MARKA 4
4
Buchi The’ Tekhinthu
(Mat 13.1-9; Luk 8.4-8)
1 #
Luk 5.1-3
Dil pâm ah thu a hun gen pan kit a. Mipi tam tak a hung khawm un, kuang sung ah a lut ah, a kichu, mipite zosia chu se’pho ah chun a um un.
2Amau chu tekhinthu’n thu tam tak a hil ah, a thuhil chu:
3“Ngai un, buchithe’pa buchi the’ in a kuan in;
4a the’ lai in, a khenkhat chu lam pâm in a ketha, chunglêng vachate a hung ua, a hung luak zo tau a.
5Khenkhat chu lei patna, suangsi lei lak in a ketha, a lei asâ lo ziak in chomlo kâl in a hung kekdok a.
6Nisa a hung sâng ah, a hun kâk leh, zung a thâk lo ziakin a vuai pai tai.
7Chuleh, khenkhat chu hampa lingnei lak in a ketha, hampa lingneite chu a hung khang ua, a hun dêp ua, ga him him suang lo in a um tau a.
8A dang khenkhatte chu lei phatna’n a kethau ah, a hung kek un, ga a hun suau ah, ale’ sawmthumte, ale’ sawmgukte leh ale’ zakhatte’n a hung ga tai,” a tia.
9A kiang un, “Kuale hetna ding ah nakhang nei chun he tau hen,” a tia.
Tekhinthu Thiltup
(Mat 13.10-17; Luk 8.9-10)
10Chun, ama ngawn ah a um na’n a nungzuite leh a kiang ua umte chun, zia tekhinthu umzia chu a dong tau a.
11Ama’n a kiang un, “Pathian gam thugûk chu nang uh het ding ah phal a hi; pawlam ah umte â ding chun vang tekhinthu bep ah kigen ahi;
12 #
Isa 6.9,10 achutiloleh,
‘En maleu, a muchian lona ding un;
bil in he maleu, a het thiam lona ding un;
achutiloleh, hung kihei kit intiu in,
ngaidam hi kha’n au,’ ” a tia.
Buchi The’pa Tekhinthu Hilchianna
(Mat 13.18-23; Luk 8.11-15)
13Chun, a kiang un, “Nang unle zia tekhinthu kha hechian theilo la hiu em? Zia kha la het lo ua leh bangti’n tekhinthu dang zosia he thei ding la hiu em?
14Buchithe’pa chun thu chu a the’ hi.
15Lam pâm ah kethate chu ziate hi a hiu: Thu chu amau ah the’ in a um ah; himaleh, thu chu a het phat uh leh Setan chu kin tak in a hung ah, a lung sung ua thu kithe’ chu a hung lâkmang piak ta sek hi.
16Chun, suangsi lei lak ah kethate chu zia gual hi a hiu: Thu chu a het ua leh kipak tak in a pom pai un;
17himaleh, amau ah chun zung him him a um pua’n, hun chomcha thuak zo in, zia nung chuleh, thu ziak ah sukgentheina leh engbawlnate a hung um phat leh a pûk ta sek uh ahi.
18Chuleh, hampa lingnei lak ah kethate chu ziate hi a hiu: Thu chu a hiau a;
19himaleh, khawvel ngainatnate, hausak nopnate, thepnate leh thil dang dang ah nopnate a hung lut phat leh ga sua zo lo in a um ta sek ui.
20Chuleh, lei phatna kethate chu ziate hi a hiu: Thu chu a het tak ua leh pom ngal in, a ga hun suau ah, ale’ sawmthum, ale’ sawmguk leh ale’ za khat ah hung pungte chu a hiu,” a tia.
Law Nuai ah Thaumei
(Luk 8.16-18)
21 #
Mat 5.15; Luk 11.33 Chun, a kiang un, “Thaumei hi min law nuai a hem, jalkhun nuai a hem ah koi ah, a tunna tung lo dingin a vâk sek ua a hem?
22 #
Mat 10.26; Luk 12.2 Phuanlat lo ding ah sêlgûk bangma a um pawngal in; lang lo ding ah îpguk le bangma a um diak puai.
23Kuale hetna ding ah nakhang nei chun he tau hen,” a tia.
24 #
Mat 7.2; Luk 6.38 Chun, zia hile a gen kit a, “La thil hiatteu ah hin pilvâng tak in um un; nangmau te’na ngai ma ah te’piak in um ding la hiu; kipiak be ding bawn la hi nalai ui.
25 #
Mat 13.12; 25.29; Luk 19.26 A neite chu piak be hi’ntin; a neilote chu a neisun uh le lâkpiak hiding a hiu,” a tia.
Thâichi Khandan Tekhinthu
26Zia hile a gen a: “Pathian gam chu mi pakhat in lei ah thâichi tu’ hen la;
27jan ah ipmu’n, sun phat leh tho hen la, thâichi chu a jia het lo in a la kek in, a la khang ta leh, zia gual chu ahi.
28Lei chun ga a hun sua sek a; a lim in a kung, chuleh a vui, ziazaw chuleh a vui ah a ga chu.
29 #
Jol 3.13
Himaleh, zia a ga chu a hung min tak leh bulâk a hun tâk ziakin, kawite a hun pan pai sek tai,” a tia.
Ankam Mu Tekhinthu
(Mat 13.31-32; Luk 13.18-19)
30Zia gual hin a gen kit a, “Pathian gam chu banggual in ka tekhin diam? Ahiloleh, bang tekhinthu mang leu hin I genchian thei diam uh?
31Ankam mu changkhat lei ah kithe’ gual ahi, lei ah thâichi zosia sâng in neupen maleh,
32a hung kithe’ a, a kekdok in, thâichite lak lak ah a lianpen a hung suak ah, a bâk lian tak tak a hung um ah, chunglêng vachate chu a buk ah a giak thei sek uh tawhbang hi ahi,” a tia.
Tekhinthu A Matna Chu
33Zia gual tekhinthu tam tak chu mang in, a hetthei ding lam lam un a kiang un a gen sek a.
34Tekhinthu lo in a kiang un thu a gen ngai puai; amau ngawn ahi tak ua leh, vang a nungzuite kiang in a hilchian sek hi.
Jesu’n Thigawpi A Vau Thipna
(Mat 8.23-27; Luk 8.22-25)
35Zia ni ma ah chun, nitâk lam ahi in a nungzuite kiang in, “Gâl langkhat lam ah kâi hitiu,” a tia.
36Mipi chu nusia’n, ama le kuang sung ah amau lak ah um in a chiapiu ah, kuangneu dang le a kiang un a um a.
37Thigua hat tak in a hung hâng ah, tui kinawkte chun kuang chu a sep vut vut ah, tum ding a kisa ziang tai.
38Ama chu khapchâk khap in kuang mei lam ah a la ipmu. A kaitho un, a kiang in, “Hotupa, ka manthai diu hi khawksa lo la hem?” a tiu a.
39Ama chu a hung tho ah, thigua chu a vau a, Dil kiang ah chunle, “Thip inla um hiat hiat in,” a tia. Tichun, thigua chu a hâi ah, a thip dîl dêl tai.
40Chuleh, a kiang ua chun, “Bangatia, chuti lawm lawm ah lau ziang la hiu em? Ginna la nei zo ma ma lo uh ahi maw?” a tia.
41A lungkham ma mau a, “Zia pa hi bang gual mi a hita bep diam! Thigua leh Dil nasan inle a thu a awi uh hi?” a tiu a.
Currently Selected:
MARKA 4: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
