MARKA 3
3
Mi Khutzengpa Chu
(Mat 12.9-14; Luk 6.6-11)
1Ama chu sunagog ah a lut kit a; zia tak ah chun mi pakhat khutzeng a um a.
2Ama chu a hêktheina ding un sabbath ni’ a hi’dam leh hi’dam lo a la en zing ua.
3Zia khut zeng kiang ah chun, “Ei hun nai in,” a tia.
4Chuleh, amau haw kiang ah chun, “Aleh, sabbath ni’ hin sukphat a thiang em, suksiat? Hukhin a thiang em thalup?” a tia. Himaleh amau chu a thip chil chel ua.
5Ziaphat chun lungna tak kawm in amau chu a en vêl ah, a lung tâk ziak un a lungna ma ma a; zia pa kiang ah chun, “La khut hun zâk in,” a tia; ama chunle a hun zâkdok phut ah, a khut chu a dam ngal tai.
6Pharisaite chu a pawtdok ua, ama a tha theina ding dan uh ngaitua in, Herod pawl ah mite tawh a vakiho-khawm tau a.
Tuipi Pâm ah Mipi
7Jesu chu a nungzuite tawh Dil lam in a chia mang tau a; zia lam ah chunle Galili gam ah kipat mipi hungte chun a hunzui pek un.
8Thil lopi tak tak a bawl a hun het tâk ziak un, Jerusalem ah kipat, Idumia leh Jordan gâl lam ah kipat, Tura leh Sidon tuam ah mite tawh, mi tam tak a kiang in a hung khawm tau a.
9 #
Mar 4.1; Luk 5.1-3 Mipi chu a hung tam ziak un, a sukbuai lona ding un a nungzuite chu kuangneu pakhat ngaituasa koi dingin a hil a.
10Mi tam tak a sukdam ziakin, damlo haw chu a hung kikhawm sau sau tau a; ama khoi khâk dingin, a hung khawm tau a.
11Thitha buakte chun ama a mu phât ua leh, a ma-âng in a bokkhup un, “Nang Pathian Chapa chu la hi,” ti’n a kiko sek un.
12Himaleh, a chanchin chu genjak lo dingin khau tak in thu a pechiat tai.
Sawm leh Nite Teldawna
(Mat 10.1-4; Luk 6.12-16)
13Ama chu tâng lam in a kãl to ah, a mi têlte chu a kiang lam in a ko chuam a; amau chu a kiang in a hung ua.
14A kiang ah um ding leh thu gen ah a sawl dingin nungzui sawm leh ni’te chu a guat a,
15natnate sukdam theina leh thithate nawdaw theina thuneina a pia’;
16a nungzui a têl sawm leh ni’te chu: Simon, (ama’n Peter a sak;)
17Zebedai chapa Jakob tawh, Jakob suapi Johan, (Bonarjis a sak, zia chu, “Van-gi Chate,” ti’na ahi’n,) kiti tawh,
18Andria, Philip, Bartholomai, Matthai, Thoma, Alphâi chapa Jakob leh Thaddai tawh, Kanaan mi Simon tawh,
19a matsak dingpa Juda Iskariot tawh a hiu a; In pakhat ah a lut ua.
Belzebul ahi A Ti’nau
(Mat 12.22-32; Luk 11.14-23; 12.10)
20Zia tak ah chun mipi a hung kikhawm kit tau a, an nangawnle a ne man ta puau hi.
21Mipite chun, “A ngol ahi tai,” a tiu ah a suapite’n a het phat un, a thotâng dingin a chia tau hi.
22 #
Mat 9.34; 10.25 Jerusalem lam ah kipat lekhazik hungte chun, “Belzebul tawh a kijawl un, thithate hotu a hiziak ah thithate nawdok ahi chu,” a tiu a.
23Amau chu ko khawm in a kiang un, tekhinthu’n a gen a: “Setan in Setan ma bangti’n nawdok thei ding a hem?
24Gam pakhat chu amau leh amau kido leu, zia gam chu dingdok thei pua’n tin;
25chuleh, Inkuan khatle amau leh amau kido leu dingdok thei pua’n au.
26Setan le ama leh ama kido ah, a kilan chun dingdok thei pua’n tin, himaleh, mangthai zaw ding ahi; chutichun, a hun tawpna a hung tung tai.
27Mihat chu min a kân masak zet lo ua leh kuama’n a In bulu in, van ladok thei pua’n au; a kân zaw tak ua leh a chom thei bep ui,” a tia.
28Titakzet in ka hil la hiu, mihingte hi a gitlonau leh a Pathian gensiatnau ngaidam thei sik sek ahi;
29 #
Luk 12.10
himaleh, Thagau Thiangtho gensia chu ngaidam thei hipua’n tin, kumtuang thiamlo channa lau um tak in a um zawi, a tia.
30“Thitha buak vop ahi,” a ti ziak un zia cheng chu a gen ahi.
Jesu Inkuanpi Tak Tak te Chu
(Mat 12.46-50; Luk 8.19-21)
31Zia tak ah chun Jesu nu leh a suapite chu a hung ua, In mai ah a hung ding un, a ko dingin mi a sawl ua.
32Mipi a kiang ah kichute chun a kiang in, “La nu leh la suapite’n In mai lam ah sawn a hun hawl ui,” a tiu a.
33Ama’n a dawnhu a, “Ka nu leh ka suapite chu kuate a hiu em?” a tia.
34Tichun, a kiang ah kichute chu a en vêl a, “En un, ka nu leh ka suapite hi!
35Kuale Pathian lung lam bawl tapo chu, ka suapipa, ka suapinu leh ka nu ahi,” a tia.
Currently Selected:
MARKA 3: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
