2 TESALONIKA 2
2
Mihbukmuyuk Khülang
1 #
1 Tes 4.15-17
Keoniorübo, kheakü isa Atungpuh Jisu Khrista arüpü tüsho api shorupü isa mukhungpü dünkheaknü isanü nüsa ki mushuchoh, 2müchityu yungsho thiyusheak, yungsho isa kilimnü kihüm thsüa la, Atungpuh nimung arüdo de athakhi hode nüsa nahde mulong dajan yungsho arhungangüm mülabeah. 3Shenü she nüsa tümü ching she dümülapyukshih, tümüde azhihkhi makhiukyikia tüsho athsümünimpü akhua lakhi aneak mihtsürü makhiukyikia ju nimung marü. 4Apinü azhihbah tüsho aküdah thsüde Thrünpuh ah de ajikhi yungsho kingaünbe kukruk kurungkheak shuhkihbah, junangde api ju Thrünpuh ah de zhiyukde Thrünpuh arüngyam ching binbah. 5Küyimki I nüsa lung lakheanü inü ha nüsa ki thado de nüsanü mülümkhitcho de? 6Tüshe anihbuh kim ching akhiukpü kheakü tümünü api thololanü nüsanü mükheahlah. 7Tümüde mümütsankhi mihbukmuyuknü rhimode lah; tüshe shepünü ju thololanü limro chingnü yihkhita mübahyikia adünjipü lakhi ju müdünji. 8Judüki mihbukmuyuk ju amikheak akhiukbah, tüshe küyimki Atungpuh Jisu arübanü, api mün sheaknü anihbuh laksahbah tüsho api müretahde arükhinü anihbuh dükheakshihbah. 9#Mt 24.24Amünean rhimo hode mihbukmuyuk arükhi ju wu alala bede tüsho arükchih amütsanbo tüsho amüyinsahbebo, 10tüsho adükheakpü larü thsungkheak rük amütsü alala labah, tümütüsho arünü thiyuro muzhobah akhümkhitpü lakhi reanglo. 11Jumonü tümü arükchih lanü arünü akinshihpü Thrünpuhnü arü kheak amülim wu yüshih, 12junangde thiyuro mükinde amütsü rhimo ching asührü alala bahyukbah.
Akhümkhit thsungkheak Nüsa Mokhit
13Tüshe Atungpuhnü muzhokhi keoniorübo, isanü kamruhroro Thrünpuh ki makshe jihpü lah, tümütüsho Menü atsangkhitkhi hode akhümkhitpü tüsho thiyuro ching kinpü atankih chingnü Thrünpuhnü nüsa mokhit. 14Nüsanü isa Atungpuh Jisu Khrista müretahkhi ngüpü thsüde isanü thsangyuthsangrakhi thiyusheak-atsü hode nüsa ha ching jikheah. 15Jumonü keoniorübo, thiyunü yungsho münnü yungsho kihümnü thsüala, isanü nüsa thsangyukhi thiyuro ching düküngde zhipang tüsho ramrihang. 16Kheakü isa Atungpuh Jisu Khrista tüsho isa muzhobuh tüsho amüthsüm hode isa kilim lünnü sühakhim tüsho atsü jihbuhnü, 17nüsa mulong shukheamshang tüsho rhimo atsü aban tüsho thiyu ching düküngde kamshang.
Currently Selected:
2 TESALONIKA 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
