1 SAMUEL 4
4
1Tüsho Samuelnü athakhi Israel alala kilim arü.
Tangzüng Sangdan Yankhikhi
Judüki Filistiarünü Israel bede keochihpü thsakhambah alakheah, tüsho Israelnü arü bede keochihpü tsahmusude yü; arü Ebenezer ching bin, tüsho Filistiarü Aphek ching bin. 2Filistiarünü shihkhin thsübah Israel azhih, tüsho küyimki shoruachihbah keochihkhea, Filistiarünü Israel kuk, arünü keochihpung ching mihtsürü 4000 bande laksah. 3Küyimki thirithsürübo binkheampung ching arükhea, Israel azothsürübonü tha, “ Tümüde Atungpuhnü khihni isa Filistiarü müngüh tsomüzütshihkhea? Isanü Shilo chingnü Atungpuh tangzüng sangdan ha ching hande aranü, junangde api isa bolung arübah tüsho isa riri khah chingnü akhümkhitbah.” 4Jumonü arünü mihtsürübo Shilo ching yüshih tüsho cherubim dükeak binkhi Wuto Atungpuh tangzüng sangdan ju chingnü lubah arü. Eli tsührü mahne, Hophni tüsho Phinehas Atungpuh tangzüng sangdan lung arü.
5Küyimki Atungpuh tangzüng sangdan binkheampung ching arükhea, Israel alalanü jingjing alande aho, junangde alomi ajan. 6Küyimki Filistiarünü ahokhi düsheak sokhea, arünü tha, “Ibrirü binkheampung ching tode ahokhi ha amütsan tümü a?” Küyimki Atungpuh tangzüng sangdan binkheampung ching arüdo de arünü amükheahkhea, 7Filistiarünü tre; tümüde arünü tha, “ Thrünpuh binkheampung ching arüdo.” Kheaküshe arünü tha, “Isa are! Tümütüsho tümü lang she ha ruk püpüki müdünji. 8Isa are! Harü wuto thrünpuhbo khah chingnü shenü isa bekhitkhukba? Harü thrünpuhbonü sunglo ching Ijiprü arüm aphuaphunü asheshihkheah. 9Mulong toang, tüsho athrüpungrü thsang, O Filistiarü, junangde arübo nüsa ki lakhi nangde nüsa Ibrirü ki azhorü mükam; athrüpungrü thsang tüsho keochihang.”
10Jumonü Filistiarünü keochih; arünü Israelrü kuk, tüsho arübo nihbuh yam lim shande tso. Judüki khide muliuhde laksah, tümüde Israel bonungrü jingnü atsahrü 3000 keamabah. 11Thrünpuh sangdan yankhia lu; tüsho Eli tsührü mahne, Hophni tüsho Phinehas laksah.
Eli Shekhi
12Benjamin mihtsürü khülang ju nimung akhimmihbo thorüpa tüsho aku kheak alo kihbah, keochihpung chingnü alihde Shilo ching arü. 13Küyimki api khiungkhea, Elinü limro ching abinkiu kheak binbah kheahde alakheah, tümüde Thrünpuh sangdan dünkheaknü api mulong ajan. Küyimki mihtsürü junü kiuto ching azahbah thiyusheak thakheanü, kiuto ching larü alalanü zhikhi. 14Küyimki Elinü azhikhi düsheak sokhea, apinü tha, “ Ha alankhi ha tümü a?” Judüki mihtsürünü nahde arü tüsho Eli ki tha. 15Kheakü Eli kam 98 azorü lakheah tüsho api mükbo tuka lakheah, jumonü apinü müngü. 16Mihtsürü junü Eli ki tha, “I kheakü keochihpung chingnü arükheah; I khihni keochihpung chingnü alihde atsokheah.” Apinü tha, “ Tümü thsüa la, I tsah-a?” 17Yunithsürünü alo, “Filistiarü müngüh Israel tsodo, tüsho bonungrü bolung she muliuhde laksahdo, nü tsührü mahne, Hophni tüsho Phinehas she shedo, tüsho Thrünpuh sangdan yankhia ludo.” 18Küyimki apinü Thrünpuh sangdan thakhea, abinkiu kheak adunglimnü ayokhia chipimurung ki keam; tüsho ahung athsungshakbah api sheabah, tümüde api ashinbuhrü tüsho mülangde alakheah. Apinü Israel kam yirü mahkhap.
Phinehas Niube Shekhi
19Kheakü atsühmeakbe Phinehas niube mübünkeangde, tsührü zübepü thsüde alakheah. Küyimki alibenü Thrünpuh sangdan yankhia lukhi thiyusheak sokhea, tüsho aniubuh abuh le aniubuh sheabahkhea, alibenü mükhümbah zübede thsünümurhuabah. 20Alibe ashepü thsüde alachoki, anihbe shorupü arükhi aliberünü tha, “Dütre, tümüde nünü athrürü khülang zübejihdo.” Tüshe anihbenü malo yungsho mani. 21Anihbenü khungarü mung Ikabod de ji, amütsan, “ Müretahkhi Israel kheaknü chamkhido”, tümütüsho Thrünpuh sangdan yankhia luabah tüsho aniubuh abuh le aniubuh ane sheabah. 22Alibenü tha, “ Müretahkhi Israel kheaknü chamkhido, tümüde Thrünpuh sangdan yankhia ludo.”
Currently Selected:
1 SAMUEL 4: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
