YUZÜNGTHALO 20
20
Thirithsü Dünkheak
1“Küyimki nüsa thiriri azhihde keochihpü yübanü, tüsho khorabo le lolungbe tüsho mihtsürübo nüsa kheaknü hihde angübanü arübo dütre; tümüde nüsa Ijip lo ching bede atubuh Atungpuh nüsa Thrünpuh nüsa lung lah. 2Jumonü küyimki nüsa keochihpung khiungbanü, amükeambuhnü mikhuh ching arübah tüsho thirithsürü ki thabah, 3‘O Israel aniang: Khihni nüsa thiriri lung keochih ching lah; nüsa mulong dünini, dütre, tüsho dajan yungsho arü trede dümüyinsah; 4tümüde Atungpuh nüsa Thrünpuh nüsa khümkhitpü thsüde thiriri bede keochihpü nüsa lung yüchoh.’
5“Judüki atorübonü mihtsürübo ki thabah: Mihtsürü khürünü nihbuh yam aso thsübah mümüsühkhityide la shi? Api thüyam lim alode yüshang, jude yungsho api keochih ching shebah tüsho mihtsürü püpürünü ju müsükhitbah. 6Tüsho khürünü kurungasolu thsübah yimlua mütsühyide la shi? Api thüyam lim alode yüshang, jude yungsho api keochih ching shebah tüsho ju püpürü mihtsürünü atsühbah. 7Tüsho khürükhüh aliberü ki thiyu-zobah yamkhün müthsüyide la shi? Api thüyam lim alode yüshang, jude yungsho api keochih ching shebah tüsho püpürü mihtsürünü anihbe lubah.
8“Kheaküshe atorübonü mihtsürübo ki thabah, ‘ Mihtsürü shepünü trecho tüsho mulong ninicho? Api thüyam lim alode yüshang, jude yungsho api nangde keoniorübo she mulong ninibah.’ 9Tüsho hanangde alabah, Küyimki atorübonü mihtsürübo ki thiyu thakhambanü, arübonü mihtsürübo bepü thsüde bonungrü kurungkheak wühkenorübo mokhitbah.
10“Küyimki nüsa keochihpü thsungkheaknü kiuto phünide ayübanü mungtsü thsüshihpü zhiyukjang. 11Tüsho nüsanü mungtsü thakhi leangkhide arünü nüsa ki chipi ripitbo khimshuhsho ju ching lakhi mihtsürü alala nüsa ki ruk kipde tüsho nüsa tankihde alabah. 12Tüshe kiuto ching larü mihtsürübonü mungtsü müthsüde nüsa azhihde keochihsho, nüsa bonungrübonü ju zündoang. 13Tüsho küyimki Atungpuh nüsa Thrünpuhnü arübo nüsa khah ching yukjihbanü, ju ching lakhi athrürü alala nuknü laksahang. 14Tüshe aliberübo, azürü aninibo, akam-shiwühbo kiuto ching lakhi alala tüsho ayankhikhi kukruk lüpdükhi nüsanü nihbuh thsungkheak luang; tüsho Atungpuh Thrünpuhnü nüsa kilim jihkhi nüsa riri kukruk yankhikhibo nüsanü tsühang. 15Hanangde nüsa phünide alakhi trükbo yungde, nüsa kheaknü khide limshude alakhi kiuto kheak rhimoang.
16“Tüshe Atungpuh nüsa Thrünpuhnü nüsa kilim yamrüplurüp jihkhi kiuto mihtsürübo, alala laksahang. 17Tüshe Atungpuh nüsa Thrünpuhnü thiyukhüm jihkhi nangde harü shahde dükheakshang: Hitrü, Amorrü, Kananrü, Perizrü, Hivrü tüsho Jebusrü, 18jude yungsho arünü arü thrünpuhbo ki rhimokhi athraneanbebo yande arhimoshihpü nüsa ki thsangyubah tüsho Atungpuh nüsa Thrünpuh azhihde nüsanü neak yihbeakbah.
19“Küyimki nüsanü kim ashangkhüh kiuto zündode keochihpü thsakhambanü nüsanü sangdungbo awünü dükiushak, nüsanü jurü kheaknü aso tsühpü kuklah, jurübo dükiushak. Thulu ching lakhi sangdungbo ju nüsanü ayanpü thsüde mihtsürü a de? 20Tütüshe amasobe sangdung ah de nüsanü amükheahkhi a akiushakpü kuklah tüsho nüsanü bede keochihkhi kiuto mükheamyi khiungde jurübo azündobe rhimo ching luang.
Currently Selected:
YUZÜNGTHALO 20: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
