Salmai 83
83
Vinë-elkui Ötkanò-òn Yip Lā-al Israel
1Ō Tēv, uh Man hachēvngenre: Ō Tēv, um öt ṙô-òv, um öt halöinyköre inrē.
2Yĕh meuk tö vē lā-al Meh nö tiṙōllenre: hachônglö kui re yin vē tö sumrīk tö Meh.
3Milichngen öp inlēnö tö cha, nö lā-al vē tarik Meh: ve-ekūöre yin nö lā-al yip in Meh tönyatngö.
4Ngö ṙô yin, Tā-a, töi rökngen cha nö pumnāmö tarik: hòn öt ngöhören nö köp ngam mine-eny Israĕl.
5Pò cha nö hĕngren lōn nö halēn ṙô re: lā-al Meh yin nö kilēḵngôre.
6Nup inrūkui Ētöm, aṅ Ismail inrē: Mô-ap, aṅ Hakār inrē;
7Kīpāl, Amön, Amelek inrē: Filistia, hol tö yip aṅ Tūrös inrē.
8Hanôltöre nö in cha inrē Asirīa: holṙen yip kūön Lòt yin.
9Sā tī re Man yēḵ tö yik aṅ Mitīa in cha: sā Sisera, sā Yāpin, ip tahël Kisòn.
10Yik tö lëlngö nö i Entòr: vītöre cha-a ngaich nö sôḵ nuā ngam tumlat.
11Vīten yik mā cha nö sā Ôrep, sā Sip inrē: hôṅ, ṙòkhöre yip kūön rācha cha, nö sā Sepah, Salmôna inrē.
12Yik tö ngö ṙô, Ta-a töi kē-ĕ e nö amin hī: ngam elyöngö ngam Tēv.
13Ō Tēv chu, vīten cha nö sā pitung röön lamfeui kuföt: sā nup kaṙālö afō nö i kūö kūföt.
14Sā öp tameūyö tö ṙāpngökūö tī tö chūölchōn: sā öp hanūkūö tameūyö tö öktikūö tī tö minë rôngö.
15Ngatī lū-u cha töp tö kalēḵ, kuföt tī Meh: pinhëken cha tap tī Meh chanôchö panam.
16I kūö cha tī tap kintöngngö ellōn, Ō Mā Tēv: hòṅ cha nö chöh ngam mine-eny Meh.
17Hökngen cha yēḵ nö sirōngkūö nö uṙeh inrē nö urāḵngen: hôṅ, hökngen cha nö kalūöchöre mikah, payāyi inrē.
18Hòṅ cha nö akahalōn tö Meh höng Me-eṅ, Öm tö minënyu tö Yāvēh Lamātulöng tö në panam nö ṙòkhöre.
Currently Selected:
Salmai 83: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
