1 KORINTH 10
10
Israelte Chanchin ah Kipat Hilna
1 #
Pdt 13.21,22; Pdt 14.22-29 Suapite haw, zia hi la hetlo ding uh ka dawi puai, I pu leh pateu kha sûmpi nuai in a um un, a leng un tuipi a kân ui.
2Mosi zui a hi’theina ding un sûmpi leh tuipi’n baptis a chang ui.
3 #
Pdt 16.35
A leng un thagau an khat a nekhawm un,
4 #
Pdt 17.6; Kis 20.11 a leng un thagau lam in a kibang a dawn chiat ui. Amau zuitu thagau lam suangpi ah tui pawt kha a dawn khawm un; zia suangpi chu Khrista ahi.
5 #
Kis 14.29,30 Himaleh, a tamzawte chung in Pathian a kipak ta pua’n; gamkeu ah khan paithâk in a um tau hi.
6 #
Kis 11.4
Thil phalo a ngaitua gual ua I ngaitua lona ding ua ei etsaknau a hi.
7 #
Pdt 32.6
A lak ua khenkhat gual ah khan, milim ho hi kiu in: “Mipi chu ne ding leh dawn dingin a kichuu in; chun, kihel dingin a dingdok tau a,” ti zik gual ah khan.
8 #
Kis 25.1-18
Thanghuai puai tiu, a lak ua khenkhat a chutiu ah, ni khat ah sîng ni leh sang thum a thi tau kha.
9 #
Kis 21.5,6 Khrista chu patep puai tiu, a lak ua khenkhat in a chutiu ah, gûl in a chu’ lum tau ahi kha.
10 #
Kis 16.41-49
Phunchiak puai tiu, a lak ua khenkhat a chutiu ah, hi’mangthaipa’n a sukmanthai khawlaw tâk kha.
11Zia thilte chu etsakna ding ah a chung ua tung ahi; eihaw hun nunung ah umte ei hilna ding ah kizik ahi.
12Ziaziakchun, ding zing ah la kingai chun chingthei ta’n, kilîk khan la.
13Mitin chung ah patepna vântâng tilo la chung un patepna a tung kha puai. Pathian chu a ginum in, la zaw khêl uh chetna la chung un tunsak pua’n a; la thokzawna ding un chetna tawh kigual in taidawna lampi hun bawl piak in a.
14Ziaziakchun, ka suapite haw, milim ho hi jamsan tau in.
15Mipilte kiang ah gen gual in ka gen la hiu; ka thugen hi ngaitua un.
16 #
Mat 26.26-28; Mar 14.22-24; Luk 22.19,20 Maljawlna no ah maljawlna ka piak uh hi, Khrista thisan kikoppina hilo a hem? Vaithum ka thap sek uh hi, Khrista taksa kikoppina hilo a hem?
17Vaithum tang pakhat a um in, eihaw mi tam tak hi vaithum tang khat nekhawm I hiu in, taksa pakhat I hiu hi.
18 #
Thp 7.6
Israelte chu en tiam un, kithoina sanete chun mâichâm chu a kikoppi puau em?
19Bang ka genna a hem? Milim ma ah kithoina leh, milim le thil khat tak ahi ka ti’na a hem?
20 #
Dan 32.17
Hilo e, Jentelte thillat chu Pathian kiang ah hilo in, thithate kiang ah ahi zawi ti hi ahi. Thithate la kikoppiu ka dawi puai.
21Lalpa no leh thithate no ah dawn kop kiu in. Lalpa dawkan leh thithate dawkân ah nekop diak kiu in.
22 #
Dan 32.21
Lalpa chu thangsiat sak gua I hiu em? Ama sâng in I hat zawu ah a hem?
Thil Zosia Lalpa Lopina dingin Bawl un
23 #
1 Ko 6.12
Thil bangkim bawl phal ahi, himaleh, thil bangkim bawl chu a pha diak puai. Thil bangkim bawl phal ahi; himaleh, thil bangkim bawl chun ei siampha diak puai.
24Kuama’n ama phat theina ding bep sâng in, midang â dingle hawl zaw tau hen.
25Sazokna kizuak taphot chu, sia leh pha hetna ziak ah bangma dong lo in ne mai un.
26 #
Sam 24.1
“Lei leh a sung ah um zosia hi Lalpa â ahi ngal a”.
27Ginglo pakhat in an ne ding ah a chial ah, la chia nop chun, sia leh pha hetna ziak ah bangma dong lo in, a piak taphot chu ne mai in.
28Ahi’n la, kua a hem in, “Zia hi kithoina thillat ahi,” ti a hung hil chun, a hung hiltu ziak leh, sia leh pha hetna ziakin nêk dâ un.
29Nangma sia leh pha hetna hilo in, ama sia leh pha hetna ka ti ahi. Bangatia midang sia leh pha hetna’n ka zalenna thunun a hem?
30Kipak tak ah ka chan, kipak thu ka gen khum chung ah bangatia soisêl ah um ka hem?
31Chutichun, la nêk unle, la dawn unle, la thil hi’ taphot uh chu, Pathian lopina ding bep in hiu in.
32Judate hi’n, Grikte hi’n, Pathian kochuam hitaleh, a kilikna ding bangma bawl kiu in;
33keima’nle bangkim ka hi taphot ah mi zosia ka kipaksak gual leh, keima phatna ding bep hawl lo ah, mi tam tak phatna ding leh hukdam a hi’theina ding uh ka hawl zawk gual ah hin.
Currently Selected:
1 KORINTH 10: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
