1 SAMUEL 3
3
Atungpuhnü Samuel Jikhi
1Kheakü azübuh Samuel Eli bukkhüp Atungpuh tankihde alakheah. Judüki Atungpuh yusheak nükde alakheah; tüsho michihbo mubuyi.
2Judüki Eli ju amük thrimthrimde kambah müngüde, api yam khiungshak ching yapde alakheah; 3Thrünpuh tsünpung mümütyide alakheah, tüsho Samuel ju Thrünpuh sangdan zopung Atungpuh arüngyam ching yapa lakheah. 4Judüki Atungpuhnü ji, “Samuel! Samuel!” tüsho apinü alo, “I ha ching lah!” 5Jumonü Eli kilim shande yübah tha, “I ha ching lah, tümüde nünü I jikheah.” Tüshe apinü tha, “Inü müji; yaploang.” Jumonü apinü yübah yap. 6Atungpuhnü kheaküshe jilo, “Samuel!” Samuelnü asürübah Eli kilim yü, tüsho tha, “I ha ching lah, tümüde nünü I jikheah.” Tüshe apinü alo, “Inü müji, I tsah-a; yaploang.” 7Kheakü Samuelnü Atungpuh mümükheahyi, tüsho Atungpuh yu api ki muhuhyide alakheah. 8Kheaküshe Atungpuhnü mahsam kipü Samuel ji. Tüsho apinü asürübah Eli kilim yü, tüsho tha, “I ha ching lah, tümüde nünü I jikheah.” Judüki Atungpuhnü azübuh jia lah de Elinü anikhit. 9Jumonü Elinü Samuel ki tha, “Yüang, yapang; tüsho apinü nü jisho, nünü thaang, ‘ Asukang, Atungpuh , tümüde nü yamlarünü anichoh.’” Jumonü Samuelnü yü tüsho api yappung ching yap.
10Kheakü Atungpuh ju ching arü zhipbah, akhuhlim nangde ji, “Samuel! Samuel!” Tüsho Samuelnü alo, “ Asukang, tümüde nü yamlarünü anichoh.” 11Judüki Atungpuhnü Samuel ki tha, “ Kheahang, inü Israel ching tümüanü arhimopü lah tüsho shepünü ju sobanü nükhün ane chido peangbah. 12Ju nimung inü Eli yamkhün azhihde athakhi, atankihnü akheam khiungde adünjibah. 13Tümüde apinü amükheahkhi neak dünkheak inü api yamkhün lünnü athsümüchibah de thado, tümütüsho atsührübonü Thrünpuh ki amülim yu tha, tüsho apinü arü müyankhi. 14Jumonü Eli yamkhün neak ju laksah-a kingaünde yungsho jihchungchung she lünnü mübahjih de inü Eli yamkhün ki thiyuchihchim.”
15Samuelnü ju ching yapsu khiungde yap; jushu apinü A TUN GPU H yam ripit khimshuh. Samuelnü Eli ki michih thapü tre. 16Tüshe Elinü Samuel ji tüsho tha, “I tsah-a, Samuel.” Apinü alo, “I ha ching lah.” 17Elinü tha, “ Apinü nü ki tümü thakhea? Ju I kheaknü dümüyim. Apinü nü ki asukkhi tümükhüh I kheak müyimsho Thrünpuhnü nü kheak rhimoshang tüsho alü she rhimoshang.” 18Jumonü Samuelnü api ki alala tha tüsho api ki tümü she mümüyim. Tüsho apinü tha, “ Ha Atungpuh lah; apinü atsükhi thsüshang.”
19Samuel zode akamchoki, Atungpuh api lung lakheah tüsho api yu tümü lang she alo kheak mayokhishih. 20Tüsho Dan chingnü Beersheba khiungde Samuel ju Atungpuh thiyuro wukihrü ah de Israel alalanü mükheah. 21Mutuklode Atungpuh Shilo ching akhiuka huh, tüsho Atungpuh yu hode Samuel ki api akhiuka huh.
Currently Selected:
1 SAMUEL 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
