Salmai 92

Tinkökö Nöinyö

1Tölöök an angū-ö nö nöiny tötī nö im Mā Tēv: ngam tinkökṙôre inrē tö nöinyö ngam mine-eny Meh, Ō Me-eṅ Lamātulöng.

2Ngam inmeuktö ngam hanāngen neūkölōn Meh tö el peuheū: ngam kanô-en Meh inrē örheūheu tö hatööm.

3Holtö nup tö sömö inröt ranöng, hol tö salmai inrē: hol tö ṙēm ṙô öp hārp inrē.

4Mā Tēv, pò Meh lökten im la-en re tī vīten chu ṙāmölōn: lökten i minë la-en minë kuntī Meh chin min mihôiṅ.

5Ō Mā Tēv, yöng ṙôkö minë la-en Meh: tö aṙū-uti nup chanöh ellōn Meh.

6Öt akahakūö ngòh tarik tötlē-ĕ ṙô: ötrēhĕn ngòh tö kulō-ov nö akaha-elmat tö e.

7Hē ngam tötlöök nö sā kiyôp nö sīöplö, hē yip tö lā-evṙen tö tötlöök nö kôlòṙen: inkamngö cha an, tö cha min nö tö urāḵngen nö payāyi.

8Ō Mā Tēv: töng örheūheu pöri Me-eṅ latulöng.

9Yĕh meuk, pò vē lā-al Meh, meh min nö öt kôlò: ṙòkhöre vē tötlöökö lā-en min nö pirātiyö.

10Hapōilöng pöri ngam sinrōl chu tö Meh, sā sinrōl nup hanchōn nuā: hachāmö chin tö tufömngöre tavī-i.

11Kôtamat chin inrē öich meuk lōn re i vē lā-al chu: hang nup lōn chu nun në elnang chu i tötlöökö la-en, yip chamôhòlre nö lā-al chu.

12Kôlò min ngòh tötlöök, nö sā ta-ôkö: sīöp an min nö sā sītör i Lepenön.

13Teūchtu yin nö el patī ngam Mā Tēv: ngaich kôlò min, nö el patī ngam Tēv hī.

14Ṙòngmöng ṙôngu yin min ip kanöinyö re: tööḵlö yin tö mak-alahare, ngaich ayal inrē.

15Inmeuk tö ngam Mā Tēv nö tö chiplö: ihong chu An, öt īnu An tö töt chiplen.

Currently Selected:

Salmai 92: CANIBSI

Highlight

Copy

Compare

Want to have your highlights saved across all your devices? Sign up or sign in

Car Nicobarese (Re-edited) Bible - TÖHET LĪPÖRE

Popular Bible Verses from
Salmai 92