arübah, tümüde Atungpuh nüsa Thrünpuhnü api tankihshihpü tüsho Atungpuh mung ching müngühshihpü arü mokhit; arü yu hode neamneamruru tüsho laksahachihkhi dünkheakbo khikzhakbah. 6Tüsho mihtsürü laksahkhi phünide alakhi kiuto ching larü azothsürübonü jindükhün chingnü ahung khapshakkhi moshi drelü kumungnü arü khah mütsakbah. 7Jushu arünü athabah, ‘Isa khahnü ha thiyih bukshihkhi yung, yungsho isa müknü müngü. 8O Atungpuh nünü rhokhitkhi nü mihtsürü Israel ki neak bahjang, tüsho amülim mükihkhi mihtsürü thiyih bukkhi amülim nü mihtsürü Israel bolung dülashih; tüshe thiyih bukkhi amülim arü ki neak bahjang.’ 9Junangde Atungpuhnü alümkhi rhimokhi hode, mihtsürü laksahkhi dünkheak nüsa hahmülang müla.
Thirithsü ching Ramkhi Aliberübo
10“Küyimki nüsa riri bede keochihpü yübanü, tüsho Atungpuh nüsa Thrünpuhnü arü nüsa khah ching yukjihbahle arü rama lubanü, 11tüsho aramrü bolung nünü aliberü jak atsü ngübah mürühde nü niube thsüpü lubanü, 12nünü alibe nü yam lim bede arübah, tüsho anihbenü akuyü hütbah tüsho müzan lambah. 13Anihbenü aramrü khimmih müthribah nü yam ching labah, tüsho abe le abuh thsungkheak khinu khülang tüzhobah; jushu nünü alibe luang. 14Tüsho hanangde alabah, nünü anihbe kheak masühde lasho api zuzu thsüde dükheang, tüshe tsükjide nünü alibe sho mo düyin; nünü anihbe ki azhorü nangde dahori, tümütüsho nünü anihbe ki mükhemükim thsüdo.
Adüjibuh Yamrüplurüp
15“Mihtsürü khülangnü niuberü mahne lubah khülang kheak muzho tüsho püpü kheak mümuzhosho, tüsho anenü api kilim tsührü zübejihkhi ching adüjibuh ju amümuzhobe kheak yo thsüsho, 16hanangde alabah, mihtsürü khülangnü küyimki tsührübo kilim yamrüplurüp chamjihbanü, apinü jak kheahde anihbuhnü amuzhokhi niuberü kheak yo tsührü ki adüjibuh shihcham müjihbeah. 17Tüshe apinü mümuzhokhi niuberü kheak yo tsührü adüjibuh kilim api lakhi shihcham mahne kinü alü jihde mütsanmükhibeah, tümüde api ju anihbuh sühmüh atankih ah; adüjibuh yo alim ju api yo.
Mihyumanikhi Tsührü
18“Mihtsürü khülang tsührü mihmukhiuh tüsho azhihrü, danyukyuk she berü buhrü yu manirü lasho, 19abuh le abe anenü api thobahle kiuto ching azothsürü miki chipimurung ki hande arübah. 20Tüsho arünü kiuto azothsürübo ki thabah, ‘Isa tsührü ha mihmukhiuh tüsho azhihrü ah; apinü isa yu mani, api bukchihrü tüsho amüshangrü khülang ah.’ 21Judüki kiuto ching lakhi mihtsürü alalanü api lungnü arusahbah; junangde nüsanü amütsürü nüsa bolungnü yihkhita bahang, tüsho Israelrü alalanü sobah atrebah.
Yakzanbo
22“Mihtsürü khülangnü ashepü thülünde neak yihbeakbahle api sheshihsho, tüsho nüsanü api sangdung kheak zhinsho, 23api mi ju sangdung kheak tsüngreroro düzo, tüshe nüsanü api ju ninü kiuyuka bahang, tümüde shepü zhindünü Thrünpuh muthrumüneankhi ah. Atungpuh nüsa Thrünpuhnü nüsa kilim yamrüplurüp jihkhi lo nüsanü mümüneanbeah.
Currently Selected:
YUZÜNGTHALO 21: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
