ROMTE 8
8
Thagau Ah Hindan
1Chutichun, tu’hin chu Khrista Jesu ah umte â ding ah chun, thiamlo channa him him a um ta puai.
2Khrista Jesu ah hinna Thagau dan chun, gitlona leh thina Dan ah kipat chun ei pawtsak tangal in.
3Chutichun, Dan in a mamaw chu, ei uh taksa dan ah chawn lo ah, Thagau dan ah chawnte ah hin sukbukim ahitheina dingin,
4taksa’n a sukzawngkhal ziak ah Dan in a bawlthei tâk lo chu, Pathian in a chapa chu gitlona taksa mêlpu’n, gitlo thoina ding ah hun sawl in, taksa ah gitlona chu thiamlo a hun chansak tai.
5Taksa Dan zuite chun taksa lam thilte a lunggul sek un, himaleh, Thagau dan zuite chun Thagau thilte ma a lunggul sek ui.
6Taksa lam thilte lunggulna chu thi’na ahi’n; thagau lam thil lunggulna chu hinna leh thamuanna ahi ngal a.
7Taksa lam doidan vang Pathian tawh kimêlmâkna ahi’n; Pathian dan tawh kituakna a um puai; um le a um theilo him ahi.
8Ziaziakchun, taksa ah umte chun Pathian a kipaksak thei puau hi.
9Nanghaw vang taksa um la hita puau in, Thagau ah um la hizaw tau hi; ziaziakchun, nangmau ah chun Pathian Thagau chu a chêng hi. Kua’nle Khrista Thagau a neilo chun ama mi ahi puai.
10Khrista chu nangmau ah a um chun, taksa chu gitlo ziakin a la thi ta maleh, dikna ziakin thagau in la hung hing kit tau hi.
11 #
1 Ko 3.16
Himaleh, mithi lak ah kipat Jesu kaithokitpa Thagau chu nangmau ah a um leh, mithi lak ah kipat Jesu kaithokitpa chun, nangmau ah um Thagau ah chun la taksau thithei chu hun hinsak kit in a.
12Ziaziakchun, unaute haw, bat I nei ui; taksa dan ah um ding ah taksa kiang in vang ahi puai.
13Taksa dan ah la um zing uh chun thi ngei ding la hiu; himaleh, Thagau ah chun taksa thilhi’te la thâ zing ua leh vang hing in lau.
14Pathian Thagau pui ah um tapote chu Pathian chate ahi ngal un.
15 #
Gal 4.5-7
#
Mar 14.36; Gal 4.6 Lau tak ah um kit ding ah suak hi’na thagau la chang puau in, cha hi’na thagau la chang uh a hizawi. Tichun, “Abba! He pa!” ti ah I ko phat ua leh,
16Thagau ngei chun eimau thagau tawh kizom in Pathian chate I hitau hi ti ei hiatsak hi;
17chuleh, chate I hiu chun, golua dingte I hiu ah, Pathian golua ding, Khrista tawh golua khawm ding I hitau hi; ama lopina I chan khawm theina ding un, ama thokna le I thokpiu a ngai hi.
Lopina Ding Chu
18Tu’lai thoknate hi tu’nung ah lopina I chung ua hung kilang dingte chu tawh te’pi kham in ka ngai puai.
19Thilsiam zosia chun kinem tak in Pathian chate kilatna ding chu a ngakla ma ma tangal un;
20 #
Thl 3.17-19
thilsiam zosiate chu thil thulim lo thu thu’n umsak in a um tau ah; a nop thuu ah um hilo in, kinepna umsakpa ziak ahi zawi;
21thilsiam zosia le siatna suak ah kipat suachâtsak in um in tiu in, Pathian chate zalenna lopi tak chu chang ding ahi ngal un.
22Thilsiam zosia chu, nauvei nat thuak leh thûm leh mâu in tu’tiang ah hin a um ui ti I hiau hi.
23 #
2 Ko 5.2-4
Amau haw bep hilo in, eimau ngei Thagau ga masa neite hile, cha hi’na kilatna, I taksau tatna chu ngakla in, lungthim ah thûm leh mâu in I um uh ahi.
24Zia kinepna ziak ah hin hukdam I hiu hi. Himaleh, kinepna mu zing thei chu kinepna ahi puai; min a mutâk nung chu bangti’n kineppi nalai ding a hem?
25I mu nailo I kineppiu chun, zia chu gunchu tak in I ngak ham ham sek ui.
26Zia gual ah chun, Thagau chun I hatlonateu ah ei panpi sek in, eimau hin bangti pauchap ding I hiu em ti I hepuau in, zia Thagau ngei chun gen daw theilo khop ah nasa zaw’n ei dot piak in a la thûm sek hi.
27Ama, lungthim sunggil lam ensui sekpa chun, Thagau lungthim leh ngaituate chu a hia’n, ziaziakchun, Pathian lung lam tawh kituak in mithiangthote â dingin a dot piak zing ahi.
28Pathian in a guat dungzui ah a kote, ama hepite â ding ah chun a phatna ding un thil bangkim a bawl piak sek hi ti I he ngal un.
29Pathian chun, a Chapa chu unau tam tak lak ah cha piang masa pen ahi’theina dingin, a hetlawkte chu a Chapa gual hiding in a guatlawk a.
30Chun, a guatlawkte chu a ko ah; a kote chu thiam a chansak ah; chun, thiam a chansakte chu a chawihoi sek hi.
Khrista Jesu ah Pathian Hepina
31Zia thute ah chun bang gen ding I hitau em? Pathian ei lam ah a pan chun kua’n ei do thei ding a hem?
32Ama Chapa hial bawn hawi lo ah, I leng ua thasâng ah hun pepa chun, thildang zosia le a thawn in ei pelo ding a hem?
33Pathian mitêlte chu kua’n hêk thei ding a hem? Thiam chansakpa chu Pathian ahi ngal a.
34Thiamlo chansak chu kua a hem? A hung thi Khrista Jesu kha ahi; ahi ngût hi, a thokit ah Pathian khut changlam in a um ah, ama chun ei pauchap piak zing ahi.
35Aleh, Khrista hepina ah kipat chun kua’n ei khen zo ding a hem? Thokgimna’n a hem, lungkhamna’n a hem, sukgentheina’n a hem, kial in a hem, ngawnchang hi’na’n a hem, lau umna’n a hem, chemjam in a hem, ei khen zo ding ahi diam?
36 #
Sam 44.22
“Nangma ziakin nitum in tha in ka um sek un;
belam tha ding gual ah sim in ka um ui,”
ti ah zik gual khan.
37Ei khen zo lo e! Zia zosia ah chun ei haw ei hepipa zal ah chun gâl zo te sâng ah chungnung zaw I hiu.
38Kichian takin ka he ahi, thina a hem, hinna a hem, vansawlchâkte a hem, lalna a hem, thil um lai a hem, a hung um ding a hem, thilhi’theina a hem,
39sânna a hem, thûkna a hem, thilsiam dang him him inle I Lalpau Jesu Khrista ah um, Pathian hepina kipat chun ei khen zo pua’n a.
Currently Selected:
ROMTE 8: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
