ROMTE 16
16
Mimal Chibai Bûkna
1I suapinuu Phoibi, Kenkria khua kochuamte nasemnu hi, hun kimêlhiat sak ka nuam hi.
2Lalpa min ah mithiangthote chung ah hiding gual in la la lop theina ding uh leh, la panpiu a ngaina phot ah la panpi theina ding un; ama ngei inle mi tampi a la panpi ta’n, keima ngei le ei panpi sek hi.
3 #
Nas 18.2
Khrista Jesu ah ka naseppite, Priska leh Akuila chibai ei la bûk piak un.
4Ka hinna ding ah amau hinna pe’ngamte a hiu hi; kei bep hilo in, Jentel kochuam pawl zosia’n le kipak thu a hun gen ui.
5Zia gual ma chun, a In ua kochuam kikhawm sek te khale chibai ka bûk hi. Asia gam ah gamasa Khrista gingtu, ka ngainat tak Epainetas khale chibai ei la bûk piak un.
6La lak ua sêmgim Mari khale chibai ei la bûk piak un.
7Ka chipi Andronika leh Junia, ka suangkul tânpite kha sawlchâkte lak ah minthang tak a hiu a, kei sâng ah Khrista ah um masate a hiu hi.
8Ampliatas Lalpa ah doitak khale chibai ei la bûk piak un.
9Khrista ah ka seppiu, Urbana leh ka doitak Stakhis kha chibai ei la bûk piak un.
10Khrista ah mi tak, Apelles kha tawh Aristobul chanaute lak ah mite khale chibai ei la bûk piak un.
11Ka chanau Herodion kha chibai ei la bûk piak un. Narkisa chanaute lak ah Lalpa ah umte kha chibai ei la bûk piak un.
12Triphaina leh Triphosa, Lalpa nasêm gim sekte kha, chibai ei bûkpiak un. Doi tak Persis, Lalpa nasem, gim ma ma kha chibai ei la bûk piak un.
13 #
Mar 15.21
Lalpa têldaw, Rufa leh a nu, kei â ding ah le ka nu kha, chibai ei la bûk piak un.
14Asinkrita, Phligon, Hermi, Petroba, Herma leh a kiang ua suapi umte kha tawh chibai ei la bûk piak un.
15Philologas leh Julia, Nirea leh a suapinu leh Olimpas leh a kiang ua mithiangtho um zosia kha chibai ei la bûk piak un.
16Kichawp thiangtho in chibai kibûk un. Khrista kochuam pawl zosia’n chibai a hun bûk ui.
Thuhilna Nunung
17Suapite haw, nangmau thu kihilna tawh kikãl ah, kikhenna leh pûkna siamte chu vêngpha ding leh, kiheisan dingin ka don la hiu.
18Zia gual mite chun I Lalpau Khrista na chu a sêm puau in, amau gilpi na bep a sêm zawu hi; a kamthiam uh leh pâkchâkna thuteu chun, mi mawlte chu a thêm sek ui.
19La thu mat dan uh mi zosia lak in a kithang tangal a. Ziaziakchun, nangmau chung thu ah ka kipak hi; ahi’n, thilpha lam ah la pil ua, thil phalo lam ah la mawl uh ka dawi hi.
20Tichun, chamna Pathian chun Setan chu la kengpêk nuai un chuan jawt vak ta’n a. Lalpa Khrista lungsiatna chu la kiang un um ta hen.
21 #
Nas 16.1
Ka seppi Timothi leh ka chipite Lusia, Jason leh Sosipater te hin chibai a hun bûk ui.
22Kei Tertia, zia lekha hun zikpa ngei hinle Lalpa min in chibai ka hun bûk hi.
23 #
Nas 19.29; 1 Ko 1.14; 2 Ti 4.20 Ka tunnapa Gaias leh kochuam pumpi hin chibai a hun bûk ui. Khawpi sumkolpa Erastas leh ka unaupau Kuartas hin chibai a hun bûk ui.
24I Lalpau Jesu Khrista hepina la leng ua kiang in um ta hen. Amen #zia chang hi I text un a um puai.
Thukhâkna
25Tu’hin, ka chanchinpha gen leh, Jesu Khrista puanlat ah a umna dungzui leh, khang sawt tak puandaw lo ah a la um thugûk kilatdawna dungzui ah,
26ahi’n la, tu’hun ah hung kipuangdok leh kumtuang Pathian thupiak dungzui ah, jawlneite’n lekha zik mang ah, ginna thuzopna um dawsak theina ding a ti, Jentelte kiang ah hiatsak ah um, a hun hi’hat thei Pathian–
27Pathian pil pakhat bep kiang ah chun, Jesu Khrista jal in lopina chu kumtuang in um ta hen! Amen.
Currently Selected:
ROMTE 16: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
