Salmai 94
94
Ngam Tēv Kamhòkken Taṙôkhöre
1Ō Mā Tēv, Me-eṅ Tēv lökngörit invahalvah: yang Man yēḵ.
2Hachônglöre Man, Me-eṅ ma-akah fālen ing panam: kē-ĕkūö ngam mahakeūṙöre tap manā-angkūö ò.
3Mā Tēv, irô-òten ang min ngòh tötlöök nö mihôiṅ?
4Mëichngö ṙô re yin, hakeūlôre yin: ṙòkhöre vē tö la-evṙen tö tötlöök nö eū-eu re.
5Ō Mā Tēv, panyeny yin vē tarik Meh nö likölö tö cha: hakihten vē amin Meh yin inrē.
6Fëli yin vē tafīösi, aṅ tahëng inrē tö cha: kumpaha kūön yōich inrē.
7Ngaich ngö ṙô cha-a, öt hō An ngam Mā Tēv min nö meuk: öt rēhĕn ngam Tēv Yāköp min nö Ngëicha.
8Ngëicha, yī-ö tötlē-ĕ aṅ i vē tarik: yī-ö inrē tö kulō-ov, ĕhē öi min hō akaha?
9Anga-aṅ ngam vamī tö nang, öthō Ang min nö hang: Anga-aṅ ngam vamī mat, öt hō Ang min nö meuk?
10Anga-aṅ ngam chamökṙen pumnāmö tarik, öthō Ang min nö vë-a: Anga-aṅ ngam mahaköptö mikah tarik?
11Akah chanöh ellōn tarik An ngam Mā Tēv: tö u nöng chanök-alaha.
12Tökôlò ön ngòh tarik, ngòh töchöken tö Meh, Ō Mā Tēv: tö haköptu inrē tö Meh tö aṅ im chöngö.
13Hòṅ Meh kē-ĕkūö ò tö haneūheu, löktökūö nuk sakāmö inkihten: hanöng saha ap anūlö ap tötlöök nö ūlö.
14Pò ngam Mā Tēv min nö öt kavalngö vē tarik re: öt rēhĕn An min nö ṙāngö ngam amin re.
15Pò ngam inkaha fālen min nö havantöre nö im lanöökö: ngaich ṙòkhöre min yip töchiplö ellōn nö tömrit e.
16Achīö ap min chamôhòlre nö lā in chu nö lā-al vē tötlöökö lā-en: achīö ap min samöklöre nö lā in chu nö lā-al vē töla-evṙen tö tökööl?
17Yĕn öt Mā Tēv öre hamòlṙen chu: ngaich öre ngih nômö chu nö öt ṙôktörevöṙen nö iyöng el ngam tö chēv.
18Hē chu ngö ṙô, Taleūchi röön chin: ṙapka chū-ö tö ngam miṙēlōn Meh, Ō Mā Tēv.
19Iṙôken nup chanök ellōn chu, lātuhēt ap inṙamlōn, aṅ in Meh: nö kuchīkölōn tī töng ma-alaha chu.
20Innôluvö öng ngam kantēre öt lanöökö tö aṅ in Meh: ngam vamīlö chöngö töchökhu?
21Hamūlöre yin nö ṙòkhöre, nö lā-al nômö ngam tölöök: ngaich kumpah ngam töt fāluṙen.
22Ngam Mā Tēv chu pöri tö marô-òlkui nö tananglö chu: ngam Tēv chu inrē ihong lanaklö chu.
23Ngaich Anga-aṅ nö kētö kui cha tö nup tökööl cha, ngaich rökngen cha min i nup tötlöök in cha: ngam Mā Tēv, ngam Tēv hī An min ramökngen cha.
Currently Selected:
Salmai 94: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.