Salmai 42
42
Innëtö Līpöre
(Sal 42-72)
Ṙô ngòh tarik (më-el Inkövö) nö ha-öiny
1Sā ngòh hārt töyal tö töhëm mak: ngatī yanālö ngih nômö chu tö meh Ō Tēv.
2Yal ön ngih nômö chu tö ngam Tēv, ngam tö-aṅ Tēv: ĕhē öich min yih öich meūkö ikūö ngam Tēv?
3Höng nya-aṅkūö chu nun në mak mat chu, tö sakāmö hatööm inrē: yē cha nöng i ṙūhöṙô tö chu nö ngö, Isuh ap Tēv meh?
4Anū-ö afēkö chu, ngaich keu-heūtnyö ellōnre chū-ö, tö lökten chu holröön yip töma-ṙôngö, ngaich hachōhöt cha el patī ngam Tēv: holtö ṙanāmölōn ṙôre, holtö nöi-nyö inrē, yip tömaṙôngö nö haköpkö ngam töhet sakā-mö.
5Ō më-eṅ nômö chu, kūöyòh öm ūngölōn, Kūöyòh öm ötṙēm lātuhēt in chu? Im Tēv man meūka; tön ṙòngmö löknyuṙô chin Ha-öinyan tö-kūö ngam lanööken i kūö Ò.
6Ō Tēv chu, haṙiv öp ellōn chu nö in chu: lökten chin fē-ĕlre tö meh löktökūö öp panam Yôtön, Harmòn inrē, löktö ip Rung Misār inrē.
7Havëken höö në tö-aṙū i ṙô nup töpöklö mak: pavtu kui chin tö nup mahūvö meh ël mai inrē.
8Sönen min ngam Mā Tēv nö hōten ngam hanāngen neūkölōnre tö sakāmö: ngaich ip hatööm öp tinkö-kö min nö in chu, ap vinë-eṅkūö ngam Tēv nômö chu.
9Ngö ṙô chin tö ngam Tēv ihong chu, Kūöyòh öm vaichngö tö chu? Kūöyòh öich höng harīvölōn tökūö inkihtenre tö vē lā-alre?
10Sākūö fël öp nö i në tangëḵ chu, tī më lā-al chu nö miṙēngen chu: yē cha nö iṙūhöṙô tö chu nö ngö, Isuh ap Tēv meh?
11Ō më-eṅ nômö chu, kūöyòh öm haṙivlōn? Kūöyòh öm ötṙēm latuhēt in chu: Im Tēv man meūka; tön ṙòngmö löknyuṙô chin ha-öinyan tö kūö ngam lanööken i kūö Ò.
Currently Selected:
Salmai 42: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
