MARKA 1
1
Baptispa Johan Nasep
(Mat 3.1-12; Luk 3.1-18; Joh 1.19-28)
1Pathian Chapa, Jesu Khrista chanchinpha kipatna;
2 #
Mal 3.1
Jawlnei Isai lekhabu ah chun:
“Ngai in, ka sawlchâk la ma’n ka hun sawl a,
ama chun la lampi a la sial masa ding ahi.
3 #
Isa 40.3
Gamthip ah mi kiko aw chun,
‘Lalpa lampi sial unla,
a lampite chu hi’zang un,’ ” a ti kit hi.
4Gamthip ah kipat in Baptispa Johan chu, gitlo ngaidamna ding ah gitlo haisanna baptisma thu gen in a hung pawtdok a.
5Tichun, Judea tânggam ah kipat leh Jerusalem khawpi mite chu a hung khawm ua; a gitlonateu puang in, Jordan lui ah chun baptisma a hung chang tau hi.
6 #
2 Le 1.8
Johan kivanna chu sangawngsau mul leh savun kawnggâk ah kigâk in, gam bepi leh gam khuaizu a an ahi.
7Ama chun, “Ka nung ah hung dingpa chu kei sâng in a lopi zaw’n, a ma-âng ah kûn ah a kengtawdap khau phel tâkle ka hi puai;
8keima’n tui in ka hun baptis in, ama chun vang Thagau Thiangtho in hun baptis ding ahi,” a tia.
Jesu Baptisma Channa
(Mat 3.13—4.11; Luk 3.21-22; 4.1-13)
9Zia hun lai ah chun, Jesu chu Galili gam ah Nazareth khua kipat in a hung a, Jordan ah chun Johan in baptisma a chansak a.
10Tui lak ah kipat a hung pawt daw lai tak ah chun, van hung kihong chu a mu’n; chuleh, Thagau chu vakhu gual in a chung in a hung chu’ suk a.
11 #
Thl 22.2; Sam 2.7; Isa 42.1; Mat 3.17; 12.18; Mar 9.7; Luk 3.22 Van ah kipat chun aw a hung pawt a, “Nangma hi ka Chapa dawi tak, ka kipakna ma ma chu la hi,” a hun tia.
Jesu Thep ah A Umna
12Ziazaw zaw chun, Thagau in gamthip in a sawldok ngal a.
13Gamthip ah chun Setan thep in ni sawmli a um a; gamsa lak in a um ah, vansawlchâkte chun na a hung sep piak tau a.
Galili ah Nasep A Patna
(Mat 4.12-17; Luk 4.14-15)
14Johan suangkul ah a khum nung un, Jesu chu Pathian gam chanchinpha gen in Galili gam in a hung a:
15 #
Mat 3.2
“A hun a buting ta hen, Pathian gam chu a nai tai, la gitlo uh haisan unla, chanchinpha hi ging tau in,” ti’n a gen pan a.
Jesu’n Nungzui Masate A Kona
(Mat 4.18-22; Luk 5.1-11)
16Jesu chu Galili Dilpâm ah a vâk vêl lai in, Simon leh a suapipa Andria Dil ah lên sep a vamu’n, amau chu sanga man mi a hiu a.
17Jesu’n a kiang un, “Ei zui un, mipi man dingin hun siam ing ka,” a tia.
18Ziaphatchun, amau inle a lênteu chu nusia in a zui ngal tau hi.
19Zia kipat chu gamla locha a chiau leh, Zebedai chapa Jakob tawh a suapi Johan a kuang sung ua lênsia siampha um chu a mu kit a.
20Amau chule a ko ah; amau inle a pau Zebedai chu kuang ah chun, a mi gawiteu tawh nusia in a zui ngal tau hi.
Thitha buak Vop Pawsal Pakhat
(Luk 4.31-37)
21Kapernaum khua lam in a chiau a; sabbath ni ahi’phatin kikhopna In ah a lut ah, zia tak ah chun thu a gen tai.
22 #
Mat 7.28,29 Ama chun thunei tak gual ah thu gen in, lekhazikte gen dan tawh kibang lo ah a het ziak un, a thu zilsak chu lamdang a sa ma mau a.
23Ahi’n, zia sunagog ah chun mi pakhat thitha buak vop a um a;
24a hung kikodok a: “Nazareth Jesu, kei haw bang ei law ding la hi em? Ei sumangthai ding ah hung la hi em? Nang, Pathian Mithiangtho la hi ka henai,” ti in.
25Jesu’n ama chu a hun vau a, “A la thip inla, zia pa sung ah kipat khan hung pawtdok in,” a tia.
26Ziaphatchun, thitha buak chun nasa tak in a hun sawisa, aw ngai tak ah kiko in, a pawtdaw san tai.
27A leng un lamdang a sa chiat tau a, “Zia hi bangtidan a hem? Zilsakna zat chuam tak ahi hi! Thitha buakte nasan thunei tak in thu a pia’n, a thu a mat ziang uh hi!” ti’n a kihotua sau sau tau a.
28Tichun, a chanchin chu Galili gam zosia’n a kithang suak tai.
Jesu’n Simon In ah Damlo Tam tak A Sukdamna
(Mat 8.14-17; Luk 4.38-41)
29Sunagog ah kipat a hung pawt phatin, Simon leh Andria te In ah chun Jakob leh Johan tawh a lut un.
30Simon talpinu chu khawsik in a la um a, kin tak in Jesu chu a hung hil pai ua.
31Ama chu a hung ah, a khut ah tûk in a kaitho ah; tichun, a khawsik chu thakhat in a hung pha ziang ah; a nêk leh châk diu buaipi in a hung pang ngal tai.
32Nitâk ah nisa a hung tum phatin, a kiang in damlo leh thitha buak mat tam tak a hun pui khawm un.
33A khawjang un zia In kot mai ah chun a hung khawm tau a.
34Tichun, natna chi chuam chuam ah na zosia a la hi’dam a, thitha buak matte le a nawdaw piak ah, thitha buakte chun ama a het ziak un, a pau daw ding uh a phal puai.
Galili gam sung ah Thugen ah A Vâkna
(Luk 4.42-44)
35A jing ah jingkal, khawvak thian ma in a tho ah, munthip khat in a chia ah, a vapauchap tai.
36Simon leh a kiang ah umte chun a hun hawl zui ngal un.
37Ama a vamu phât un, “Mi zosia’n a hun hawl ui,” a vatiu a.
38Ama chun a kiang un, “Thu ka gentheina dingin mun dang, khaw nai tuam ah chia hitiu; zia chu ka hungpi pen ahi ngal a,” a tia.
39 #
Mat 4.23; 9.35 Tichun, Galili gam zosia leh a sunagog teu ah chun thu a gen ah, thithate le a nawdok pek tai.
Jesu’n Phâk Pakhat A Sukdam
(Mat 8.1-4; Luk 5.12-16)
40Zia tak ah chun phâk pakhat a hung ah, a ma-âng ah chun a hung bokkhup ah, “La nop chun lei hi’thiangtho thei hi,” ti’n a hung don a.
41Jesu’n a lungsiat ma ma ah, a hun khoi a, “Ka nuam hi. Hung thiangtho ta’n,” a hun tia.
42Tichun kin tak in, a phâkna chun a nusia ngal ta’n, a hung thiangtho ngal tai.
43Tichun, thu khau tak ah pekawm in a sawl mang ta’n:
44 #
Thp 14.1-32
“Kuama kiang in bangma gen kin la; himaleh, chia inla, thiampute vaki-etsak in; Mosi’n hi’ding ah a piak gual khan kisukthianna thillat chu valân in, a hetchianna ding un,” a tia.
45Himaleh, ama chu a pawt a, zia thu chu kikopi in a gen jak tai; tichun, Jesu chu mi mu in khua’n a lut thei ta pua’n, munthip in a um zaw tai; himaleh, muntin ah kipat in a kiang in a hung khawm tho tho ui.
Currently Selected:
MARKA 1: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
