2 TESALONIKA 3
3
Tamkhüntamnüpü Mushukhi
1Akheam ching keoniorübo, isa thsungkheak tamkhüntamnüjang, junangde nüsa lung rhimokhi nangde Atungpuh yu nahnahde abubah tüsho wüntrede akambah, 2tüsho mihbukmuyuk le amütsü mihtsürü kheaknü isa bekhitbah; tümüde alala a akinpü yung. 3Tüshe Atungpuh a thiyuro ah; apinü nüsa düküngshihbah tüsho amütsü chingnü nüsa aheangbah. 4Tüsho nüsa dünkheak isanü Atungpuh kheak mulongram lah, junangde isanü thiyukhüm jihkhi nüsanü rhimochoh, tüsho mutuklode arhimobah. 5Thrünpuh amuzho tüsho Khrista kheak düküngpü Atungpuhnü nüsa mulongbo khuhlanga huhshang.
Rhimopü Yak
6Keoniorübo, nüsanü isa kheaknü aleangkhikhi yakli müyande yomuhde alakhi keoniorü kheaknü chamkhibah laang de isa Atungpuh Jisu Khrista mung chingnü nüsa ki thiyukhüm jihchoh. 7Künangde isa kheahkhibanü nüsa küdah thsüde mükheahlah; nüsa lung isa lachoki yomuhde alakhi yung, 8adün müjihde isanü she yikhap she mütsüh, tüshe nüsa ki hahmülang müjihpü thsüde keaksah khisahde isanü azhing ayin rhimo. 9Ju isa alim müla dükhinü yung, tüshe akheahkhishihpü isa rhimo ching nüsa kilim amütsan khülang jihpü thsükheah. 10Tümüde nüsa lung isa lachoki she, isanü ha yukhüm nüsa kilim jih: “Shepünü rhimo mürhimobanü, api a düyimtsühshih.” 11Tümütüsho nüsa khürü yomuhyothsünkhinü rhimo tümü mürhimode mührü rhimo ching lang arahrungde alakhi isanü sochoh. 12Kheakü hadürü mihtsürü ki malande arü rhimo rhimopü tüsho arü rhangdung lapü mulomüthsüpü Atungpuh Jisu Khrista mung chingnü isanü thiyukhüm jihde tuthsukchoh. 13Keoniorübo, atsü rhimopü ching dümukhiuk.
14Isanü ha kihüm ching thakhi anipü khürünü reanglosho, ju mihtsürü kheahyukang tüsho api achih ngüshihpü thsüde api ki tümü düthsü. 15Tütüshe api kheak thiriri nangde dükheah, tüshe keoniorü nangde tuthsukang.
Akheam Yubo
16Kheakü mungtsü Atungpuhnü kim tüsho limro alala ching nüsa kilim mungtsü jihshang. Atungpuh nüsa alala lung laang.
17I Paulnü, ha salüm I khahnü thrütchoh. I yo kihüm aban ching ha amütsan dokhi lah; inü ha ruk thrütchoh. 18Atungpuh Jisu Khrista amüthsüm nüsa alala lung laang.
Currently Selected:
2 TESALONIKA 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
