ROMTE 7

Kichenna Kipat Etsakna

1Suapite haw, dan hete kiang ah thugen ka hiziak in mihing chung ah Dan in a dam sung sia thu a nei dan hi la hepuau em?

2Numei pawsal nei chu a dam sung sia a pawsal neina dan ah chun kân in a um tai; himaleh, a pawsal a thi leh vang pawsal neina dan ah kipat chun thâdaw ahi tai.

3Ahi’n, ama chun a pawsal a dam sung in pawsal dang vanei taleh, ama chu ângkawm hi’ntin; himaleh, pawsal thi ta ahi chun zia dan ah chun kikân talo ahiziak in, midang kichenpi ziang leh le ângkawm ti’thei a hita puai.

4Zia gual ah chun, ka suapite haw, nang uh hi Khrista taksa ah chun Dan thi’san ah um la hitau ah; Pathian â ding ah chi suantu I hung hitheina ding un, thina kipat ah thokit ngei chu kichenpi la hitau ahi.

5Taksa ah I um lai ua khan, Dan ah um zing gitlonate chun ei hun thunun thei sek in; thina ding lam ah chisuantu hi dingin I taksa bâkteu chu ei mat piak sek ahi.

6Himaleh, tu’hin chu Thagau ah hinna thak nuai ah suakte I hi zawk theina ding ua ei tutâng pen ah kipat thi ta in, lekha zik lui gual bep hilo in, Dan ah kipat in thâdaw in I um tau hi.

Dan leh Gitlona

7 # Pdt 20.17; Dan 5.21 Bang I gen ta ding awm leh? Dan chu gitlona a hem? Hilo e! Dan ziak ah het hilo leh, gitlona chu a la helo ding ka hi. Dan in, “Êng kin,” tilo leh, ênna chu bang a hem helo ding ka hi.

8Gitlo chun thupiakte hi lemchâng ah mang in, keima hin ênna chitin a hun umsak hi. Dan panglo ah chun gitlona chu a thi a la hingal a.

9Tu’ma lam in Dan lo in ka la hing ah; himaleh, thupiak chu a hung um phat chun gitlona chu chawthaw in a hung um ah, keima chu ka thi ta ahi.

10Hinna ding ah thupiak chu, thina ding ahi ti ka la he zaw tai.

11 # Thl 3.13 Gitlo chun zia thupiak chu lemchâng ah mang in ei hun thêm ah, zia chu mang in ei that tai.

12Ziaziakchun, Dan chu a thiangtho ah, thupiak chule a thiangtho ah, a dik ah, a pha ahi.

13Ahileh, thilpha chu kei â dingin thina hung hita mai a hem? Hilo e! Gitlona chu kei â dingin thina a hung hizaw ta ahi. Tichun, gilo chu gitlona ahi ti a kilatna dingin, thilpha chu mang in ei that ta ahi; thupiak ziakin gitlo chu gitlona thupi tak a hung hi theina dingin.

Mihing sung lam ah Kituak lona

14Dan chu Thagau lam thil ahi ti I hiau ah, himaleh, keima hi taksa mi, gitlona nuai ah khotdawsa ka la hi tai.

15 # Gal 5.17 Ka thilhi’te hi a ngaina ka hepuai, ka thil hi’ nop lam chu ka hi’ ngai puai; ka huat lam tak chu ka hi’zaw sek hi.

16Ka hi’nop lo lam ka hi’sek chun, Dan chu a phai ti ah pompi ka hi.

17Ziaziakchun, zia thil hi’saktu chu keima kha ka hita pua’n, himaleh, gitlona keima ah chêng chu a hizaw sek hi.

18Keima ah hin (zia chu ka taksa ah hin ka ti’na ahi,) thilpha chu a um puai ti ka hia’i; keima ah hin thilpha hi’ nopna chu a um ah; himaleh a pha chu ka hi’ thei sek puai.

19Phatna ding ah bawl ka nopte chu bawl sek lo in, a diklo bawl ka nop lo haw chu ka bawl zaw sek a.

20Tu’hin ka nop lo lam chu bawl sek ka hi chun, keima hitalo in, gitlona keima ah sêmtu chun a bawl zaw sek ahi.

21Ahi’n, zia Dan hi ka hun he tai, thilpha bawl ka nop lai in phatlona a hung um sek hi.

22Ka mihing sung lam ah hin Pathian dan zui ka thatnoppi ma ma sek a;

23himaleh ka taksa bâkte ah hin dan chuam dang a um hi ti ka hia’i, zia chun ka lungthim ah dan chu a do ah, ka taksa bâkte gitlona dan umte kiang in suak in ei pui sek ahi.

24Aw, migenthei ka hi na lawm lawm e! Zia thina taksa ah kipat hin kua’n ei hukdok ding ahi tam?

25Jesu Khrista, I Lalpau jal ah chun Pathian kiang in kipak thu ka gen ahi. Tichun, keima lungthim sung lam ah chun Pathian dan in na ka sêm ah; himaleh, taksa lam ah chun gitlona dan in ka sêm ahi.

Currently Selected:

ROMTE 7: VAIPBSI

Highlight

Copy