Salmai 52
52
Tö Löök Nö Lōn Ngam Tēv Töm Inkò-lò
1Ō Më-eṅ tökalēḵ tarik, kūöyòh öm eū-eure i nup cha-nökhuṙenre: iṙūhen an ngam miṙēlōn ngam Tēv.
2Halēnlen ötlanöökö an ngam litāk meh: sā tökeut an kun-hāṅk nö vī michīl.
3Mötlö hanāngenlōn man tö tötlöök töre tö tölöök: mi-nyôiny-aṅ inrē töre tö ṙinô-nyô tölöök.
4Hāngenlōn man tö nup ngameūkhöti ṙô: më-eṅ litāk tömichīl.
5Ngatī tī an min ngam Tēv nö likölngen meh: kē-ĕ meh an min, ngaich köichngen meh ṙā-ang el öp inrūkui meh, ngaich teuklen meh ṙā-ang panam tö-aṅ.
6Meūkö e min yip tölöök, ngaich pa-ekūö: ngaich ha-yīölngen ò nö ngö ṙô,
7Yĕh meuk, anga-aṅ an ngòh tarik töt vamīten ngam Tēv nö kumlēḵ ò: hayönglenre pöri nö i ṙôken nup kanôlòre, ngaich hangë-eṅre nö im öt lanöököre.
8Ngaich pöri chū-ö höng sā tö-ayal ôliv chōn el patī ngam Tēv: örheūheu chin hayönglenre i miṙēlōn ngam Tēv.
9Örheūheu chin min ha-öinytö tī meh, pò meh ngaich tī tö e: i minë-eny meh chin min höka, pò e nö tölöök nö i kūö yip töhet in meh.
Currently Selected:
Salmai 52: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
