Salmai 38
38
Ṙô Ngòh Tökihngen Tarik
1Ō Mā Tēv, uh man yēḵ vëken chu im lanīnöre: um rēhĕn chökṙen chu im töṙāich kumnyahlōnre.
2Pò minë chòk meh nö tanhöt kūö nö in chu: ngam kël meh inrē nö taṙamten chu.
3Öt lanöökuṙen ön ngih alaha chu, kūö ngam lanīnö meh: öt rēhĕn minë tangëḵ chu nö haneūheuv kūö në tökööl chu.
4Pò në tökööl chu nö ngaich nö el kui chu: sā tö langan kūmö, nö öt kaneūnen tö lumnganre.
5Hangeūtu në vah chu, chahū-ui inrē: kūö kumlō-ov chu.
6Chök chin, pōihangen inrē öich singôn: hĕng sumkam miṙivlōn chin.
7Pò ngam ṙat chu nö tööḵlö tö töhū: öt töt vahavö i alaha chu.
8Tayē alaha chin, pōihangṙen paṙòk inrē: ayôṙa chin tökūö öt ṙanëmö ellōnre.
9Mā, i kui meh nup lōn chu nö ṙòkhöre: öt nyatngö inrē öp inlöinyö chu tö meh.
10Tarūka nômö chin, öt kum-lēḵĕv öich ngaich: ngaich an ngam hanātö elmat chu nö ṙāngen chu.
11Sökhaka nö köhngen më hanāngen chu, hol chu inrē, tö ngam invah chu: sökhak më mak alaha chu nö marôvat.
12Ṙātö tinngöp chu inrē cha-a vē chamöh ngih nômö chu: chökhuṙô inrē cha-a vē cha-möh chanökhutīre tö chu, sumkāmu nö lōn tö michīl.
13Öt hang pöri chū-ö, sā tarik töt hang: sā tarik inrē töt huveū-euṙô öp töt vamā-ainykūöre.
14Hôṅ, sā öp tarik chin töt-hang: öp töt aṅhav elvāng tö tömileuchngen ṙô.
15Pò chu in meh meūka, Ō Mā Tēv: sapṙô chu man min, Ō Mā, Tēv chu.
16Pò chu ngö ṙô, Hòṅ cha, nö öt ṙamngövah chu: yē në röön chu nö taleūchi, ngaich cha-a nö hakeūlenre nö lā-al chu.
17Lēnen chin sökngöre: iṙūhen an inrē ngam miṙivlōn chu nö i kūö chu.
18Vënyö nup töṙong chin min inrē: haṙivlōn chin min tö tököölre.
19Keū pöri vē lā-al chu, kalēḵ inrē: ṙūölöre ṙôken inrē vē samūöcha tösumrīk tö chu.
20Acha-a inrē, yip tö tī tö tötlöök nöī invahal tölöök nö lā-al cha: pò chu tömrit ngam tölöök.
21Ō Mā Tēv, uh chin yēḵ ṙā-ayö: uh man yēḵ marôvat tö chu, Ō Tēv chu.
22Hēṙen Man yēḵ holṙen chu: Ō Mā inyöölen chu.
Currently Selected:
Salmai 38: CANIBSI
Highlight
Copy
Compare
Share
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
