AMOS 2
2
1 Atungpuhnü ha thachoh: Moabnü alochode neak yihbeakkhi dünkheak, inü thsümüchi mululo; tümütüsho apinü Edom kiulongthsüpuh robo mobün kamde takdo. 2Jumonü inü Moab kheak mo khülang yüshihbah, tüsho junü Kerioth chipibo aniubah, tüsho ahode hulipungpung mütkhi düsheak ching Moab shebah; 3inü ju lungnü yakzanshuhbuh dükheakshihbah, tüsho api lung atorü alala laksahbah, Atungpuhnü thachoh.
4 Atungpuhnü ha thachoh: Judanü alochode neak yihbeakkhi dünkheak, inü thsümüchi mululo; tümütüsho arünü Atungpuh yakzan bahyuk, tüsho api yukhüm muzo. 5Jumonü inü Juda kheak mo khülang yüshihbah, tüsho junü Jirusalem chipi aniubah.
Israel kheak Thrünpuh Mahkhap
6 Atungpuhnü ha thachoh: Israelnü alochode neak yihbeakkhi dünkheak, inü thsümüchi mululo; tümütüsho arünü shotoyinchi mo thiyuro-lungkirü tüsho jingkhümpü mihbümkhüh mo müthsümülarü yinabah– 7arünü zhochihrü ku asungthulung ching juyuk, tüsho juyuka larü limro chingnü nimkhita bah; abuh tüsho tsührünü rukhüh aliberü ahorichoh, junangde I mung amüsüh müneanjih; 8arünü kingaün sadam aban ki thiyuchihchimde alukhi khimmih kheak zuhyuka yapchoh; tüsho arünü azhekhi shonü yukhu thuloa arü thrünpuh yam ching yungchoh.
9Tütüshe inü arü müngühnü cedar sang nangde achang tüsho thülamsang nangde amüküp lakhi Amorrü dükheakshih; inü api kumung aso, tüsho alunglim ayingbo thsümünimjih. 10Kheaküshe inü nü Ijip lomi chingnü bekhit, tüsho Amorrü lo müküh-a lushihpü kam yirü sunglo ching be. 11Tüsho inü nüsa tsührü khürü wukihrübo akhiukshih tüsho athunurü khürü Nazirit#Atsangkhitrü. kamshih. Ha atsütsü yung de, O Israel mihtsürü? Atungpuhnü thachoh. 12Tüshe nüsanü Nazirit ki yukhu yungshih, tüsho wukihrübo ki thiyukhüm jihde tha, “ Nüsanü dümüchit.” 13Jumonü lolungbenü hi mide hanbah azünakkhi nangde inü nüsa zünakbah. 14Athride ashanrü she mütsokhi, tüsho sühmüh larü sühmüh mülade akambah, yungsho wutonü arü rhangdung mükhümkhit; 15sherü sanglüh shuhchonü müzhip, tüsho sherü jing athrilanü mükhümkhit, yungsho khoraberünü arü rhangdung mükhümkhit; 16mulong torü thirithsürü she ju nimung bünkeang alihde atsobah, Atungpuhnü thachoh.
Currently Selected:
AMOS 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
