1 KORINTH 14
14
Thugen leh Pauhetlo Thilpiak
1Hepina del unla, thagau thilpiak chu lunggul un, a diak in thu la gen theina ding un.
2Pauhetlo ah thugen chun mihing kiang ah hilo in, Pathian kiang ah gen ahi zawi; kuama’n a thugen a hepuau a; thagau lam in thugûk a gen hi.
3Thugente chun vang mihingte kiang in siamphatna, kitîlkhona leh lungmuanna thute a gen a.
4Pauhetlo ah thugen chun ama bep a kisiam pha’n, thugente chun vang kochuamte a siamphai.
5La leng un pauhetlo ah thu la gen uh ka dawi piak la hiu; himaleh, thu la gen uh ka dawipiak diak hi. Kochuamte’n kisiam phatna a nei theina ding un mi pakhat in a le’daw lo ngal leh, hetthei ah thugente chu pauhetlo ah thugente sangin a thupi zawi.
6Suapite haw, tu’hin la kiang un pauhetlo in thu hung gen ta leng, hiatsakna a hem, hetna a hem, thugenna a hem, zilsakna a hem ah ka hun gen lo chun bang a hem lei phatchuampina ding uh?
7Hinna neilo, thilgithei, lilu a hem, tingtang a hem chule umzia bei ah a git chun, bang La kai zui a hem ti hetthei ding a hem?
8Pengkul chu mumal bei ah a git chun kua gâl kuan ding ah kisiam thei ding a hem?
9Zia gual ma chun, nang unle het theilo ding pau ah la gen uh chun, bang thu gen la hem ti kua’n he ding a hem? Beingawn ah thu gen hi’n lau.
10Khawvel ah pau chuam chuam a um hi; ahi’n la, umzia bei a um puai.
11A pau umzia ka hetlo chun, kei chu a thu genpa hetkhâk lo hi’ng ka tin; a genpa chule ka hetkhak lo gual hi’n a.
12Chutichun, nang unle, Thagau thilpiak chung ah phatchuam la ngai ziak un, kochuamte siamphat theina ding thilpiakte hawl un.
13Ziaziakchun, pauhetlo ah thugen chun a ledaw theina dingin pauchap hen.
14Pauhetlo ah ka pauchap chun, ka thagau a pauchap ngei ah, ka hetna’n vang a phatchuampi puai.
15Bang ka hita diam leh? Thagau in pauchap ka tin, hetna’n le pauchap ing ka; thagau in La sa’ng ka tin, hetna’n le sa’ng ka.
16Achutiloleh, thagau in kipak thu gen lechinle, a helote chun la kipak thugen helo ah, bangti’n, “Amen,” ti’thei ding a hiu em?
17Kipak thu la gen a pha ngei ah, midang vang a siampha diak puai.
18Nanghaw sâng ah pauhetlo ah thu ka gen tam ziakin Pathian kiang in kipak thu ka gen hi.
19Himaleh, biak In ah chun pauhetlo ah thumal sîng khat gen sâng in, midangte ka hiltheina dingin hiat thei in thumal panga bep gen ka nuam zawi.
20Suapite haw, ngaituana lam in chapang kiu in; phatlona lam in nausen hiu inla, ngaituana lam in piting hiu in.
21 #
Isa 28.11,12 Dan Lekhabu chun,
“Pau chuam thawte kam leh gam dang mite mûk in,
ziate kiang hin thu gen ing ka tin;
Chutisapi’nle ei ngaitha diak pua’n au,”
ti’n Lalpa’n a gen hi.
22Ziaziakchun, pauhetlote hi gingtute â dingin tepte’na ahi pua’n, a ginglote â dingin ahi zawi; thugen hi ginglote â ding a hipua’n, a gingte â ding ahi.
23Ziaziakchun, kochuam zosia kikhawm unla, pauhetlo in thu gen chiat taleu chin, a helote a hem, a ginglote a hem hung taleu, ngol salo ding a hiu em?
24Ahi’n la, la leng ua thu la gen uh chun, ginglo a hem, pawlam mi a hem hung lut ta leh, a thiamlo jia la leng ua la hiatsak uh hi’ntin, la leng ua la suasal uh hi’n a.
25A lunggil ah thugûkte chu suklat ahi’phat leh, bokkhup in Pathian bia’n tin, “Pathian la lak un a um ngei hi,” ti’n puangjak ta’n a.
Pathian Biakna Umdan Ding
26Ka gualte haw, bangti’n a hita diam? La kikhop phat ua leh pâkna La a hem, thuhilna a hem, kilâkna thu a hem, pau hetlo hilchetna a hem la nei chiat sek un. Bangkim chu kisiam phatna ding ah mat hi hen.
27Kua’nle pauhetlo ah thu a gen chun, pani a hem, a tam pen ah pathum a hem hiu hen la, kithâk thaw’n gen uh hen la; pakhat in a let zel hen.
28A let ding a umlo chun biak In ah chun thip mai hen la, ama leh Pathian kikâl in gen mai hen.
29Thugente’nle, pani a hem, pathum a hem in gen uh hen la, a dangte’n gunchu tak in ngaituau hen.
30A kiang ah midang pakhat kiang ah hiatsakna thupiak ahi chun, a masa chu thip mai hen.
31Mi zosia’n a zil ua a lungmuan theina ding un, la leng un pakhat khat in gen thei in lau.
32Thugente thagau chu a thugente thu thu’n a um hi.
33Pathian chu buaina Pathian a hipua’n, kichamna Pathian ahi zaw ngal a.
(Kochuam tin ah mi thiangthote a um gual un,
34biak In ah chun numeite chu thip hiat hiat uh hen. Thu a gen uh phal ahi pua’n, dan thu’n le a gen gual in kingainiam zaw tau hen.
35Het nop a nei ua leh In ah a pawsalteu dong uh hen. Biak In ah numei in thu a gen chu jachâk um ahi ngal a.
36Pathian thu hi nangmau ah hung kipan a hem? Ahiloleh, nangmau kiang bep ah hung tung a hem?)
37La lak ua thugen thei leh thagau thilhitheina nei ah kingai la um ua leh, ka thu hun zikte hi Lalpa thupiak ahi ti hiau hen.
38Kua’nle, zia chu a hetlo chun, ama le hetlo in um hen.
39Tichun, ka gualte haw, thugen thanuam unla, pauhetlo ah thugen le khap kiu in.
40Himaleh, bangkim mêlpha leh a dan tak ah bawl hi hen.
Currently Selected:
1 KORINTH 14: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
