Salmai 55
55
Ṙô Tarik Tö Hachīlö Tö Holre
1Ō Tēv, kētö elnangre i vinë-eṅkūöre tö chu: um hanyatngöre im ṙô chu vinë-elkui.
2In chu Man, ngaich sapṙô chu: kihngen chin ip ṙô re miṙivlōn, alūhure chin.
3Kūö ṙôktô öp tökunyahaṅ elmat, kūö ëlô öp tötlöök: pò cha nö kavalhökui chu tö ötlanöökö, i inngëṙö cha-a nö hakihten chu.
4Chök öp ellōn chu nö lātuhēt, nö pōihangen: ngaich ngam pinhe-eṅkūö tö kinpaha nö fuk kui chu.
5Teunghö kui chu öp pinhe-eṅkūö, kinchëyöre inrē: ngaich ngam yöng pinhë-eṅkūö nö pavtökui chu.
6Ngö ṙô chū-ö ngaich, sanëò-ku chin öre sā nyö-öṅ: ngaich öre öich marô-òlkūö kiteūngöre, ngaich haneū-heuvö.
7Yĕh meuk, ngaich chin öre maṙô-òlkūö atēṙa: ngaich iyöng el nyalnyi öre chū-ö.
8Haveuthötre öre chū-ö el in-nyatlöre: ṙā-ang im töchōich tö kalēḵ kuföt.
9Ō Mā, piyāingö litāk cha: tön meuk tö chökhu chin tanānyö, inrāinyngö inrē el ngam panam.
10Havīṙöre yin tö sakāmö ha-tööm inrē, nö i kui minë tananglö: ellōn e öp öt la-nöökö, inchök inrē.
11Ellōn e, öt lanöökö: öt ṙāköre el kanröönö e, tinṙā-mö, inchīlö inrē.
12Pòn öt öp tökunyahaṅ elmat mumṙēngen chu; hökngenre chin tö e: öt rēhĕn nö anga-aṅ öp tö sumrīk mahapōilöre nö lā-al chu;
13Më-eṅ pöri, tarik töròngta in chu: mahanôlö chu, töha-eh hol chu inrē.
14Kuchīkô ayā-a halēnöre: hol röön yip tömaṙôngö chuh el patī ngam Tēv.
15Teungtöre an yēḵ ngam töt akahtuṙen kinpaha nö i kui cha, hökngen cha nö chuh el ngam anūlö nöng aṅ: pò nup öt lanöökö nö el nup chūök cha, nö el ṙôngö cha.
16Havëkö ngam Tēv pöri chū-ö min: ngaich ngam Mā Tēv min nö hayööken chu.
17Harap, peuheū, sakāmö inrē, öich ve-eny miṙivlōn re, aka-hare inrē: ngaich hang ṙô chu min Anga-aṅ.
18Im kumchikṙen An nö ṙānyen chu ṙā-ang i kinyūngö tö yip lāḵlö chu: pòn maṙôngö yip lā-al chu.
19Hang an min ngam Tēv, sapṙô cha Anga-aṅ yip tököp misī: ngam tarik tötharīk-köre, ngam töt pa-ekūö tö ngam Tēv.
20Kiyānglö këlre nö in cha yip tö lāmta nö in ò: ha-chōichngö ngam kinlēḵngô.
21Faṙëcha elvāng an sā ta-öng, kinyūngö pöri, ellōn ò: öt ngëḵ nup ṙô ò tö tavī-i, sön pöri nö sā töhōknyu sanët.
22Hakeunlö lumngan re man im Mā Tēv, ṙapken meh An min: öt hētu An nö halöngngen tölöök nö kē-ĕyö.
23Ō Tēv, kēten cha Man min el anūlö pinyāingö: öt ròngti sakāmö ön nö aṅ ngòh töyal tö mahām, ngòh tömichīl inrē; in ò pöri min chū-ö hayönglenre.
Currently Selected:
Salmai 55: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
