AMOS 3
3
Israel azhihde Thiyumütsanbo
1O Israel mihtsürü, Atungpuhnü Ijip lomi chingnü bekhitkhi yamkhün alala azhihde asukkhi yu ha aniang: 2Alomi ching yamkhün alala lung inü nü lang mükheahlah; jumonü nü neak alala dünkheak inü nü thsümüchibah.
3Mümüyüpachihde mahne rukhüh tsahcho de?
4Shih mülachoki kekhüzünü murung ching arungcho de?
Kekhüzü nununü tümü mutholode ayam ching khungcho de?
5Qimürip thsüa muzode wuhnu ju qimürip ching phuhcho de?
Tümü muphuhde qimürip ju keamcho de?
6Kiuto ching hulipungpung mütbah mihtsürübonü mütrecho de?
Atungpuhnü mürhimode kiuto ching thsümütsü dünjicho de?
7Tsükjide Atungpuh Thrünpuhnü api yamlarü wukihrübo ki rama lakhi alümkhi muhuhdüa tümü she müthsü.
8Kekhüzünü arungchoki, shenü mütrepü?
Atungpuh Thrünpuhnü asukchoki, shenü mümüchitpü?
9Ashdod tüsho Ijip chipibo ching zhiyukang, “ Nüsabo Samaria wungbo kheak mukhungang, tüsho ju ching tümü neamneamruru la, tüsho tümü ajunokhi lanü kheahang.”
10 Atungpuhnü ha thachoh, Sherünü thiyih bukde tüsho ahüh-a arü lapung ching zochonü, arünü alim rhimopü mümükheah. 11Jumonü Atungpuh Thrünpuhnü ha thachoh: Thiririnü lomi mükamdobah, tüsho nüsa tsunglobebo bahjihbah; tüsho nüsa lapungbo yankhia lubah.
12 Atungpuhnü ha thachoh: Namfimihnu neakrü jing mahne yungsho nuku khülang kekhüzü mün chingnü ayankhikhi nangde, Samaria ching lakhi Israel mihtsürü dükhüm-binkiu mungkhüh tüsho yapkiu shihchamkhüh kheak binrü khümkhitbah. 13Aniang, tüsho Jakob yamkhün azhihde thiyumütsan jihang, Atungpuh Thrünpuh , Wuto Thrünpuhnü thachoh: 14Inü Israelnü alakmihkhi dün thsümüchi nimung, inü Bethel kingaün sadambo thsümünimbah, tüsho kingaün sadam juhbo lipkhibah tüsho alo ching keambah. 15Inü tsüngkam yam tüsho muzhu yam lukkheambah; tüsho thsotorünü züt thsükhi yambo dükheakbah, tüsho thüyam atotobo akheam thsübah, Atungpuhnü thachoh.
Currently Selected:
AMOS 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
