MATTHAI 8
8
Jesu’n Phâk A Sukdamna
(Mar 1.40-45; Luk 5.12-16)
1Tâng ah kipat Jesu a hung suk phatin, mipi nasa tak in a hun zui tau a;
2a kiang in phâk pakhat a hung a, bokkhup in, “Lalpa, la nop chun lei hithiangtho thei hi,” a tia.
3Jesu’n a vak khoi a, “Ka nuam hi, a la thiangtho ta’n,” a tia. Thakhat in a phâk chu a hung thiang tai.
4 #
Thp 14.1-32
Jesu’n a kiang in, “Kuama hil lo dingin chingthei in; ahi’n, thiampu kiang in vaki-etsak inla, Mosi’n thu a piak gual khan thillat ding chu valân in, amau hetpina dingin,” a tia.
Jesu’n Sepai Za hotu Suak A Sukdamna
(Luk 7.1-10)
5Kapernaum khua a tun in, a kiang ah sepai zahotu pakhat a hung ah, a panpi a hung don a:
6“Lalpa, ka suakpa zeng in, In ah a lum zing in, nasa tak ah thuakgim in a um hi,” a tia.
7Ama chun, “Hung ing ka tin, hi’dam ing ka,” a tia.
8Sepai zahotu chun, “Lalpa, ka In sung la lutna tâk ei puai; thu bep gen lechinle ka suakpa chu dam mai in a.
9Kei le mi thunuai ah um ka hi’n, kei thunuai ah le sepaite a um ui; pakhat kiang in chia in ka tileh a chia’n, a dang khat kiang in, ‘Hung in,’ ka tileh a hung sek ui; ka suak kiang inle, ‘Zia hi hi’ in,’ ka tileh a hi’ sek hi,” ti’n a dawnhu a.
10Jesu’n zia thute chu a het in mak a sa ma ma a, ama hun zuite kiang ah chun, “Titakzet in ka hil la hiu, Israelte lak in le zia gual khop ah ginna nasa hi ka mu puai.
11 #
Luk 13.29
Ka hil la hiu, sualam leh tumlam ah kipat in mi tam tak hung intiu in, van-gam ah chun Abraham, Isak leh Jakob kiang ah chun an nekhawm intiu in;
12 #
Mat 22.13; 25.30; Luk 13.28 gam chate chu vang pawlam khawthim ah paidaw in um in au; zia tak ah chun kâ leh hagialna um in a,” a tia.
13Chun, Jesu’n sepai zahotu kiang ah chun, “Chia ta’n, la ginna dungzui in la chung in tung ta hen,” a tia. Tichun, a suakpa chu zia dakkâl ngei ah chun a la dam tai.
Peter In ah Damlo tam tak Jesu’n A Sukdamna
(Mar 1.29-34; Luk 4.38-41)
14Jesu chu Peter In ah a lut phatin, Peter talpinu khawsik ah lum chu a mu’n;
15a khut a khoi piak ah, a khawsik chu a bei tai; chun, a tho ah, a na a sep piak tai.
16Nitâk lam ah chun a kiangah thitha mat tam tak a hun pui ua; thu pia’n thithate chu a nawdok ah, damlo zosia chu a hi’dam tai:
17 #
Isa 53.4
“Ama ngei in I hatlonateu ei lakmang piak in, I natnateu a paw tai,” ti ah jawlnei Isai in a gen kha a guitunna ahi.
Jesu Nungzui Nuamte A Ding
(Luk 9.57-62)
18Jesu’n mipi tam tak a kîmvêl ah umte chu a mu phât in, gâl langkhat lam ah chia dingin thu a pia ta’n.
19Lekhazikte lak ah pakhat a hung ah, a kiang in, “Hotupa, la chiana taphot in zui ing ka,” a tia.
20Jesu’n a kiang in, “Si-alte’n kua a nei un, chunglêng vachate’n le bu a nei ui. Mihing Chapa hin vang lu ngakna ding a nei puai,” a tia.
21A nungzuite lak ah midang pakhat in, “Lalpa, ka pa ei vuisak tadi in,” a tia.
22Jesu chun, “Mithi te chun amau mithi chu a la kivui na’n au; nang in ei zui mai in,” a ti piak hi.
Jesu’n Thigawpi A Vau thip
(Mar 4.35-41; Luk 8.22-25)
23Kuang ah a chuan zaw phatin, a nungzuite’n a zui tau a.
24Dil ah chun thakhat in thigawpi nasa tak a hung hâng a, tui kinawk in kuang chu a khu vâng vâng ziang ta’n; ama chu a la ipmu ahi’n.
25A nungzuite chu a hung ua, a kaitho un: “Lalpa, ei hukhing in, tum mang ding ka hitau hilam,” a tiu a.
26Ama chun a kiang un, “Ginna tawmte haw, bangatia lau la hiu em?” a tia. Zia nung ah chun a tho ah, huipi leh tui chu a vau ah, a hung thip veng veng tai.
27Mite chun lamdang a sa ma mau a, “Zia pa hi bang gual mi a hem, thigawpi leh tui nasan in a thu a mat ziang uh hi?” a tiu a.
Gadarin Gam ah Thithavop Jesu’n A Sukdamna
(Mar 5.1-20; Luk 8.26-39)
28Gâl langkhat lam Gadarin gam chu a tun in, thitha mat pani, thân ah kipat hung pawt tawh a kituak un. A lau um ma ma ziak un zia lampi chun kuama a chia ngam puau a.
29Amau chun, “Pathian Chapa, kei uh bang ei law gua hung la hem? Huntiam tunma’ ei soisak gua la hem?” ti’n a kiko tau a.
30Zia mun ah kipat gamla lo cha ah vok hon tam tak a tau a.
31Thithate chun, “Lei del daw leh vok hon sung ah son ei lutsak in,” ti’n a kiang in a don tau a.
32Ama chun, “Chiau in,” a tia. A hung pawtdok ua, vok sung ah te chun a lut ua; chuleh, vok hon chu kawl ah a taithau a, tui lak ah chun a mangthai tau hi.
33Chuleh, vok vâkte chu a tai un, khua chun a chiau a, thithamatte chung ah thil hung tung te zosia chu tawh a vagen tau hi.
34Tichun, khawpi mi zosia chu Jesu mu dingin a hung pawt ua; ama a mu phât un a gam ua kipat pawtdok dingin a don tau hi.
Currently Selected:
MATTHAI 8: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
